Sehlogo se se ahlaahla dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Lehu la Jesu le swanetše go gopolwa bjang?

Jesu o boditše barutiwa ba gagwe gore ba gopole lehu la gagwe ka dijo tša seswantšhetšo, ba diriše senkgwa le beine. Senkgwa se swantšhetša mmele wa Jesu gomme beine e swantšhetša madi a gagwe.—Bala Luka 22:19, 20.

Senkgwa seo Jesu a se dirišitšego se be se sa omelwa, goba se se na komelo. Ka Beibeleng, komelo gantši e swantšhetša sebe. Ka gona, senkgwa se be se swantšhetša gabotse mmele wa Jesu o phethagetšego. O neetše mmele wa gagwe e le sehlabelo, seo se fedišitšego dihlabelo tša diphoofolo tša Molaong wa Moše. (Baheberu 10:5, 9, 10) Beine e be e swantšhetša madi a bohlokwa a Jesu ao a tšholotšwego e le sehlabelo bakeng sa dibe tša rena.—Bala 1 Petro 1:19; 2:24; 3:18.

2. Re swanetše go gopola lehu la Jesu neng?

Jesu o hwile ka Paseka, ya Nisani 14. Letšatši la Sejuda le thoma ge letšatši le sobela. Mantšiboeng a pele ga ge a ka hwa, Jesu o ile a ja sejo sa Paseka a ena le baapostola ba gagwe, ke moka a hloma sejo se sefsa sa segopotšo bakeng sa go gopola lehu la gagwe.—Bala Luka 22:14, 15.

Lehono, batho ba Modimo ba gopola seo Modimo a se neilego ka Jesu bakeng sa go lokolla lefase ka moka sebeng le lehung. (Ekisodo 12:5-7, 13, 17) Go fo swana le ge Paseka e be e gopolwa gatee ka ngwaga, Segopotšo sa lehu la Jesu le sona se swarwa gatee ka ngwaga ka morago ga ge letšatši le sobetše ka Nisani 14 go ya ka almanaka ya Beibele ya mosepelo wa ngwedi.—Bala Johane 1:29.

  3. Ke bomang bao ba swanetšego go ja senkgwa le go nwa beine?

Ge Jesu a be a nea balatedi ba gagwe beine, o itše: “Senwelo se se bolela kgwerano e mpsha.” (1 Bakorinthe 11:25) Kgwerano e mpsha e tšeetše kgwerano ya Molao wa Moshe legato, yeo go yona Modimo a bego a holofeditše Baisiraele gore ge ba be ba mo kwa e le ruri, ba be ba tla ba batho ba gagwe. (Ekisodo 19:5, 6) Lega go le bjalo, Isiraele ga se ya ka ya kwa lentšu la Modimo. Ka gona, Jehofa o ile a dira kgwerano e mpsha.—Bala Jeremia 31:31.

Ka kgwerano ye e mpsha, Jehofa o dira gore batho ba bantši ba bulegelwe ke sebaka sa go hwetša ditšhegofatšo a diriša ba sego kae. Bao ba lego kgweranong ke ba sego kae, ke ba 144 000 feela. Ka bona, batho ba dimilione ba tšwago ditšhabeng ka moka ba tla šegofatšwa ka bophelo bjo bo sa felego lefaseng la paradeise. Ba bangwe bao ba lego kgweranong e mpsha ba hlankela Jehofa lefaseng lehono. Ke bona feela bao ba swanetšego go ja senkgwa le go nwa beine ka gobane senwelo “se bolela kgwerano e mpsha.”—Bala Luka 12:32; Kutollo 14:1, 3.

4. Segopotšo se re hola bjang?

Segopotšo sa ngwaga le ngwaga sa lehu la Jesu se dira gore tebogo ya rena ka lerato la Jehofa le le sa lekanywego e be e tseneletšego. O rometše Morwa wa gagwe gore a hwele dibe tša rena. Ka baka leo, ge re eba gona Segopotšong, re swanetše go naganišiša ka seo lehu la Jesu le se bolelago go rena. Re swanetše go ela hloko kamoo re ka bontšhago tebogo ya rena bakeng sa seo Jehofa le Jesu ba re diretšego sona.—Bala Johane 3:16; 2 Bakorinthe 5:14, 15.

Bakeng sa tsebišo e oketšegilego, bona matlakala 206-208 a puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.