‘Le Ratane’

“Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba ka, ge e ba le ratana.”—JOHANE 13:34, 35.

Seo go se Bolelago: Kriste o boditše balatedi ba gagwe gore ba ratane ka tsela yeo a ba ratilego ka yona. Jesu o ba ratile ka tsela efe? O ratile batho go sa šetšwe dipono tša kgethollo ya semorafo le ya bong tšeo di bego di atile mehleng ya gagwe. (Johane 4:7-10) Lerato le ile la tutueletša Jesu go gafa nako ya gagwe, matla le boiketlo e le gore a thuše ba bangwe. (Mareka 6:30-34) Mafelelong, Kriste o ile a bontšha lerato ka tsela e di fetago tšohle. O itše: “Ke nna modiši yo boleta; modiši yo boleta o gafa moya wa gagwe ka baka la dinku.”—Johane 10:11.

Kamoo Bakriste ba Pele ba Bontšhitšego se ka Gona: Lekgolong la pele la nywaga, Bakriste ba be ba bitšana “ngwanabo rena” goba “kgaetšedi.” (Filemone 1, 2) Batho ba ditšhaba ka moka ba be ba amogelwa ka phuthegong ya Bokriste, ka gobane ba be ba dumela gore “ga go na phapano magareng ga Mojuda le Mogerika, ka ge go na le Morena o tee go bohle.” (Baroma 10:11, 12) Ka morago ga Pentekoste ya 33 C.E., barutiwa kua Jerusalema ba ile “ba rekiša maruo a bona le dithoto ba abela bohle ditseno, go ya ka dinyakwa tša motho yo mongwe le yo mongwe.” Ka morero ofe? E le gore bao ba sa tšwago go kolobetšwa ba ka dula Jerusalema le go tšwela pele “ba ikgafela thutong ya baapostola.” (Ditiro 2:41-45) Ditiro tše bjalo di be di tutuetšwa ke eng? Nywaga ya ka tlase ga e 200 ka morago ga lehu la baapostola, Tertullian o ile a tsopola seo ba bangwe ba se boletšego ka Bakriste gore: “Bona kamoo ba ratanago ka gona . . . kamoo ba ikemišeditšego gaešita le go hwelana.”

Ke Bomang ba Latelago Mohlala wo Lehono? Puku ya The History of the Decline and Fall of the Roman Empire (1837) e boletše gore ka nywagakgolo bao ba bego ba ipolela gore ke Bakriste “ba ile ba swarana ka sehlogo kudu, go feta kamoo ba ilego ba swarwa ke [bao ba sa dumelego].” Nyakišišo ya morago bjale ya United States e hweditše gore bao ba ipolelago gore ke batho ba bodumedi—bao bontši bja bona ba rego ke Bakriste—ba na le kgethollo ya semorafo. Batho ba tsenago kereke nageng e nngwe gantši ga ba kwane le ba mokgatlo o swanago wa bodumedi ba nageng e nngwe gomme ka go re’alo ga ba kgone goba ba gana go thuša badumedigotee le bona ge ba nyaka thušo.

Ka 2004, ka morago ga gore Florida e hlaselwe ke madimo a mane a latelanago ka dikgwedi tše pedi, modulasetulo wa Komiti ya Ditshepedišo tša Boemo bja Tšhoganyetšo ya Florida o ile a kgonthišetša gore dilo tša bona di be di dirišwa ka tshwanelo. O boletše gore ga go na sehlopha se sengwe seo se bego se ena le thulaganyo go feta Dihlatse tša Jehofa, gomme o ile a ithaopela go nea Dihlatse dilo le ge e le dife tšeo di bego di di nyaka. Pejana, ka 1997, sehlopha sa tlhakodišo sa Dihlatse tša Jehofa se ile sa ya Democratic Republic of Congo se swere dihlare, dijo le diaparo bakeng sa go yo thuša bana babo tšona ba Bakriste bao ba bego ba nyaka thušo. Dihlatsegotee le tšona tša kua Yuropa di ile tša neela ka dilo tšeo di bego di lekana le tšhelete e ka bago R7 980 000.