Beibele e Fetoša Maphelo

KE’NG seo se thušitšego mosadi wa kua Philippines gore a kgaotše go diriša bjala gampe le go kaonefatša bophelo bja lapa la gagwe? Ke ka baka la’ng motho yo a fišegelago karate wa kua Australia a ile a ba mmoledi wa ditaba tše dibotse? Bala seo batho ba ba se bolelago.

“Go Ntšere Nako go Dira Diphetogo.”—CARMEN ALEGRE

NGWAGA WA MATSWALO: 1949

NAGA: PHILIPPINES

BOPHELO BJA PELE E EBA MOKRISTE: MOTHO YO A NWAGO KUDU

BOPHELO BJA KA BJA NAKONG E FETILEGO: Ke belegetšwe San Fernando, motsana o lego profenseng ya Camarines Sur. Lega go le bjalo, ke feditše karolo e kgolo ya bophelo bja ka ke le motho yo mogolo ke dula Antipolo, Profense ya Rizal. Ka ge o le tikologong ya dithabeng yeo e nago le bjang bjo bontši le dihlare tše dintši, Antipolo e be e le motsana o homotšego ge ke sa tšwa go hudugela go wona. Ke ka sewelo ke bego ke bona motho a sepela bošego. Lega go le bjalo, ga bjale Antipolo ke motse o mogolo o nago le batho a bantši.

Ka morago ga nako e itšego ke hudugetše Antipolo, ke ile ka kopana le monna yo a bitšwago Benjamin, gomme ge nako e dutše e eya re ile ra nyalana. Ke ile ka hwetša bophelo bja lenyalo bo le thata kudu go feta kamoo ke bego ke lebeletše ka gona. Ke ile ka thoma go nwa kudu e le ge ke leka go efoga mathata a ka. Ke ile ka ba motho wa manganga, e lego seo se bego se bonagala tseleng yeo ke bego ke swara monna wa ka le bana ba ka ka yona. Ke be ke sa kgone go itshwara e bile ke fela pelo ge ke dirišana le bona. Ke be ke sa hlomphe monna wa ka. Go molaleng gore bophelo bja lapa la rena bo be bo sa kgahliše.

KAMOO BEIBELE E FETOTŠEGO BOPHELO BJA KA: Kgaetšedi ya monna wa ka, e lego Editha, ke yo mongwe wa Dihlatse tša Jehofa, gomme o ile a šišinya gore nna le Benjamin re ithute Beibele le Dihlatse. Re ile ra dumela, re holofetše gore go ithuta go tla thuša go kaonefatša bophelo bja lapa la rena.

Ge re dutše re ithuta Beibele, re ile ra ithuta ditherešo tše dintši tše dibotse. Mantšu a Kutollo 21:4 a ile a nkgoma kudu. Temana yeo ge e bolela ka bao ba tlago go phela paradeiseng ya lefaseng ya nakong e tlago ka tlase ga Mmušo wa Modimo, e re Modimo “o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” Ke be ke nyaka go ba yo mongwe wa batho bao ba bego ba tla thabela ditšhegofatšo tšeo.

Ke ile ka thoma go lemoga gore ke be ke swanetše go dira diphetogo tše dikgolo ponong ya ka ka dilo gotee le mekgweng ya ka. Go ntšere nako go dira diphetogo tšeo, eupša mafelelong ke ile ka kgona go kgaotša go diriša bjala gampe. Le gona ke ile ka ithuta go ba botho le go se fele pelo ge ke dirišana le ba lapa la ka. Go oketša moo, ke ile ka  ithuta go hlompha monna wa ka le go swarišana le yena ge a dutše a etelela pele ka lapeng.

Ge nna le Benjamin re be re thoma go ya dibokeng tša Dihlatse tša Jehofa, re ile ra kgahlwa kudu ke seo re se bonego. Dihlatse ga di petšhe, ga di nwe ka mo go feteletšego e bile ga di bebe sefahlego. Di swara motho yo mongwe le yo mongwe ka seriti le ka tlhompho. Re ile ra kgodišega gore re be re hweditše bodumedi bja therešo.—Johane 13:34, 35.

KAMOO KE ILEGO KA HOLEGA KA GONA: Bophelo bja lapa la rena bo kaonafetše kudu. Nna le Benjamin re thabile lenyalong la rena e bile re thabela go ruta ba bangwe Beibele. Barwa ba rena ba babedi bao ba godilego gotee le basadi ba bona le bona ba thomile go ithuta Beibele. Re holofela gore ge nako e dutše e eya ba tla hlankela Jehofa gotee le rena. Ye ruri ke tsela e di phalago tšohle ya bophelo.

