“Ga se Karolo ya Lefase”

“Lefase le ba hloile, gobane bona ga se karolo ya lefase.”—JOHANE 17:14.

Seo go se Bolelago: Ka ge e be e se karolo ya lefase, Jesu o be a sa tšee lehlakore dintweng tša leago le tša dipolotiki tša mehleng ya gagwe. O hlalošitše gore: “Ge nkabe mmušo wa ka e be e le karolo ya lefase le, bahlanka ba ka ba ka be ba lwela gore ke se ke ka gafelwa Bajuda. Eupša ka mo go lego ka gona, mmušo wa ka ga o tšwe mono.” (Johane 18:36) Gape o ile a kgothaletša balatedi ba gagwe go gana mekgwa, polelo le boitshwaro tšeo di ganetšwago ke Lentšu la Modimo.—Mateo 20:25-27.

Kamoo Bakriste ba Pele ba Bontšhitšego se ka Gona: Go ya ka Mongwadi wa tša bodumedi Jonathan Dymond, Bakriste ba pele “ba ile ba gana go tsenela [ntwa]; go sa šetšwe gore ditlamorago tša seo e be e le dife, go sa šetšwe gore ba be ba gobošwa goba ba golegwa goba ba bolawa.” Ba ile ba kgetha go tlaišwa go e na le go kwanantšha go se tšee lehlakore ga bona. Tekanyetšo ya bona ya boitshwaro e ile ya ba arola lefaseng. Bakriste ba boditšwe gore: “Ba makatšwa ke ge le sa tšwele pele le kitima le bona, le kitimela tseleng e swanago ya kgobogo, ka gona ba le goboša ka mantšu.” (1 Petro 4:4) Radihistori Will Durant o ngwadile gore Bakriste ba be ba “tshwenya lefase le gafišwago ke maipshino la boheitene ka borapedi le bothakga bja bona.”

Ke Bomang ba Latelago Mohlala wo Lehono? Ge e bolela mabapi le go se tšee lehlakore ga Bakriste, New Catholic Encyclopedia e re: “Go gana go dira selo ka baka la letswalo go fošagetše.” Sehlogo se sengwe ka go Reformierte Presse se bolela gore pego ya African Rights, e lego mokgatlo wa ditshwanelo tša batho, e ile ya hlatsela gore dikereke ka moka di ile tša tšea karolo polaong ya molokwanarite ya kua Rwanda ka 1994 “ka ntle le Dihlatse tša Jehofa.”

Ge a ahlaahla Polao e Sehlogo ya Nazi, morutiši wa sekolo se phagamego o ile a lla ka gore “ga go sehlopha goba mokgatlo wa badudi woo o ilego wa bolela kgahlanong le maaka a tletšego, sehlogo le ditiro tše sehlogo tšeo di ilego tša tšwelela.” Ka morago ga go ikopanya le United States Holocaust Memorial Museum, o ngwadile gore: “Ga bjale ke hweditše karabo.” O lemogile gore Dihlatse tša Jehofa di ile tša ema di tiile ditumelong tša tšona go sa šetšwe go swarwa gampe.

Go thwe’ng ka tekanyetšo ya tšona ya boitshwaro? Makasine wa U.S. Catholic o re: “Bontši bja bafsa ba lehono bao ba tšwilego mahlalagading ba Makatholika ba ganetšana le dithuto tša kereke ditabeng tše di swanago le go dula gotee ga batho bao ba sa nyalanago [le] thobalano ya pele ga lenyalo.” Makasine wo o tsopola motiakone yo a boletšego gore: “Karolo e kgolo ya batho bao ke ba bonago—mohlomongwe e fetago 50 lekgolong—e tla go nyalana e šetše e dula gotee.” The New Encyclopædia Britannica e bolela gore Dihlatse tša Jehofa “di phegelela tekanyetšo e phagamego ya boitshwaro mekgweng ya motho ka noši.”