Poledišano le Moagišani—Na Jesu ke Modimo?

DIHLATSE TŠA JEHOFA di thabela go ahlaahla Beibele le baagišani ba tšona. Na go na le taba e itšego ya Beibele yeo e lego kgale o ipotšiša yona? Na o ipotšiša dipotšišo mabapi le ditumelo goba ditiro le ge e le dife tša bodumedi tša Dihlatse tša Jehofa? Ge e ba go le bjalo, o se ke wa dikadika go bolela ka taba yeo nakong e tlago ge o kopana le Hlatse. E tla thabela go boledišana le wena ka ditaba tše bjalo.

Se se latelago ke mohuta wa poledišano yeo Dihlatse tša Jehofa di ka bago le yona le moagišani. A re tšeeng gore Hlatse yeo e bitšwago Karen e etetše legaeng la mosadi yo a bitšwago Samantha.

Na ke Therešo Gore ga le Dumele go Jesu?

Samantha: Moruti wa rena o re Dihlatse tša Jehofa ga di dumele go Jesu. Na ke therešo?

Karen: E re ke go kgonthišetše gore re dumela go Jesu. Ge e le gabotse, re kgolwa gore go dumela go Jesu go a nyakega e le gore re phološwe.

Samantha: Le nna ke dumela seo.

Karen: Ka gona, se ke seo nna le wena re swanago ka sona. Go ba gona, leina la ka ke Karen. Nka thabela go tseba wena?

Samantha: Ke nna Samantha. Ke thabela go go tseba.

Karen: Le nna ke thabela go go tseba, Samantha. O ka ipotšiša gore, ‘Ge e ba Dihlatse tša Jehofa di dumela go Jesu e le ka kgonthe, ke ka baka la’ng batho ba re ga di dumele go yena?’

Samantha: Ee, ke nyaka go tseba seo.

Karen: Samantha, ka boripana, tumelo ya rena go Jesu e tiile kudu, eupša ga re dumele dilo ka moka tšeo batho ba di bolelago ka yena.

Samantha: Na o ka mpha mohlala wa seo?

Karen: Ee. Batho ba bangwe ba re Jesu e be e fo ba motho yo a lokilego. Eupša ga re dumelelane le kgopolo yeo.

Samantha: Le nna ga ke dumelelane le yona.

Karen: Ka gona, seo ke selo seo nna le wena re swanago ka sona. Mohlala wa bobedi ke wa gore Dihlatse tša Jehofa ga di dumelelane le dithuto tšeo di thulanago le seo Jesu a se boletšego ka boyena mabapi le tswalano ya gagwe le Tate.

Samantha: O ra gore’ng?

Karen: Madumedi a mantši a ruta gore Jesu ke Modimo. Mohlomongwe le wena o rutilwe sona seo.

Samantha: Go bjalo, moruti wa rena o re Modimo le Jesu ke motho o tee.

Karen: Lega go le bjalo, na o ka dumela gore tsela e kaonekaone ya go ithuta therešo ka Jesu ke ka go hlahloba seo a se boletšego ka yena?

Samantha: Ee, nka dumelelana le seo.

Jesu o Boletše Eng?

Karen: A re ele hloko temana ya Beibele yeo e re thušago go kwešiša taba ye. Hle, ela hloko seo re se balago go Johane 6:38. Jesu o itše: “Ke theogile legodimong, e sego go tlo dira thato ya ka, eupša go dira thato ya yo a nthomilego.” Ka gona, mantšu ao a be a tla makatša ge nkabe Jesu e be e le Modimo.

Samantha: O ra gore’ng?

Karen: Go ba gona, ela hloko gore Jesu o itše o  be a se a theoga legodimong go tlo dira thato ya gagwe.

Samantha: O nepile, o itše o tletše go tlo dira thato ya Yo a mo romilego.

Karen: Eupša ge e ba Jesu e le Modimo, ke mang yo a mo romilego go tšwa legodimong? Le gona, ke ka baka la’ng Jesu a ile a dira thato ya Yena yoo?

Samantha: Ke thoma go kwešiša seo o se bolelago. Eupša ga ke nagane gore temana ye e tee e hlatsela gore Jesu ga se Modimo.

Karen: Ka gona, ela hloko seo Jesu a se boletšego lebakeng le lengwe. O boletše se se swanago kgaolong e latelago ya Johane. Ke kgopela gore o bale Johane 7:16.

