Jesu o be a Lebelela Dipolitiki Bjang?

BANGWADI ba Diebangedi ba hlalosa ditiragalo tše mmalwa tša bodiredi bja Jesu tšeo di dirilego gore a lebeletšane ka go lebanya le dipolotiki. Ka mohlala, kapejana ka morago ga gore Jesu a kolobetšwe a ena le nywaga e ka bago e 30, Diabolo o ile a mo holofetša boemo bja go ba mmuši wa lefase. Ka morago bodireding bja gagwe, lešaba le be le nyaka go mo dira kgoši ya lona. Ka morago gape, batho ba ile ba leka go mo dira motho yo a fišegelago dipolitiki. Jesu o ile a arabela bjang? Anke re eleng hloko ditiragalo tše.

Mmuši wa lefase. Diebangedi di bega gore Diabolo o ile a holofetša Jesu bobuši bja “mebušo ka moka ya lefase.” Akanya kamoo Jesu a ka bago a diretše batho ba tlaišegago dilo tše dintši tše dibotse ka gona ge nkabe a ile a tšea boemo bja go ba mmuši wa lefase! Ke motho ofe yo a sekametšego dipolitiking yo a tlogago a tshwenyegile ka katlego ya batho yoo a bego a ka gana boemo bjoo? Eupša Jesu o ile a bo gana.—Mateo 4:8-11.

Kgoši. Batho ba bantši bao ba phetšego mehleng ya Jesu ba be ba hloka mmuši yo a bego a tla rarolla mathata a bona a tša boiphedišo le a tša dipolitiki. Ba kgahlilwe ke bokgoni bja Jesu, batho ba be ba nyaka gore Jesu a tsenele dipolitiki. O ile a arabela bjang? Mongwadi wa Ebangedi Johane o bega gore: “Jesu ka go tseba gore ba be ba le kgauswi le go tlo mo swara gore ba mo dire kgoši, a buša a tloga a ya thabeng a nnoši.” (Johane 6:10-15) Go molaleng gore Jesu o ile a gana go tšea karolo dipolitiking.

Motho yo a fišegelago dipolitiki. Ela hloko seo se diragetšego matšatši pele Jesu a bolawa. Barutiwa ba Bafarisei, bao ba bego ba thabela go se laolwe ke Mmušo wa Roma, ba tladitšwe ke balatedi ba Heroda, ditho tša mokgatlo wa dipolitiki woo o bego o thekga Roma, ba ile ba ya go Jesu. Ba be ba nyaka go mo gapeletša gore a tšee lehlakore dipolitiking. Ba ile ba botšiša ge e ba go swanetše gore Bajuda ba lefe lekgetho go Roma.

 Mareka o begile ka karabelo ya Jesu ge a re: “‘Le ntekela’ng? Ntlišetšeng tenariase ke e bone.’ Ba e tliša. Ke moka a re go bona: ‘Seswantšho se le mongwalokgwaro wo ke tša mang?’ Ba re go yena: ‘Ke tša Kesara.’ Ke moka Jesu a re: ‘Neang Kesara tša Kesara eupša Modimo le mo nee tša Modimo.’” (Mareka 12:13-17) Ge e bolela lebaka la karabo ya Jesu, puku ya Church and State—The Story of Two Kingdoms e phetha ka gore: “O ile a gana go ba mesia wa dipolitiki gomme ka kelohloko a thea mellwane magareng ga Kesara le Modimo.”

Ga se gore Kriste o be a se na taba le mathata a bjalo ka tlala, bomenetša le go hloka toka. Ge e le gabotse, Beibele e bontšha gore o ile a kgongwa kudu ke boemo bjo bo šokišago bja batho bao ba bego ba mo dikologile. (Mareka 6:33, 34) Go dutše go le bjalo, Jesu ga se a ka a thoma lesolo la go fediša go hloka toka lefaseng, gaešita le ge ba bangwe ba lekile ka thata go dira gore a tsenele dingangišanong tša mehleng yeo.

Bjalo ka ge mehlala ye e bontšha, go molaleng gore Jesu o ile a gana go akaretšwa ditabeng tša dipolitiki. Eupša go thwe’ng ka Bakriste lehono? Ba swanetše go dira’ng?