Ke Eng se se Fošagetšego ka go Dirišana le Meoya?

Go tloga bofseng, Barbara * o be a bona dipono, a ekwa mantšu e bile a kgodišegile gore o be a boledišana le metswalo ya gagwe yeo e hwilego. Yena le monna wa gagwe, Joachim, ba be ba bala dipuku tšeo di bolelago ka go dirišana le meoya gomme ba tloga ba kgona go bala dikarata tša bodupe. Tšona di ile tša ba bontšha gore ba be ba ka hwetša tšhelete e ntši kudu, e lego yeo ba ilego ba e hwetša kgwebong ya bona. Ka letšatši le lengwe, dikarata tšeo di ile tša ba lemoša gore batho ba kotsi ba be ba tla tla legaeng la bona gomme tša ba botša gore ba itšhireletše bjang.

GAEŠITA le ge go dumela tabeng ya go dirišana le meoya go ka bonagala go šiilwe ke nako, batho ba bantši kudu ba kgahlegela matla a phagametšego a tlhago. Batho lefaseng ka bophara ba nyaka go tseba bokamoso bja bona goba go itšhireletša bobeng ka go rwala dipheko, go diriša matlapa a Ouija le go ya go batho bao ba dirišanago le meoya e mebe. Sehlogong seo se rego “Khomphutha ya go Šikarwa le Lucifer,” makasine wa Sejeremane wa Focus o itše: “Inthanete e dira gore batho ba bantši ba nyake go tseba ka boloi.”

Na o be o tseba gore Beibele e bolela ka go dirišana le meoya? O ka makatšwa ke seo e se bolelago ka taba ye.

Seo Beibele e se Bolelago ka go Dirišana le Meoya

Molao woo Modimo a bego a o neile batho ba gagwe Isiraeleng ya bogologolo o be o re: “Go wena go se ke gwa hwetšwa . . . senoge, ramalea goba motho yo a dirišago dipheko goba moloi, goba yo a fošago ba bangwe ka meleko goba yo a dirišanago le meoya e mebe goba sedupe goba motho le ge e le ofe yo a botšišago dilo bahung. Ka gobane motho yo mongwe le yo mongwe yo a dirago dilo tše ke selo se se šišimišago go Jehofa.” (Doiteronomio 18:10-12) Ke ka baka la’ng ditiro tša go dirišana le meoya di be di ganetšwa ka matla gakaakaa?

Ka ge phihlelo yeo re thomilego ka yona e bontšha, batho ba bantši ba dumela gore batho ba phelago ba ka boledišana le bahu le gore tsebišo yeo e hwetšwago ka go dirišana le meoya e tšwa bahung. Ditumelo tše bjalo di theilwe go seo se rutwago ke madumedi a mantši—gore ge batho ba ehwa ba tšwela pele ba phela lefelong la moya. Eupša ka go fapana le thuto ye, Beibele e  bolela ka mo go kwagalago gore: “Ge e le bahu ga ba tsebe selo le gatee.” (Mmoledi 9:5) E hlalosa bahu ba le bjalo ka ge eka ba robetše boroko bjo bogolo, ba sa lemoge seo se diregago go bona le gatee. * (Mateo 9:18, 24; Johane 11:11-14) Ka baka leo, o ka botšiša gore, Re ka hlalosa bjang diphihlelo tšeo batho ba bago le tšona tša go dirišana le matla a phagametšego a tlhago? Poledišano e bjalo e tšwa kae?

Go Dirišana le Lefase la Meoya

Dipego tša Diebangedi di bontšha gore ge Jesu a be a le lefaseng, o ile a boledišana le meoya. Mareka 1:23, 24 e bega gore “moya o sa hlwekago” o ile wa botša Jesu gore: “Ke tseba gabotse gore o mang.” Ga go pelaelo gore meoya e tseba gore le wena o mang. Eupša na wena o tseba gore yona ke bomang?

Pele ga ge Modimo a ka bopa batho, o ile a bopa barwa ba bantši kudu ba moya, goba barongwa. (Jobo 38:4-7) Barongwa ba bopilwe ka tsela e phagametšego batho. (Baheberu 2:6, 7) Ke ba matla e bile ba bohlale kudu gomme ba bopetšwe go dira thato ya Modimo. Mopsalme o opetše ka gore: “Retang Jehofa lena barongwa ba gagwe bao ba nago le matla a magolo, lena bao le phethago lentšu la gagwe.”—Psalme 103:20.

