Dithuto tša Bokriste di Kgoma Ditšhaba Bjang?

DIHLOGO tše di fetilego di ahlaahlile lebaka leo ka lona Bakriste ba kgonthe ba sa tšeego karolo dipolitiking. Lega go le bjalo, Bakriste ba ka bontšha bjang gore ba kgahlegela go kaonefatša ditšhaba tša gabo bona? Tsela e nngwe ke ka go latela taelo ya Jesu e rego: “Ka gona, eyang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona.”—Mateo 28:19, 20.

Go na le kgokagano magareng ga go latela taelo ya Jesu ya ‘go dira barutiwa’ le go phetha taelo ya go ba letswai le seetša lefaseng. (Mateo 5:13, 14) Go na le kgokagano efe? Le gona modiro woo o ka kgoma batho bjang?

Molaetša wa Kriste o a Phološa le go Sedimoša

Letswai ke sethibela-go-bola. Ka mo go swanago, molaetša woo Jesu a laetšego balatedi ba gagwe go o iša go batho ditšhabeng ka moka o kgona go phološa. Bao ba amogelago le go diriša dithuto tša Jesu ba itšhireletša go phuhlameng ga boitshwaro moo go atilego lehono. Ka tsela efe? Ba ithuta kamoo ba ka phemago mekgwa yeo e ka gobatšago maemo a tša maphelo, e bjalo ka go kgoga, gomme ba hlagolela dika tše bjalo ka lerato, khutšo, go se felo pelo, botho le toko. (Bagalatia 5:22, 23) Dika tše bjalo di ba dira gore e be batho ba nago le mohola setšhabeng. Bakriste bao ba botšago baagišani ba bona molaetša wo woo o phološago ba dira modiro o bohlokwa kudu ditšhabeng tša gabo bona.

 Go thwe’ng ka papišo ya seetša? Bjalo ka ge ngwedi o bonagatša seetša se se tšwago letšatšing, balatedi ba Kriste le bona ba bonagatša “seetša” se se tšwago go Jehofa Modimo. Ba bonagatša seetša se seo se tšwago go Jehofa ka go tšea karolo modirong wa boboledi le ka mediro e mebotse yeo ba e dirago.—1 Petro 2:12.

Jesu o bontšhitše go swana mo go lego gona magareng ga go ba seetša le go ba morutiwa ka gore: “Batho ba tšhuma lebone ba le bea godimo ga sehlomapone, e sego tlase ga seroto, la bonegela ka moka bao ba lego ka ntlong. Ka mo go swanago seetša sa lena a se bonege pele ga batho.” Lebone leo le tukago ge le beilwe godimo ga sehlomapone le bonagala go batho bohle. Ka mo swanago, mediro ya boboledi le mediro e mengwe e mebotse yeo e dirwago ke Bakriste ba therešo e swanetše go bonagala go bao ba dulago le bona. Ka baka la’ng? Jesu o itše bao ba bonago mediro yeo e mebotse ba tla tagafatša Modimo, e sego Bakriste.—Mateo 5:14-16.

Boikarabelo bja Mohlakanelwa

Ge Jesu a be a re, “Lena le seetša sa lefase” le gore “seetša sa lena a se bonege,” o be a bolela le barutiwa ba gagwe ka moka. Taelo ya Jesu e ka se phethwe ke batho ba sego kae bao ba gašanego madumeding a fapafapanego. Go e na le moo, badumedi ka moka ke “seetša.” Dihlatse tša Jehofa tše dimilione tše šupa, tšeo di dulago dinageng tša ka godimo ga tše 235, di dumela gore boikarabelo bja tšona bja mohlakanelwa ke go etela baagišani ba tšona le go ba botša molaetša woo Kriste a nyakago gore balatedi ba gagwe ba o bolele.

Sehlogo sa molaetša wa Dihlatse tša Jehofa ke sefe? Ge Jesu a be a nea taelo ya go bolela, ga se a ka a laela balatedi ba gagwe gore ba bolele ka dimpshafatšo tša dipolitiki goba tša leago, go kopanywa ga Kereke le Mmušo, goba kgopolo le ge e le efe ya lefase. Go e na le moo, o boletše e sa le pele gore: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle.” (Mateo 24:14) Ka go re’alo, ka go kwa ditaelo tša Jesu, Bakriste ba therešo ba tšwela pele go bolela le baagišani ba bona ka Mmušo wa Modimo—pušo e nnoši yeo e ka kgonago go fediša tshepedišo e kgopo ya Sathane le go tliša lefase le lefsa la toko.

Ge e le gabotse, ge re bala dipego tša Diebangedi, re lemoga dintlha tše pedi tše bohlokwa ka bodiredi bja Jesu tšeo di kgomago mediro ya Bakriste ba therešo lehono. Di tla ahlaahlwa sehlogong se se latelago.

[Ntlhakgolo go letlakala 8]

Molaetša wa Bokriste o swana le letswai bjang?

[Ntlhakgolo go letlakala 9]

Molaetša wa Kriste o swana le lebone leswiswing ka tsela efe?