Batamela Kgauswi le Modimo

“Dilo tša Pele di ka se sa Gopolwa”

MEGOPOLO e ka ba tšhegofatšo. Go gopola dinako tše thabišago re ena le baratiwa ba rena go ka re ruthetša dipelo. Eupša mabakeng a mangwe, megopolo e ka bonagala e le thogako. Na o tshwenywa ke megopolo e kwešago bohloko ya diphihlelo tše sa kgahlišego tša nakong e fetilego? Ge e ba go le bjalo, o ka ipotšiša gore, ‘Na megopolo ye yeo e nyamišago e tla ka ya tsoga e phumogile monaganong wa ka?’ Re hwetša karabo e kgothatšago kudu mantšung a begilwego ke moporofeta Jesaya.—Bala Jesaya 65:17.

Jehofa o rerile gore a fediše modu wa megopolo e kwešago bohloko. Bjang? Ka go fediša lefase le le kgopo gotee le tlaišego ya lona ka moka gomme la tšeelwa legato ke selo se kaone sa ka mo go sa felego. Jehofa ka Jesaya o holofetša gore: “Ke hlola magodimo a mafsa le lefase le lefsa.” Go kwešiša kholofetšo ye go ka tlatša dipelo tša rena ka kholofelo.

Magodimo a mafsa ke eng? Beibele e bolela dilo tše pedi tšeo di re thušago go hwetša karabo. Sa pele, kgopolo ya magodimo a mafsa e bolelwa ke bangwadi ba bangwe ba babedi ba Beibele, gomme mabakeng ao a mabedi mantšu ao a tswalanywa le diphetogo tše bohlokwa tša mo lefaseng. (2 Petro 3:13; Kutollo 21:1-4) Sa bobedi, ka Beibeleng lentšu “magodimo” le ka swantšhetša mmušo, goba pušo. (Jesaya 14:4, 12; Daniele 4:25, 26) Ka gona, magodimo a mafsa ke pušo e mpsha, yeo e nago le bokgoni bja go dira gore go be le maemo a go loka mo lefaseng. Go na le mmušo o tee feela wo o kgonago go dira seo ka moka—Mmušo wa Modimo, e lego pušo ya legodimong yeo Jesu a re rutilego go e rapelela. Mmušo woo o tla dira gore thato ya Modimo e lokilego e dirwe lefaseng ka bophara.—Mateo 6:9, 10.

Lefase le lefsa ke eng? Ela hloko ditherešo tše pedi tša Mangwalo tšeo di re thušago go fihlelela phetho e nepagetšego. Ya pele, ka Beibeleng lentšu “lefase” ka dinako tše dingwe le šupa go batho, e sego kgokolo ya lefase. (Psalme 96:1) Ya bobedi, Beibele e boletše e sa le pele gore ka tlase ga pušo ya Modimo, batho ba botegago ba tla ithuta go loka, moo go tlago go phatlalala lefaseng ka bophara. (Jesaya 26:9) Ka baka leo, lefase le lefsa le šupa go lekoko la batho bao ba tlago go ikokobeletša pušo ya Modimo le go phela ka ditekanyetšo tša gagwe tša go loka.

Na o kgona go bona kamoo Jehofa a tlago go fediša modu wa megopolo e kwešago bohloko ka gona? Go se go ye kae, Jehofa o tla phethagatša ka mo go feletšego kholofetšo ya gagwe ya magodimo a mafsa le lefase le lefsa, a hloma lefase le lefsa la go loka. * Lefaseng leo le lefsa, dibaki tša megopolo e kwešago bohloko—tlaišego ya mmele, monagano le ya maikwelo—e tla ba dilo tša nakong e fetilego. Batho ba botegago ba tla thabela bophelo ka mo go feletšego, e bile ba tla tšeela godimo megopolo e thabišago ya letšatši le lengwe le le lengwe le le fetago.

Lega go le bjalo, go thwe’ng ka bohloko bjoo bo ka bago bo imela dipelo tša rena gona bjale? Kholofetšo ya Jehofa ka Jesaya e tšwela pele ka gore: “Dilo tša pele di ka se sa gopolwa, e bile di ka se sa rotoga pelong.” Bohloko le ge e le bofe bjoo re ilego ra bo kwa lefaseng le la kgale bo tla fela ganyenyane-ganyenyane. Na tebelelo yeo e a go kgahla? Ge e ba go le bjalo, o re’ng o sa nyakišiše kamoo o ka batamelago go Modimo yoo a holofetšago bokamoso bjo bjalo le bjo bo phadimago?

Mmalo wa Beibele o šišintšwego bakeng sa March:

▪ Jesaya 63-66–Jeremia 1-16

[Mongwalo wa tlase]

[Ntlhakgolo go letlakala 19]

Jehofa o rerile go fediša modu wa megopolo e kwešago bohloko