“Ke be ke Ikwa go se na yo a ka Mphenyago.”—MICHAEL BLUNSDEN

NGWAGA WA MATSWALO: 1967

NAGA: AUSTRALIA

BOPHELO BJA PELE E EBA MOKRISTE: MOTHO YO A FIŠEGELAGO KARATE

BOPHELO BJA KA BJA NAKONG E FETILEGO: Ke goletše Albury, e lego motse o mobotse le o atlegilego wa New South Wales. Le wona o na le bosenyi bja wona go swana le metse e mengwe e mentši. Lega go le bjalo, ka kakaretšo Albury e tsebja e le lefelo le le šireletšegilego leo go ka dulwago go lona.

Ke godišitšwe gabotse. Gaešita le ge batswadi ba ka ba ile ba hlalana ge ke be ke ena le nywaga e šupago, ba ile ba kgonthišetša gore nna, barwarre ba ka ba babedi le dikgaetšedi tša ka tše pedi le ka mohla ga re hloke selo. Ke ile ka hwetša thuto ya maemo a godimo, ke tsena sekolong sa maemo a godimo seo e sego sa mmušo sa tikologong. Tate o be a nyaka gore ke be rakgwebo ge ke feditše sekolo. Lega go le bjalo, ke be ke kgahlegela dipapadi kudu ka ge ke be ke ena le bokgoni bjo bogolo bja go ragela paesekele le bja karate. Ke ile ka feleletša ke hweditše mošomo lefelong la go lokiša dikoloi, woo o bego o mpha nako e oketšegilego ya go diriša matla a ka dipapading.

Ke be ke ikgantšha ka go ipoloka ke phetše gabotse mmeleng. Ka dinako tše dingwe, ke be ke ikwa go se na yo a ka mphenyago. Go be go le bonolo gore nka tshwenya ba bangwe. Eupša morutiši wa ka wa karate, ka go tseba gore ke be ke katana le gore ke se ke ka diriša matla a ka gampe, o ile a nthuta gore ke be le boitayo bjo bogolo le mekgwa e mebotse. O be a dula a gatelela bohlokwa bja go kwa le go botega.

KAMOO BEIBELE E FETOTŠEGO BOPHELO BJA KA: Ge ke thoma go ithuta Beibele, ke ile ka ithuta gore Jehofa o hloile bošoro. (Psalme 11:5) Mathomong, ke be ke fahlela ka gore karate ga se bošoro eupša ke papadi yeo e bapalwago ka tsela e šireletšegilego. Ke be ke nagana gore dika tše dibotse le ditekanyetšo tše phagamego tšeo e di kgothaletšago di be di dumelelana kudu le seo Beibele e se rutago. Banyalani ba Dihlatse bao ba bego ba ithuta le nna ba be ba tloga ba sa fele pelo. Le ka mohla ga se ba ka ba mpotša gore ke tlogele karate; ba ile ba fo tšwela pele ba nthuta therešo ya Beibele.

 Ge tsebo ya ka ya Beibele e dutše e oketšega gomme segwera sa ka le Jehofa se gola, ke ile ka thoma go bona dilo ka tsela e fapanego. Ke ile ka kgahlega ge ke be ke ithuta ka mohlala wo o beilwego ke Morwa wa Jehofa, Jesu. Gaešita le ge Jesu a be a ena le matla kudu, le ka mohla ga se a ka a diriša bošoro. Mantšu a gagwe ao a ngwadilwego go Mateo 26:52 a ile a nkgoma kudu, ge a re: “Bohle bao ba dirišago tšhoša ba tla bolawa ka tšhoša.”

Ge ke be ke dutše ke ithuta ka Jehofa, ke moo lerato la ka go yena gotee le tlhompho di ilego tša gola kudu. Ke ile ka kgongwa kudu ke go nagana gore Mmopi wa rena, yo bohlale kudu le yo a nago le matla kudu, o be a ena le taba le nna. Ke ile ka kgongwa ke go tseba gore gaešita le ge ke be ke nyamiša Jehofa goba ke be ke ikwa gore go be go le thata kudu gomme ke nyaka go tlogela, le ka mohla o be a ka se ke a ntlhoboga ge feela ke be ke dula ke iteka. Ke ile ka homotšwa kudu ke kholofetšo ya gagwe e rego: “Nna Jehofa Modimo wa gago ke go swere ka seatla sa ka sa le letona, Yena yo a rego go wena: ‘O se ke wa boifa. Ke tla go thuša.’” (Jesaya 41:13) Ge ke lemoga gore ke be ke bontšhwa lerato le bjalo, ke be ke sa nyake gore le ntahlegele.

