Ithute Lentšung la Modimo

Ditaba tše Dibotse ka Bodumedi ke Dife?

Sehlogo se se ahlaahla dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di thabela go ahlaahla dikarabo tše le wena.

1. Na madumedi ka moka a lokile?

Dihlopha tše dintši tša bodumedi di na le batho ba botegago bao ba nyakago go kgahla Modimo. Modimo o bona batho ba bjalo gomme o tshwenyega ka bona. Lega go le bjalo, ka manyami batho ba bangwe ba dirišitše bodumedi bakeng sa merero e mebe. Nakong e fetilego, baetapele ba bodumedi ba ile ba ba ba tlaiša baganetši ba bona. (2 Bakorinthe 4:3, 4; 11:13-15) Lehono, go ya ka dipego tša ditaba, baetapele ba bangwe ba bodumedi ba kgothaleditše botšhošetši goba ba thekgile dintwa, goba ba akareditšwe go swarweng ga bana gampe.—Bala Mateo 24:3-5, 11, 12.

Beibele e ruta gore go na le mehuta e mebedi ya bodumedi—bodumedi bja therešo le bodumedi bja maaka. Bodumedi bja maaka ga bo rute therešo ka Modimo. Lega go le bjalo, Jehofa Modimo o nyaka gore batho ba tsebe therešo ka yena.—Bala 1 Timotheo 2:3-5.

2. Ditaba tše dibotse ka bodumedi ke dife?

Modimo ga a nyake gore batho ba forwe ke madumedi ao a ipolelago gore a a mo rata eupša a sa rute therešo ka yena. Ge e le gabotse, bakgomaredi ba madumedi ao ba rata go ba bagwera ba lefase leo le laolwago ke Sathane Diabolo. (Jakobo 4:4; 1 Johane 5:19) Lentšu la Modimo le hlalosa madumedi ao a botago mebušo ya batho go e na le go bota Modimo gore a swana le mogweba-ka-mmele. Beibele e bitša seotswa se ka leina la “Babilona o Mogolo,” se reeletšwe ka motse wa bogologolo woo bodumedi bja maaka bo thomilego go wona ka morago ga Meetsefula a mehleng ya Noa. Kgauswinyane, Modimo o tla fediša gateetee bodumedi bjoo bo forago batho le go ba gatelela.—Bala Kutollo 17:1, 2, 5, 17; 18:8, 23, 24.

  3. Modimo o tla tliša lethabo lefaseng ka moka bjang?

Kahlolo yeo e tlelago bodumedi bja maaka ke ditaba tše dibotse. E tla imolla lefase ka moka kgatelelong. Le ka mohla madumedi a maaka a ka se sa timetša le go aroganya batho. Batho bohle bao ba phelago e tla ba batee borapeding bja Modimo a nnoši wa therešo.—Bala Jesaya 11:9; Kutollo 18:20, 21; 21:3, 4.

4. Batho ba botegago ba swanetše go dira eng?

Jehofa ga se a lebala batho ba botegago bao ba gašanego madumeding a maaka lefaseng ka bophara. Ga bjale o kgoboketša batho ba bjalo gore e be batee ka go ba ruta therešo.—Bala Mika 4:2, 5.

Jehofa o amogela bao ba nyakago go mo hlankela lapeng la gagwe. Gaešita le ge bagwera ba rena le ba leloko ba sa thabe ge re thoma go hlankela Jehofa, re putswa kudu. Re putswa ka go ba bagwera ba Modimo, ka seo go ka thwego ke lapa le lefsa le le nago le lerato gotee le ka kholofelo ya go phela ka mo go sa felego.—Bala Mareka 10:29, 30; 2 Bakorinthe 6:17, 18.

Bakeng sa tsebišo e oketšegilego, bona dikgaolo 15 le 16 tša puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

[Mothopo wa Seswantšho go letlakala 16]

The Complete Encyclopedia of Illustration/​J. G. Heck