Sehlogo se se ahlaahla dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Na diporofeto tša Beibele di nea ditaba ka botlalo?

Modimo Ramatlaohle ke yena feela a ka kgonago go bonela pele bokamoso ka botlalo. (Amose 3:7) Ka mohlala, go tloga mehleng ya pele, o ile a bolela e sa le pele ka go tla ga motho yo a bitšwago Mesia, goba Kriste. Mesia e be e tla ba setlogolo sa monna yo a botegago Aborahama. E be e tla ba mmuši yo a bego a tla dira gore batho ba kwago ba kgone go boelwa ke tšhegofatšo ya bophelo bjo bo phethagetšego bjo bo se nago malwetši. (Genesi 22:18; Jesaya 53:4, 5) Motho yo yo a Holofeditšwego o be a tla tšwa Betlelehema.—Bala Mika 5:2.

Jesu o ile a itlhatsela e le Mesia. Lebakeng la ka godimo ga nywagakgolo e šupago e sa le pele, Beibele e ile ya bolelela pele gore Mesia o be a tla belegwa ke kgarebe le gore o be a tla nyatšwa. O be a tla gafa bophelo bja gagwe bakeng sa dibe tša ba bantši, gomme o be a tla bolokwa le bahumi. (Jesaya 7:14; 53:3, 9, 12) Le gona, lebakeng la ka godimo ga nywagakgolo e mehlano, Beibele e boletše e sa le pele gore o be a tla tsena Jerusalema a nametše pokolo le gore o be a tla ekwa ka ditsekana tše 30 tša tšhelete ya silifera. Ditaba tšeo ka moka di ile tša phethagala.—Bala Sakaria 9:9; 11:12.

2. Na Modimo o bolelela dinako pele?

Lebakeng la ka godimo ga nywagakgolo e mehlano e sa le pele, Beibele e ile ya porofeta ka ngwaga o lebanyago woo Mesia a bego a tla tšwelela ka wona. Nako ya go ba go fihla ge a tšwelela e be e balelwa ka dibeke tša nywaga, e lego seo se bolelago gore “beke” e nngwe le e nngwe e be e tšea nywaga e šupago. Dibeke tšeo e be e tla ba tše 7 le tše 62, tšeo palomoka ya tšona e lego dibeke tše 69 tša nywaga. Dibeke tšeo di dira nywaga e 483. Nywaga yeo e thomile neng? Go ya ka Beibele, nako yeo e thomile ge mohlanka wa Modimo e lego Nehemia a be a fihla Jerusalema gomme a thoma go tsošološa motse. Histori ya Peresia e bontšha gore nako yeo ke ka 455 B.C.E. (Nehemia 2:1-5) Jesu o ile a kolobetšwa ya ba Mesia ka morago ga nywaga e 483, ka ngwaga wa 29 C.E., ka yona nako yeo.—Bala Daniele 9:25.

  3. Na diporofeto tša Beibele di a phethagala gona bjale?

Jesu o porofetile ka ditiragalo tše bohlokwa tša mehleng ya rena. Boporofeta bja gagwe bo bolela ka ditaba tše dibotse tša Mmušo wa Modimo, woo o tlago go tliša kimollo ya lefase ka moka bathong bao ba ratago Modimo. Mmušo o tla fediša tshepedišo ka moka e kgopo ya dilo yeo re phelago go yona.—Bala Mateo 24:14, 21, 22.

Diporofeto tša Beibele di hlalosa ka botlalo nako ya mafelelo ya tshepedišo ya gona bjale ya dilo. Beibele e hlalositše gore ka go se swane le seo se ka letelwago mehleng ya kgatelopele, batho ba be ba tla senya lefase. Mathata ao a bakwago ke dintwa, tlhaelelo ya dijo, ditšhišinyego tša lefase le mauba a malwetši a be a tla oketšega. (Luka 21:11; Kutollo 11:18) Ditekanyetšo tša boitshwaro di be di tla phuhlama. Mehleng ye e thata, balatedi ba Jesu ba be ba tla bolela ditaba tše dibotse tša Mmušo wa Modimo ditšhabeng ka moka.—Bala Mateo 24:3, 7, 8; 2 Timotheo 3:1-5.

4. Bokamoso bja batho e tla ba eng?

Modimo Ramatlaohle o boloketše batho ba botegago dilo tše dibotse. Jesu Kriste, yena Mesia, gotee le batlotšwa ba gagwe, ba tla buša lefase ba le legodimong. Ba bopa pušo ya Mmušo, yeo e tlago go buša nywaga e sekete. Bahu ba tla tsošwa gomme ba tla hwetša sebaka sa go ahlolelwa go bona ge e ba ba swanelwa ke bophelo bjo bo sa felego. Go oketša moo, Mmušo o tla fodiša motho yo mongwe le yo mongwe yo a tla bego a phela ka nako yeo. Bolwetši le lehu di ka se sa ba gona.—Bala Kutollo 5:10; 20:6, 12; 21:4, 5.

Bakeng sa tsebišo e oketšegilego, bona matlakala 23-25 le 197-201 a puku Ke Eng Seo ge e le Gabotse Beibele e se Rutago? yeo e bontšhitšwego mo.