Beibele e utolla gore ge nako e dutše e eya barongwa ba bangwe ba ile ba thoma go ikgokaganya le batho ba sa dumelelwa. Ka morero ofe? Morongwa wa pele yo a ilego a dira bjalo o ile a fora batho ba pele, Adama le Efa, gomme a ba aroša go Modimo le Mmopi wa bona. Ka go dira bjalo, o ile a iphetola Sathane Diabolo, mothomeletši le moganetši wa Modimo.—Genesi 3:1-6.

Ka morago, barongwa ba bangwe ba ile ba “[tlogela] bodulo bja bona bjo bo swanetšego” legodimong, ba ikapeša mebele ya batho gomme ba thoma go dula le basadi ba babotse mo lefaseng. (Juda 6; Genesi 6:1, 2) Barongwa bao ba marabele le bana ba bona bao e bego e le motswako wa batho le barongwa ba ile ba tšhošetša batho o šoro moo e lego gore lefase le ile la ‘tlala bošoro.’ Mohlomongwe o tseba pego ya Beibele yeo e bolelago kamoo Modimo a ilego a fediša moloko woo o šoro le o kgopo ka Meetsefula a mehleng ya Noa.—Genesi 6:3, 4, 11-13.

Meetsefula a ile a gapeletša barongwa bao gore ba apole mebele ya nama gomme ba boele lefelong la moya. Eupša Mmopi ga se a ka a ba dumelela gore ba boele ‘bodulong bja bona’ bja mathomong. Go e na le moo, ba ile ba lahlelwa boemong bja go kokobetšwa bjo bo swantšhwago le ‘melete ya leswiswi la kgampi.’ (2 Petro 2:4, 5) Beibele e bitša barongwa ba marabele gore ke “batemona.” (Jakobo 2:19) Ke bona ba hlohleletšago go dirišana le meoya.

Seo Batemona ba se Nyakago

Morero wa pele wa meoya e kgopo yeo e boledišanago le batho ke go ba aroša borapeding bja Modimo wa therešo, Jehofa. Dimpho goba matla ao batho ba bantši bao ba dirišanago le meoya ba bolelago gore ba na le ona e fo ba ditšhitišo tša go šitiša batho go hwetša tsebo e nepagetšego ka Modimo le go aga tswalano le yena.

Morero wa bobedi wa batemona o ka bonwa go seo Sathane, moetapele wa bona, a ilego a leka go se dira ka Jesu. Sathane o ile a holofetša Jesu “mebušo ka moka ya lefase le letago la yona.” Sathane o be a nyaka gore Jesu a mo direle’ng? O ile a mo kgothaletša ka gore: ‘Wela fase o nthapele gatee.’ Ee, Sathane le batemona ba nyaka go rapelwa. Eupša Jesu o ile a gana  kgopolo ya go tlogela Modimo le borapedi bja therešo.—Mateo 4:8-10.

Ke ka sewelo meoya e kgopo e dirago dikholofetšo tše bjalo tše lebanyago lehono. Go e na le moo, e tanya batho bao ba sa lemogego ka dilo tšeo di bonalago di se kotsi tša go ba aroša, tše bjalo ka dikgwele tša magakabje, matlakala a teye, dikarata tša bodupe, di-pendulum le di-horoscope. O se ke wa forwa ke mekgwa e bjalo! Ga se ditsela tša tlhago tša go ikgokaganya le lefase leo le sa tsebjego. Meoya e kgopo e diriša go nyaka go tseba ka go dirišana le meoya go goketša le go tanya batho ka morero wa go ba aroša gore ba se rapele Jehofa. Ge seo se sa phethe morero wa yona, meoya e kgopo gantši e tlaiša bao ba tanywago moreong wa yona le go ba šulafaletša bophelo. Ge e ba o ile wa diragalelwa ke seo, o ka dira’ng gore o itokolle tutuetšong ya yona?

