Aborahama—Monna wa Tumelo

Aborahama o ema ka ntle bošegong bjo bo homotšego. Ge a lebelela godimo legodimong le le phadimago le le le tletšego dinaledi, o swanetše go ba a nagana ka kholofetšo ya Modimo ya gore peu ya gagwe e tla ata kudu go swana le diediši tšeo. (Genesi 15:5) Dinaledi ke kgopotšo e phelago ya kholofetšo ya Jehofa go Aborahama. Di šoma gape e le tiišetšo. Go feta moo, ge e ba Jehofa a ena le matla a go bopa legohle le legolo gakaakaa le dilo ka moka tše di lego go lona, na a ka palelwa ke go dira gore Aborahama le Sara ba be le ngwana? Wo ke mohuta wa tumelo yeo Aborahama a nago le yona.

TUMELO KE ENG? Bjalo ka ge e dirišitšwe ka Beibeleng, “tumelo” e šupa go dumeleng ka go tia selong seo se sa bonwego. Go dumela mo go bjalo go theilwe bohlatseng bjo bo tiilego. Motho yo a dumelago go Modimo o lebiša tlhokomelo phethagatšong ya dikholofetšo tša Jehofa, a kgodišegile gore di bjalo ka ge eka di šetše di phethagetše.

ABORAHAMA O ILE A BONTŠHA TUMELO BJANG? Aborahama o bontšhitše gore o dumela dikholofetšong tša Modimo. Ka tumelo, Aborahama o ile a tloga nageng yeo a belegetšwego go yona, a kgodišegile gore Jehofa o tla phethagatša kholofetšo ya Gagwe ya go mmontšha naga e fapanego. Ka tumelo, Aborahama o ile a ralala le Kanana, a kgodišegile gore ditlogolo tša gagwe mafelelong e tla ba beng ba naga yeo. Gape ka tumelo, Aborahama ka go kwa o ile a leka go neela Isaka e le sehlabelo, a kgodišegile gore ge go nyakega, Jehofa o be a tla tsoša Isaka.—Baheberu 11:8, 9, 17-19.

Aborahama o ile a lebiša tlhokomelo bokamosong go e na le dilong tša nakong e fetilego. Gaešita le ge Aborahama le Sara ba ka ba ba be ba phela bophelo bja manobonobo kua Uri go e na le kua Kanana, “ga se ba ka ba dulela go nagana ka naga yeo ba tlogilego go yona.” (Baheberu 11:15, Today’s English Version) Go e na le moo, ba ile ba lebiša  tlhokomelo tseleng yeo Modimo a bego a tla ba šegofatša ka yona le ditlogolwana tša bona nakong e tlago.—Baheberu 11:16.

Na tumelo ya Aborahama e be e ena le motheo o tiilego? Ee. Jehofa o ile a phethagatša kholofetšo e nngwe le e nngwe ya gagwe. Mafelelong ditlogolo tša Aborahama di ile tša ata ya ba setšhaba seo se tsebjago e le Isiraele. Ge nako e dutše e eya, Baisiraele ba ile ba dula Kanana, naga yeo Jehofa a bego a e holofeditše Aborahama.—Joshua 11:23.

RE ITHUTA ENG? Re ka kgodišega gore Jehofa o tla phethagatša dikholofetšo tša gagwe. Gaešita le ge go bonagala eka tše dingwe tša tšona di ka se kgonege go ya ka pono ya batho, re dumela gore “go Modimo dilo tšohle di a kgonega.”—Mateo 19:26.

Mohlala wa Aborahama gape o re ruta go lebiša tlhokomelo go seo re tlago go se thabela nakong e tlago, e sego dilong tša nakong e fetilego. Se ke seo monna yo mongwe yo a bitšwago Jason a ithutilego sona. Jason o na le bolwetši bjo bo fokodišago bjoo bo mo tlogetšego a golofetše ka mo go feletšego. Jason o re: “Ke swanetše go dumela gore ka dinako tše dingwe ke ikhwetša ke nagana ka dilo tša nakong e fetilego.” O oketša ka gore: “Ke hlologela kudu dilo tše dinyenyane, tše bjalo ka go gokarela mosadi wa ka, Amanda.”

Lega go le bjalo, Jason o dumela ka mo go feletšego gore Jehofa o tla phethagatša dikholofetšo tša gagwe, go akaretša le kholofetšo ya gore kgauswinyane lefase la rena le tla fetoga paradeise le gore batho ba botegago ba tla hwetša bophelo bjo bo sa felego ba phetše gabotse mmeleng. * (Psalme 37:10, 11, 29; Jesaya 35:5, 6; Kutollo 21:3, 4) Jason o re: “Ke ikgopotša gore dinako tše kaonekaone di sa letše ka pele,” gomme o hlalosa ka gore: “Kgauswinyane, tše ka moka di tla fela—kgateletšego, matshwenyego, go nyama le go ipona molato—le gona di tla felela sa ruri.” A mohlala o mobotse gakaakaang wa tumelo ya go swana le ya Aborahama!

[Mongwalo wa tlase]