Samantha: Go lokile. “Ke moka Jesu ge a ba araba a re: ‘Seo ke se rutago ga se sa ka, eupša ke sa yo a nthomilego.’”

Karen: Ke a leboga, Samantha. Go ya ka temana ye, na Jesu o be a ruta dikgopolo tša gagwe?

Samantha: Aowa, o itše dithuto tša gagwe di tšwa go Yo a mo romilego.

Karen: O nepile. Le gona, re ka ipotšiša gore: ‘Jesu o be a romilwe ke mang? E bile ke mang yo a mo neilego ditherešo tšeo a bego a di ruta?’ Na Yena yoo o be a ka se fete Jesu ka bogolo? Go ba gona, motho o rongwa ke yoo a mo fetago ka bogolo.

Samantha: Seo se a kgahliša. Ga se ka ka ka bala ditemana tšeo peleng.

Karen: Le gona, ela hloko mantšu a Jesu a lego go Johane 14:28, a re: “Le kwele gore ke itše go lena, ke a tloga gomme ke tla boa go lena. Ge e ba le be le nthata, le be le tla thabela gore ke ya go Tate, gobane Tate o mpheta ka bogolo.” Go ya ka temana ye, o ka re Jesu o be a ipona a le maemong afe ge a ipapetša le Tate?

Samantha: Go ba gona, o boletše gore Tate o mo feta ka bogolo. Ka gona, ke nagana gore o be a bona Modimo e le yo mogolo go yena.

Karen: O opile kgomo lenaka. Mohlala o mongwe šo; ela hloko seo Jesu a se boditšego barutiwa ba gagwe bjalo ka ge se begilwe go Mateo 28:18. Temana yeo e re: “Ke neilwe matla ka moka legodimong le lefaseng.” Bjale, na Jesu o boletše gore ke kgale a ena le matla ka moka?

Samantha: Aowa, o itše o be a a filwe.

Karen: Eupša ge e ba Jesu e le Modimo, o be a tla fiwa matla a oketšegilego bjang? Le gona, ke mang yo a mo filego ona?

Samantha: Ke tla nagana ka taba yeo.

O be a Bolela le Mang?

Karen: Go na le selo se sengwe seo se ka makatšago ge nkabe Jesu e be e le Modimo e le ka kgonthe.

Samantha: Ke’ng sona seo?

Karen: Ke seo re se balago mabapi le kolobetšo ya Jesu. Ela hloko pego yeo e lego go Luka 3:21, 22. Ke kgopela gore o bale ditemana tšeo?

Samantha: “Bjale ge batho ka moka ba kolobetšwa, Jesu le yena a kolobetšwa. Ge a dutše a rapela, legodimo la bulega ke moka moya o mokgethwa wa theogela go yena o le ka sebopego sa mmele o swanago le wa leeba gomme lentšu la tšwa legodimong le re: ‘O Morwa wa ka, morategi; ke go amogetše.’”

Karen: Na o lemogile seo Jesu a bego a se dira ge a be a kolobetšwa?

Samantha: O be a rapela.

Karen: Ee. Ke therešo gore re ka ipotšiša gore, ‘Ge e ba Jesu e le Modimo, o be a rapela mang?’

Samantha: Yeo ke potšišo e botse. Ke swanetše go e botšiša moruti wa rena.

Karen: Re sa le gona fao, ela hloko gore ka morago ga ge Jesu a rotogile meetseng, motho yo mongwe o ile a bolela go tšwa legodimong. Na o lemogile seo A se boletšego?

Samantha: O boletše gore Jesu e be e le Morwa wa Gagwe, gore O be a mo rata le gore O be a mo amogela.

Karen: O nepile. Eupša ge e ba Jesu e le Modimo, ke mang yo a boletšego dilo tšeo a le legodimong?

Samantha: Ga se ka ka ka nagana ka taba yeo peleng.

Ke ka Baka la Eng ba Bolelwa e le “Tate” le “Morwa”?

Karen: Selo se sengwe seo re ka se elago hloko se se: Re badile gore Jesu o boletše ka Modimo a re ke Tatagwe wa legodimong. Gomme ge Jesu a  be a kolobetšwa, lentšu le le tšwago legodimong le boletše ka Jesu e le Morwa wa Gagwe. Ge e le gabotse, Jesu o ipiditše ka go lebanya gore ke Morwa wa Modimo. Bjale, ge e ba o be o nyaka go nthuta ka batho ba babedi bao ba lekanago, ke tswalano efe ya lapa yeo o bego o ka e diriša go bontšha ntlha ye?

