Na o kile wa hlankela Jehofa? Na o ile wa nagana ka go mo hlankela gape eupša wa ipotšiša ge e ba a tla go amogela gape? Hle bala sehlogo se ka kelohloko gotee le seo se latelago. Di ngwadilwe go nagannwe ka wena.

“KE ILE ka rapela Jehofa gore a ntumelele gore ke boe gae gomme a ntebalele ge ke ile ka mo kweša bohloko.” Ke kamoo go boletšego mosadi yo mongwe yo a bego a tlogetše tsela ya Bokriste yeo a bego a godišitšwe ka yona. Na wena o mo kwela bohloko? Na o ipotšiša gore: ‘Na Modimo o ikwa bjang ka bao ba kilego ba mo hlankela? Na o a ba gopola? Na o nyaka gore ba “boe gae”?’ Bakeng sa go araba dipotšišo tšeo, anke re hlahlobeng mantšu ao a ngwadilwego ke Jeremia. Ga go pelaelo gore dikarabo di tla go thabiša.—Bala Jeremia 31:18-20.

Ela hloko gore boemo e be e le bofe ge Jeremia a be a ngwala mantšu a. Ka 740 B.C.E., nywagasome pele ga mehla ya Jeremia, Jehofa o ile a dumelela gore badudi ba mmušong wa Isiraele wa meloko e lesome ba išwe bothopša ke Baasiria. * Modimo o ile a dumelela masetlapelo a e le tayo ka gobane batho ba gagwe ba be ba thomile go dira dibe tše dikgolo, ba hlokomologa ditemošo tšeo baporofeta ba bego ba di nea leboelela. (2 Dikgoši 17:5-18) Na batho ba ile ba fetošwa ke mathata ao a ba wetšego ge ba le bothopša, ba arogane le Modimo wa bona e bile ba le kgole le naga ya gabo bona? Na Jehofa o be a ba lebetše ka mo go feletšego? Na o be a tla ka a ba amogela gape?

“Ke ile ka Itshola”

Batho ba ile ba hlaphogelwa ge ba le bothopša gomme ba itshola. Jehofa o ile a lemoga boitsholo bja bona bjo bo tšwago pelong. Theetša ge Jehofa a hlalosa boemo bja kgopolo le maikwelo a Baisiraele bao ba bego ba le bothopša, bao ka moka ba bitšwago Efuraime.

Jehofa o re: “Ke kwele Efuraime a itelela.” (Temana 18) O ile a kwa ge Baisiraele ba be ba llišwa ke ditlamorago tša tsela ya bona ya sebe. Seithuti se sengwe se re polelwana e rego “a itelela” e ka bolela “go šišinyega.” Ba be ba swana le morwa yo a arogilego tseleng yo a bontšhago go nyama kudu ka go šišinya hlogo ge a dutše a nagana ka mathata ao a ipaketšego ona gomme a gopotše bophelo bjoo a kilego a bo phela ge a sa le gae. (Luka 15:11-17) Batho ba be ba re’ng?

“O mphošolotše . . . go etša namane yeo e sego ya tlwaetšwa.” (Temana 18) Batho ba ile ba lemoga gore ba be ba swanelwa ke go newa tayo. Go ba gona, ba be ba ile ba swana le namane yeo e sego ya tlwaetšwa. Puku e nngwe ya ditšhupetšo e re papišo ye e ka bolela gore ba be ba ile ba swana le namane yeo le ka mohla e bego e ka se “hlabje ke seotledi ge nkabe e se ya thoma ka go gana go tsenywa jokong.”

“Ntshokolle, gomme ke tla sokologa ka bolokologi, ka gobane o Jehofa Modimo wa ka.” (Temana 18) Ka dipelo tšeo di ikokobeditšego, batho ba ile ba bitša Modimo. Ba be ba timetše tseleng ya sebe,  eupša bjale ba be ba lopa Modimo gore a ba thuše gore ba hwetše tsela ya go amogelwa ke yena gape. Phetolelo e nngwe e re: “O Modimo wa rena—hle re dumelele re boe gae.”—Contemporary English Version.

“Ke ile ka itshola . . . ka hlabja ke dihlong, ka ba ka kwa ke inyatša.” (Temana 19) Batho ba be ba itshola ka gobane ba be ba dirile sebe. Ba ile ba dumela ge ba solwa gomme ba amogela molato wa bona. Go le bjalo ka ge eka ba ipetha sehuba, ba ile ba ba ba ikwa ba hlabja ke dihlong e bile ba inyatša.—Luka 15:18, 19, 21.

