Babadi ba Rena ba a Botšiša . . .

Na Lefase le tla Phologa Ngwaga wa 2012?

▪ “Batho bao ba dumelago gore lefase le a fela ba kgeregela motsaneng o mongwe wa Fora . . . Ba dumela gore lefase le tla fela ka la 21 December 2012, e lego bofelo bja modikologo wa nywaga e 5 125 almanakeng ya bogologolo ya Maya.”—Ditaba tša BBC.

Go sa šetšwe dipolelelopele tšeo di bolelwago ke baetapele bao ba goeletšago bofelo bja lefase, bao ba ipolelago gore ke borathutamahlale gotee le didupe le ge e le dife tša lekgolong la bo-21 la nywaga, lefase le tla dula le le gona ka nako e telele kudu. Ee, lefase le tla phologa ngwaga wa 2012. Ge e le gabotse, polanete ya Lefase e ka se phologe ngwaga woo feela eupša e tla phologa le ngwaga o mongwe le o mongwe woo o tlago go latela ka morago ga moo.

Beibele e re botša gore: “Meloko e a tla gomme meloko e a felela, mola lefase lona le dula ka mo go sa felego.” (Mmoledi 1:4, The New English Bible) Le gona, ela hloko seo se umakwago ke Jesaya 45:18 ge e re: “Se ke seo se boletšwego ke Jehofa, . . . Mohlami wa lefase le Modiri wa lona, Yena yo a le theilego ka go tia, yo a sa le bopelago lefeela, yo a le hlametšego go dulwa ke batho: ‘Ke nna Jehofa, ga go na yo mongwe.’”

Na tate yo lerato o be a ka fetša diiri tše dintši a hlama le go aga sebapadišwa sa seketswana gore morwa wa gagwe a se thabele goba sa ntlwana ya mantlwane gore morwedi wa gagwe a se thabele, e le feela gore a se senye nakwana ka morago ga ge a mo file sona? Seo e be e tla ba sehlogo! Ka tsela e swanago, Modimo o bopile lefase gore le thabelwe kudu ke batho bao a ba bopilego. Modimo o ile a botša banyalani ba pele, Adama le Efa, a re: “Tswalang le ate le tlale lefase le be le le fenye.” Ka morago ga moo, “Modimo [o ile] a lebelela se sengwe le se sengwe seo a se dirilego a bona e le se sebotse kudu.” (Genesi 1:27, 28, 31) Modimo ga se a lahla morero wa gagwe ka lefase; a ka se dumelele gore lefase le fedišwe. Jehofa o ile a bolela ka go tia mabapi le sohle seo a se holofeditšego, a re: “Lentšu la ka . . . le ka se boele go nna le le feela, eupša le tla dira seo se nkgahlago, la atlega ka seo ke le rometšego sona.”—Jesaya 55:11.

Lega go le bjalo, thato ya Jehofa ke “go senya bao ba senyago lefase.” (Kutollo 11:18) Ka Lentšung la gagwe, o holofetša gore: “Baloki ke bona ba tla dulago mo lefaseng gomme bao ba se nago bosodi ba šala go lona. Ge e le ba kgopo ba tla fedišwa lefaseng; baradia bona ba tla tlošwa go lona.”—Diema 2:21, 22.

Se se tla direga neng? Ga go na motho yo a tsebago. Jesu o itše: “Ge e le mabapi le letšatši leo goba iri, ga go na yo a tsebago, gaešita le barongwa legodimong le ge e le Morwa ga ba tsebe, eupša ke Tate yo a tsebago.” (Mareka 13:32) Dihlatse tša Jehofa ga di leke go bolelela pele nako yeo ka yona Modimo a tlago go fediša ba kgopo. Gaešita le ge di lemoga “pontšho” ya bofelo gomme di dumela gore batho ba phela “mehleng ya bofelo” yeo e hlaloswago ka Beibeleng, di ka se kgone go tseba gore gabotsebotse “bofelo” bo tla tla neng. (Mareka 13:4-8, 33; 2 Timotheo 3:1) Di tlogelela taba yeo ka mo go feletšego diatleng tša Tatago tšona wa legodimong le Morwa wa gagwe.

Ga bjale, Dihlatse tša Jehofa di swaregile ka go bolela ditaba tše dibotse tša Mmušo wa Modimo, e lego pušo ya legodimong yeo e tlago go buša polanete ya Lefase le go e fetoša paradeise ya khutšo, yeo ‘baloki e tlago go ba beng ba yona le go dula go yona ka mo go sa felego.’—Psalme 37:29.

[Mothopo wa Seswantšho go letlakala 10]

Image Science and Analysis Laboratory, NASA-Johnson Space Center