Samantha: Ke be nka diriša ya bana ba motho.

Karen: Ee—mohlomongwe o be o ka diriša gaešita le mafahla a swanago. Eupša Jesu o boletše ka Modimo e le Tate gomme yena e le Morwa. Ka baka leo, o nagana gore Jesu o be a fetiša molaetša ofe?

Samantha: Ke kwešiša seo o se bolelago. Jesu o hlalosa motho yo mongwe e le yo mogolo le yo a nago le matla go feta yo mongwe.

Karen: O nepile. Nagana ka se: O kgonne go nagana ka papišo e swanetšego ya batho ba lekanago, ya bana ba motho goba mafahla. Ge e ba Jesu ruri e be e le Modimo, na ga o nagane gore Jesu, bjalo ka Morutiši yo Mogolo, nkabe a ile a nagana ka papišo e swanago—goba gaešita le mohlala wo o kwagalago kudu wa batho ba lekanago?

Samantha: Go bjalo.

Karen: Eupša, go e na le moo, o dirišitše mantšu “Tate” le “Morwa” go hlalosa tswalano ya gagwe le Modimo.

Samantha: O rotošitše ntlha yeo e kgahlišago.

Balatedi ba Jesu ba Peleng ba Boletše Eng?

Karen: Pele ke sepela, nka thabela go ahlaahla karolo e nngwe ya taba ye le wena, ge e ba o sa na le nako.

Samantha: Ee, ke sa na le metsotso e mmalwa.

Karen: Ge nkabe Jesu ruri e be e le Modimo, na o be o ka se letele gore barutiwa ba Jesu ba bolele ka go lebanya gore ke Modimo?

Samantha: Seo se a kwagala.

Karen: Lega go le bjalo, ga go moo re balago gona ka Mangwalong gore ba ile ba ruta seo. Go e na le moo, ela hloko seo yo mongwe wa balatedi ba Jesu ba peleng, e lego moapostola Paulo, a se ngwadilego. Go Bafilipi 2:9, o hlalosa seo Modimo a se dirilego ka morago ga lehu la Jesu le tsogo ya gagwe: “Modimo o mo phagamišeditše boemong bja godimo gomme ka botho a mo nea leina leo le lego ka godimo ga leina le ge e le lefe le lengwe.” Go ya ka temana ye, Modimo o diretše Jesu eng?

Samantha: E re Modimo o mo phagamišeditše boemong bja godimo.

Karen: Ee. Eupša ge nkabe Jesu a be a lekana le Modimo pele a ka hwa gomme ka morago Modimo a mo phagamišetša boemong bja godimo, na seo se be se ka se dire gore Jesu a phagamele Modimo? Motho le ge e le ofe o be a ka phagamela Modimo bjang?

Samantha: Ga go yo a ka mo phagamelago. Seo ga se kgonege.

Karen: Ke dumelelana le wena. Ka gona, go ya ka bohlatse bjo ka moka, na o ka bolela gore Beibele e ruta gore Jesu ke Modimo?

Samantha: Aowa, ga go bonagale e ruta seo. Beibele e re ke Morwa wa Modimo.

Karen: O nepile. Bjale Samantha, e re ke go kgonthišetše gore Dihlatse tša Jehofa di tšeela Jesu godimo kudu. Re dumela gore lehu la gagwe bjalo ka Mesia yo a holofeditšwego le butše tsela ya go phološa batho ka moka ba botegago.

Samantha: Le nna ke dumela seo.

Karen: Bjale o ka ipotšiša gore, ‘Re ka bontšha Jesu bjang gore re leboga gore o gafile bophelo bja gagwe bakeng sa rena?’ *

Samantha: Ke ile ka ipotšiša potšišo yeo.

Karen: Mohlomongwe nka boa gomme ka ahlaahla le wena karabo e tšwago Beibeleng. Na o tla ba o le gona ka yona nako ye bekeng e tlago?

Samantha: Ee, ke tla ba ke le gona.

Karen: Go lokile, ke tla go bona bekeng e tlago.

[Mongwalo wa ka tlase]