Kamoo o ka Itokollago go Dirišaneng le Meoya

O se ke wa forwa, meoya yeo e boledišanago le batho ke manaba a Modimo, ao a tlago go fedišwa. (Juda 6) Ke baikgakanyi le baaketši bao ba itirago bahu. O be o ka ikwa bjang ge o be o ka lemoga gore motho yo o rego ke mogwera wa gago ke moikgakanyi, yo a tshwenyegilego feela ka go go aroša dilong tše di go holago? O be o tla arabela bjang ge o be o ka lemoga gore ka go se tsebe o be o dirile segwera Inthaneteng le motho yo a gobošago ba bangwe ka thobalano? Go ikgokaganya le batemona go kotsi le go feta. O swanetše go dira sohle seo o ka se kgonago go itokolla go bona. O ka dira’ng?

Ka morago ga go ithuta seo Mangwalo a se rutago ka go dirišana le meoya, badudi ba bangwe ba Efeso ya bogologolo ba ile ba bona go nyakega ga gore ba senye dipuku tša bona tša malea, gaešita le ge di be di bitša kudu. Ba ile ba “di fiša pele ga mang le mang.” (Ditiro 19:19, 20) Lehono dilo tšeo di tswalanago le go dirišana le meoya di akaretša dipuku, dipheko, matlapa a Ouija le dilo tše dingwe tše di swanago le tšona, eupša gape go na le tsebišo e tšwago mekerong ya elektroniki. Furalela selo le ge e le sefe seo se bonagalago se bula tsela ya go dirišana le meoya.

Gopola banyalani bao go boletšwego ka bona mathomong a sehlogo se. Ka go bala dikarata tša bona tša bodupe ba ile ba phetha ka gore go be go tla tla batho ba kotsi legaeng la bona eupša ba se ke ba ba theetša goba ba amogela selo le ge e le sefe go bona. Lega go le bjalo, ge Connie le Gudrun, Dihlatse tše pedi tša Jehofa, ba fihla mojakong wa bona gomme ba bolela gore ba tlišitše ditaba tše dibotse ka Modimo, Joachim le Barbara ba ile ba phetha ka gore ba tla theetša. Poledišano ya bona e ile ya fihla tabeng ya go dirišana le meoya, gomme Connie le Gudrun ba ile ba ba nea tsebišo e nepagetšego ka yona e tšwago Mangwalong. Go ile gwa thoma poledišano ya ka mehla ya Beibele.

Go se go ye kae Joachim le Barbara ba ile ba phetha ka go itokolla dikgokaganong tša bona ka moka le batemona. Dihlatse di ile tša hlalosa gore go ka direga gore meoya e se ke ya thabišwa ke seo. Ge e le gabotse, Joachim le Barbara ba ile ba tlaišega gomme ba hlaselwa ke batemona ka tsela e tšhošago. Go ile gwa tšea nakwana ba boifa bošegong bjo bongwe le bjo bongwe go fihlela ba imollwa ke go hudugela ntlong e nngwe. Tlaišegong ya bona ka moka, banyalani ba ba ile ba dula ba kgolwa mantšu a Bafilipi 4:13 a rego: “Dilong tšohle ke na le matla ka baka la yo a mphago matla.” Jehofa o ile a šegofatša boikemišetšo bja bona, gomme mafelelong meoya e ile ya kgaotša go ba tlaiša. Lehono Joachim le Barbara ke barapedi ba thabilego ba Modimo wa therešo, Jehofa.

Mangwalo a kgothaletša bohle bao ba nyakago go šegofatšwa ke Jehofa gore: “Ikokobeletšeng Modimo; eupša le ganetše Diabolo, yena o tla le tšhaba. Batamelang Modimo gomme o tla le batamela.” (Jakobo 4:7, 8) Ge e ba o nyaka, Jehofa Modimo a ka kgona e bile o tla go thuša go itokolla tutuetšong ya batemona. Ge ba lebelela morago go itokolleng ga bona go dirišaneng le meoya, Joachim le Barbara ba dumelelana ka pelo ka moka le mantšu a Psalme 121:2 a rego: “Thušo ya ka e tšwa go Jehofa.”

[Mengwalo ya tlase]

[Ntlhakgolo go letlakala 21]

Mekgwa ya go dirišana le meoya e palediša batho go ba le tswalano e botse le Modimo

[Ntlhakgolo go letlakala 22]

“Batamelang Modimo gomme o tla le batamela.”—JAKOBO 4:8