Bakriste ba Swanetše go Dira Eng Lehono?

BAKRISTE ba therešo ga ba tšee karolo dipolitiking. Ka baka la’ng? Ka gobane ba latela mohlala wa Jesu. O ipoletše ka gore: ‘Ga ke karolo ya lefase.’ O boletše mabapi le balatedi ba gagwe gore: ‘Ga le karolo ya lefase.’ (Johane 15:19; 17:14) Ela hloko mabaka ao a dirago gore Bakriste ba se akaretšwe dipolitiking.

1. Bokgoni bja batho bo lekanyeditšwe. Beibele e bega gore batho ga ba na bokgoni goba tshwanelo ya go ipuša. Moporofeta Jeremia o ngwadile gore: “Ga go matleng a motho yo a sepelago gore a laole dikgato tša gagwe.”—Jeremia 10:23.

Bjalo ka ge batho ba be ba sa bopelwa gore ba kgone go fofa, e bile ga se ba bopelwa go ipuša ka katlego. Ge a bolela ka go fokola ga mmušo, radihistori David Fromkin o itše: “Mebušo e bopša ke batho; ka gona e a palelwa e bile ditebelelo tša yona ga di kgonthišege. E na le matla a itšego, eupša ke a lekanyeditšwego.” (The Question of Government) Ga go makatše ge Beibele e re lemoša gore re se bote batho!—Psalme 146:3.

2. Madira a kgopo a moya ga bjale a na le tutuetšo. Jesu ga se a ka a gana gore Diabolo o be a ena le matla a go mo nea mebušo ka moka ya lefase, ge Sathane a be a mo holofetša bobuši bja lefase. Ge e le gabotse, lebakeng le lengwe ka morago, Jesu o ile a bitša Sathane gore ke “mmuši wa lefase.” Nywaga e itšego ka morago, moapostola Paulo o hlalositše Sathane e le “modimo wa lefase le.” (Johane 14:30; 2 Bakorinthe 4:4) Paulo o ile a ngwalela Bakristegotee le yena gore: “Re lwa le . . . babuši ba lefase ba leswiswi le gotee le madira a kgopo a moya legodimong.” (Baefeso 6:12) Batho ka kakaretšo ga ba tsebe gore madira a kgopo a moya ke ona babuši ba kgonthe ba lefase le. Taba yeo e swanetše go tutuetša pono ya rena ka dipolitiki bjang?

Nagana ka papišo ye: Bjalo ka ge diketswana di gapša ke maphoto a matla a lewatle, ditshepedišo tša batho tša dipolitiki le tšona di gogwa ke madira a matla le a kgopo a moya. Bjalo ka ge basesiši ba diketswana tšeo ba ka se kgone go  fetoša maphoto ao a matla, boradipolitiki le bona ba ka se kgone go fetoša tutuetšo e matla ya madira a kgopo a moya. Madira ao a ikemišeditše go senya batho ka mo go feletšego le go baka ‘madimabe lefaseng.’ (Kutollo 12:12) Ka go re’alo, phetogo ya kgonthe e ka tlišwa feela ke motho yo a nago le matla a fetago a Sathane le batemona ba gagwe. Motho yoo ke Jehofa Modimo.—Psalme 83:18; Jeremia 10:7, 10.

3. Bakriste ba therešo ba bota mmušo wa Modimo feela. Jesu le barutiwa ba gagwe ba be ba tseba gore ka nako e beilwego, Modimo o tla hloma pušo legodimong yeo e tlago go buša lefase ka moka. Beibele e bitša pušo ye gore ke Mmušo wa Modimo gomme e utolla gore Jesu Kriste o kgethilwe gore e be Kgoši ya wona. (Kutollo 11:15) Ka ge Mmušo woo o kgoma batho ka moka, Jesu o dirile gore “ditaba tše dibotse tša Mmušo wa Modimo” e be sehlogo se segolo sa dithuto tša gagwe. (Luka 4:43) Gape o rutile barutiwa ba gagwe go rapela ka gore: “Mmušo wa gago a o tle.” Ka baka la’ng? Ka gobane ka tlase ga Mmušo woo, thato ya Modimo e tla dirwa legodimong le lefaseng.—Mateo 6:9, 10.

Ka gona, go tla direga’ng ka dipušo tša batho? Beibele e araba ka gore dipušo “tša lefase ka moka” di tla fedišwa. (Kutollo 16:14; 19:19-21) Go a kwagala gore motho a se thekge ditshepedišo tša dipolitiki ge e ba a dumela e le ka kgonthe gore Mmušo wa Modimo o kgauswi le go fediša ditshepedišo ka moka tša dipolitiki tšeo di dirilwego ke batho. Go ba gona, ge e ba a ka leka go thekga dipušo tša batho tšeo di ahloletšwego phedišo, ge e le gabotse o tla ba a ema kgahlanong le Modimo.

Ka ge Bakriste ba therešo ba sa tšee karolo dipolitiking, na se se ra gore ga ba na kgahlego ya go leka go kaonefatša ditšhaba tša gabo bona? Ela hloko karabo yeo e newago sehlogong se se latelago.

[Ntlhakgolo go letlakala 7]

Dihlatse tša Jehofa di swaregile ka go thekga Mmušo wa Modimo, e sego mpshafatšo ya dipolitiki