Kamoo Motho e ka Bago Modumedi yo a Botegago le Modudi yo a Nago le Boikarabelo

BODIREDI bja Jesu bo be bo lemogwa ka dilo dife tše pedi? Sa pele, Jesu o be a nyaka go fetoša dipelo tša batho, e sego mekgatlo ya dipolitiki. Ka mohlala, ela hloko seo Jesu a se gateletšego Thutong ya gagwe ya Thabeng. Pele ga ge a ka bolela ka go nyakega ga go ba letswai le seetša, o ile a botša batheetši ba gagwe gore lethabo la kgonthe le hwetšwa ke bao ba “lemogago gore ba nyaka dilo tša moya.” O ile a oketša ka gore: “Go thaba ba moya o boleta, . . . ba sekilego pelong, . . . [le] badirakhutšo.” (Mateo 5:1-11) Jesu o ile a thuša balatedi ba gagwe go bona bohlokwa bja go dumelelanya monagano le maikwelo a bona le ditekanyetšo tša Modimo tša mabapi le botse le bobe gotee le bohlokwa bja go hlankela Modimo ka pelo ka moka.

Sa bobedi, ge Jesu a be a bona tlaišego ya batho, go kwela ga gagwe batho bohloko go ile gwa mo tutueletša go fokotša manyami a bona. Lega go le bjalo, morero wa gagwe e be e se go fediša tlaišego ka moka. (Mateo 20:30-34) Gaešita le ge a ile a fodiša batho bao ba babjago, malwetši a ile a dula a le gona. (Luka 6:17-19) O ile a imolla bao ba gateletšwego, eupša go hloka toka go ile gwa tšwela pele go tlaiša batho. O ile a fepa bao ba swerwego ke tlala, eupša ditlala di ile tša tšwela pele di tlaiša batho.—Mareka 6:41-44.

Go Fetoša Dipelo le go Fokotša Tlaišego

Ke ka baka la’ng Jesu a ile a lebiša tlhokomelo go fetošeng dipelo le go fokotšeng tlaišego eupša e sego go fetošeng mekgatlo goba go fedišeng mathata? Jesu o be a tseba gore Modimo o be a rerile go diriša Mmušo wa Gagwe nakong e tlago bakeng sa go fediša mebušo ka moka ya batho le go fediša dibaki tša tlaišego. (Luka 4:43; 8:1) Ka gona, lebakeng le lengwe ge barutiwa ba be ba kgothaletša Jesu go fetša nako e oketšegilego a fodiša bao ba babjago, Jesu o ile a ba botša gore: “A re yeng go gongwe, metseng yeo e lego kgauswi, gore ke yo bolela le moo gobane ke tletše wona morero wo.” (Mareka 1:32-38) Jesu o ile a fokotša go tlaišega ga bona mmeleng, eupša o ile a lebiša tlhokomelo kudu go boleleng le go ruteng lentšu la Modimo.

Dihlatse tša Jehofa di katanela go ekiša Jesu modirong wa tšona wa boboledi lehono. Di tutueletšega go fokotša tlaišego ka go thuša bao ba nyakago thušo. Eupša Dihlatse ga di katanele go fediša go hloka toka ga lefase. Di dumela gore Mmušo wa Modimo o tla fediša dibaki tša tlaišego ka moka. (Mateo 6:10) Go swana le Jesu, di katanela go fetoša dipelo e sego mekgatlo ya dipolitiki. Tiro e bjalo e a kwagala ka gobane mathata a magolo a batho ke a boitshwaro e sego a dipolitiki.

Badudi ba Nago le Boikarabelo

Ka nako e swanago, Dihlatse tša Jehofa di dumela gore boikarabelo bja tšona bja Bokriste ke gore e be badudi ba babotse. Ke ka baka leo di hlomphago matla a mmušo a taolo. Di diriša dikgatišo tša tšona modirong wa tšona wa go nea bohlatse go kgothaletša baagišani ba tšona go kwa molao. Lega go le bjalo, ge mmušo o nyaka gore di dire seo se lego kgahlanong le ditaelo tša Modimo, Dihlatse ga di dumelelane le seo. Di re: “Modimo ke mmuši yo re swanetšego go mo kwa go e na le go kwa batho.”—Ditiro 5:29; Baroma 13:1-7.

Dihlatse tša Jehofa di etela magagabo tšona  ka moka e le gore di ba nee thuto e sa lefelelwego ya Beibele. Ka baka la thuto ye, go fetotšwe dipelo tša ba dimilione. Ngwaga o mongwe le o mongwe, batho ba dikete tše makgolo ba thušwa go tlogela mekgwa e gobatšago e bjalo ka go kgoga, botagwa, go dirišwa gampe ga dihlaretagi, go petšha le go itshwara ka tsela e gobogilego ka tša thobalano. Ba fetogile badudi ba itshwarago gabotse ka gobane ba ithutile go diriša melao ya motheo ya Beibele maphelong a bona.—Bona sehlogo se se rego “Beibele e Fetoša Maphelo,” go letlakala 18 la makasine wo.

Go tlaleletša moo, thuto ya Beibele e thuša ditho tša malapa go hlomphana kudu le go kaonefatša mokgwa wa poledišano—magareng ga banyalani le magareng ga batswadi le bana gotee le magareng ga bana ka bobona. Tše ke dilo tšeo di matlafatšago ditswalano tša malapa. Ka baka leo, malapa a tiilego a feleletša ka go ba le ditšhaba tše matla.

Ka morago ga go boeletša dintlha tšeo di ahlaahlilwego dihlogong tše, o nagana’ng: Na Beibele e dumelelana le bohle bao ba tswakago bodumedi le dipolitiki? Karabo e molaleng; ga e dumelelane le bona. Na Bakriste ba therešo e swanetše go ba badudi ba nago le boikarabelo? Ee, ba swanetše. Ba ka dira bjang seo? Ka go latela taelo ya Jesu ya go ba bjalo ka letswai le seetša lefaseng.

Bao ba katanelago go diriša ditaelo tše tše šomago tša Kriste ba tla hola bona gotee le malapa a bona—go akaretša le ditšhaba tša gabo bona. Dihlatse tša Jehofa tša lefelong la geno di tla thabela go go nea tsebišo e oketšegilego mabapi le lenaneo la thuto ya Beibele leo ga bjale le swarwago lefelong la geno. *

[Mongwalo wa ka tlase]

[Ntlhakgolo go letlakala 10]

Jesu o be a nyaka go fetoša dipelo, e sego mekgatlo ya dipolitiki

[Ntlhakgolo go letlakala 11]

Dihlatse tša Jehofa di dumela gore boikarabelo bja tšona ke gore e be badudi ba babotse