Na o be o Tseba?

‘Sedulo sa kahlolo’ seo Paulo a ilego a išwa go sona e be e le eng?

▪ Pego e lego go Ditiro 18:12, 13 e bolela gore Bajuda ba Korinthe ba ile ba latofatša Paulo ka gore o be a sokolla batho a se a dumelelwa ke molao le gore ba ile ba mo iša “sedulong sa kahlolo,” goba beʹma (lentšu la Segerika leo le rago gore “serepudi”). Korinthe ya bogologolo e be e ena le sethala se se phagamego sa ka ntle kgauswi le bogare bja mmaraka woo o ka bago o be o le kgauswi le sinagoge ka dikgato tše sego kae feela. Moo sethala se se bego se le gona go be go dira gore se kgone go dirišetšwa go nea batho tsebišo. Sethala se se be se agilwe ka mmabole wa mmala o motalalerata le bošweu gomme se kgabišitšwe ka diswantšho tše di kgwarilwego, e bile se diretšwe diphapoši tša go leta tšeo di bego di ena le dipanka tša mmabole le lebato la mebalabala.

Go bonagala sethala se e le sedulo sa kahlolo seo moapostola Paulo a ilego a išwa go sona pele ga molaodi wa selete Gallio, e lego mmušiši wa Moroma wa Akaya. Ge ba le moo, bahlankedi bao ba dutšego ba be ba theetša melato le go tsebiša lešaba le le kgobokanego diphetho tša bona tša kahlolo.

Go be go tlwaelegile metseng e megolo ya Gerika gore go swarwe lekgotla pele ga beʹma e bjalo, yeo go bego go swaraganwa le ditaba tša setšhaba go yona. Dipegong tša tšona tša mabapi le tsheko ya Jesu, dingwalwa tša Segerika tša Mateo 27:19 le Johane 19:13 di bolela ka Pontio Pilato a nea lešaba tsebišo a le godimo ga beʹma ya gagwe.—Ditiro 12:21.

Ke ka baka la eng Bajuda ba bangwe ba be ba kgopišwa ke tsela yeo Jesu a hwilego ka yona?

▪ Moapostola Paulo o boletše mabapi le Bakriste ba peleng gore: “Re bolela ka Kriste yo a kokotetšwego koteng gomme seo go Bajuda ke kgopišo eupša go ditšhaba ke bošilo.” (1 Bakorinthe 1:23) Ke ka baka la’ng tsela yeo Jesu a hwilego ka yona e be e ka kgopiša batho ba bangwe?

Mohlalosi wa Beibele Ben Witherington III o bolela mabapi le tsela yeo Jesu a hwilego ka yona le setšo sa batho bao ba bego ba phela Bohlabela bja ba Magareng lekgolong la pele la nywaga gore e be e le “tsela e hlabišago dihlong kudu ya go hwa lefaseng leo. E be e sa lebelelwe e le mokgwa o hlomphegago wa go hwela tumelo.” Witherington o tšwela pele ka gore: “Batho ba lefaseng leo ba be ba dumela gore tsela yeo o hwago ka yona e be e tloga e utolla semelo sa gago. Ka baka leo, Jesu o be a lebelelwa e le sehwirihwiri, monna yo a nago le molato wa go lwantšha mmušo, le motho yo a bego a swanelwa ke go bolawa go swana le makgoba a marabele.” Ge go elwa hloko setšo seo, go bonagala go sa kwagale go bolela gore Bakriste ba peleng ba ile ba itlhamela dipego tša mabapi le lehu la Jesu le tsogo ya gagwe.