Baisiraele ba be ba itshola. Ba ile ba nyama kudu, ba ipobola dibe tša bona go Modimo gomme ba furalela ditsela tša bona tše mpe. Na go itshola ga bona go be go tla dira gore Modimo a ba kwele bohloko? Na o be a tla ba dumelela ba boa gae?

“Ke tla mo Šokela e le Ruri”

Jehofa o be a rata Baisiraele ka mo go kgethegilego. O itše: “Ke Tatago Isiraele; ge e le Efuraime, yena ke leitšibulo la ka.” (Jeremia 31:9) Tate yo lerato o be a ka gana bjang go amogela gape morwa yoo a itsholago ka pelo ka moka? Ela hloko kamoo Jehofa a bontšhago kamoo a ikwago ka gona ka batho ba gagwe bjalo ka Tate.

“Na Efuraime ga se morwa wa ka yo bohlokwa goba ngwana yo ke mo swarago ka lerato? Ka gobane tsela yeo ke mo solago ka yona ke yona yeo ruri ke tlago go mo gopola ka yona go ya pele.” (Temana 20) Mantšu ao a kgoma pelo gakaakang! Go swana le motswadi yo a tiišago seatla eupša e le yo lerato, Modimo o ile a gapeletšega go ‘sola’ bana ba gagwe, a ba lemoša leboelela ka ditsela tša bona tša sebe. Ge ka kgang ba be ba gana go kwa, o ile a ba tlogela ba ya bothopša—ge e le gabotse, a dira gore ba tloge gae. Eupša le ge a ile a swanelwa ke go ba otla, ga se a ka a ba lebala. O be a ka se ba lebale le ka mohla. Tate yo lerato ga a lebale bana ba gagwe. Lega go le bjalo, Jehofa o ile a ikwa bjang ge a be a bona bana ba gagwe ba itshola ka pelo ka moka?

“Mala a ka a huduegilego ka baka la gagwe. * Ke tla mo šokela e le ruri.” (Temana 20) Jehofa o ile a hlologela bana ba gagwe kudu. Boitsholo bja bona bja go tšwa pelong bo ile bja mo kgoma kudu, gomme o ile a hlologela e le ruri gore ba boele go yena. Go swana le tate wa seswantšhong sa Jesu sa morwa wa lehlaswa, Jehofa o ile a “šokela” bana ba gagwe a ba a ikemišetša go ba amogela gape gae.—Luka 15:20.

“Jehofa Ntumelele ke Boe Gae!”

Mantšu a lego go Jeremia 31:18-20 a dira gore re lemoge lešoko le legolo la Jehofa le kgaugelo ya gagwe. Modimo ga a lebale bao ba kilego ba mo hlankela. Go thwe’ng ge e ba batho bao ba nyaka go boela go yena? Modimo o “ikemišeditše go lebalela.” (Psalme 86:5) Le ka mohla a ka se furalele bao ba tlago go yena ba itshola pelong. (Psalme 51:17) Go fapana le seo, o thabela go ba amogela gape gae.—Luka 15:22-24.

Mosadi yo go boletšwego ka yena mathomong o ile a gata mogato wa go boela go Jehofa gomme a etela phuthegong ya lefelong la gabo ya Dihlatse tša Jehofa. O ile a swanelwa ke go thoma ka go fenya maikwelo a gagwe a fošagetšego. O gopola ka gore: “Ke be ke tloga ke ikwa ke sa swanelege.” Eupša bagolo ba phuthego ba ile ba mo kgothatša le go mo thuša gore a matlafale gape moyeng. A bolela ka pelo e tletšego tebogo, o re: “Ke thabile kudu gakaakang gore Jehofa o ntumeletše ke boa gae!”

Ge e ba o kile wa hlankela Jehofa gomme o naganne ka go mo hlankela gape, re go laletša gore o ye phuthegong ya lefelong la geno ya Dihlatse tša Jehofa. Gopola gore Jehofa o arabela ka lešoko le kgaugelo ge bao ba itsholago ba mo goeletša ba re: “Hle re dumelele re boe gae.”

Mmalo wa Beibele o šišintšwego bakeng sa April:

▪ Jeremia 17–31

[Mengwalo ya ka tlase]