Ke be ke tseba gore go tlogela karate e be e tlo ba selo se thata kudu seo nkilego ka se dira. Eupša gape ke be ke tseba gore go be go tla thabiša Jehofa, e bile ke kgodišegile gore go mo hlankela go be go swanelwa ke gore ke dire boikgafo le ge e le bofe. Ke ile ka feleletša ke kgodišegile ge ke be ke bala mantšu a Jesu ao a ngwadilwego go Mateo 6:24, a rego: “Ga go yo a ka bago lekgoba la marena a mabedi.” Ke ile ka lemoga gore go be go ka se kgonege go hlankela Jehofa ka botlalo ke dutše ke bapala karate, ka ge ke be ke tla feleletša ke etiša karate pele bophelong. Go be go fihlile nako ya gore ke ikgethele morena yo ke tla mo hlankelago.

Go tlogela karate go be go se bonolo. Ke be ke katana le maikwelo a mantši a thulanago. Ke be ke ikwa ke thabile ka go tseba gore ke be ke thabiša Jehofa. Eupša gape ke be ke ikwa eka ga ke botegele morutiši wa ka wa karate. Bao ba bapalago karate gantši ba lebelela go se botegele motho e le sebe seo se sa lebalelwego. Ba bangwe ba ka ba ba kgetha go ipolaya go e na le go lebeletšana le dihlong tšeo di bakwago ke seo.

Ke ile ka ikwa ke ena le dihlong tša go hlalosetša morutiši wa ka wa karate lebaka la ka la go tlogela. Ka gona, ke ile ka fo tloga, ka kgaotša ka mo go feletšego go boledišana le yena le ba bangwe bao ke bego ke bapala karate le bona. Ke ke be tseba gore ke dirile se se nepagetšego ka go tlogela karate. Lega go le bjalo, gape ke be ke ikwa ke le molato ge ke se ka hlalosa ditumelo tša ka tše difsa, ka ge ke be ke lahlegetšwe ke sebaka sa go botša ba bangwe ka tumelo ya ka. Ke ile ka ikwa bjalo ka ge eka ke nyamišitše Jehofa le pele nka thoma go mo hlankela. Ke be ke tshwenywa ke taba ye ka moka. Go bile le dinako tše dintši tšeo ke bego ke leka go rapela Jehofa eupša ke feleletša ke llišwa ke go kwa bohloko.

Jehofa o swanetše go ba a ile a bona selo se itšego se sebotse go nna, ka gobane o ile a tutuetša bana babo rena le dikgaetšedi gore ba nthekge. Ke ile ka kgongwa kudu ke lerato la bona, khomotšo ya bona gotee le bogwera bja bona. Gape ke ile ka homotšwa ke pego ya Beibele ya mabapi le Dafida le Batseba. Gaešita le ge Dafida a be a dirile dibe tše dikgolo, Jehofa o ile a mo lebalela ka morago ga ge a itshotše e le ka kgonthe. Ge ke be ke nagana ka pego yeo, e be e nthuša go lebelela diphošo tša ka ka tsela e nepagetšego.

KAMOO KE ILEGO KA HOLEGA KA GONA: Pele ga ge ke ithuta Beibele, ke be ke se na taba le batho ba bangwe—ke tshwenyegile ka nna feela. Ke ithutile go bontšha kwelobohloko kudu ke thušwa ke Jehofa le mosadi wa ka yo re nago le nywaga e šupago re nyalane. Re šegofaditšwe ka tokelo ya go ithuta Beibele le batho ba bantši, go akaretša le ba bangwe bao maemo a bona a kwešago bohloko. Lethabo leo ke bago le lona ge ke bona lerato la Jehofa le kgoma maphelo a ba bangwe le feta leo ke bego ke tla ba le lona ge nkabe ke le nkgwete ya karate.

[Ntlhakgolo go letlakala 14]

“Ke ile ka kgongwa kudu ke go nagana gore Mmopi wa rena, yo bohlale kudu le yo a nago le matla kudu, o be a ena le taba le nna”

 [Lepokisi/Seswantšho go letlakala 15]

“Ke a Leboga ka Lelokelelo le le le Kgahlišago la Dihlogo!”

Na o thabetše go bala diphihlelo tše di fetilego? E fo ba tše 2 tša dipego tše bjalo tša ka godimo ga tše 50 tšeo di gatišitšwego ka go Morokami ga e sa le go tloga ka August 2008. Lelokelelo le la dihlogo la “Beibele e Fetoša Maphelo” le ratwa ke babadi ba rena. Ke ka baka la’ng ba bantši ba le hweditše e le le ipiletšago gakaaka?

Batho bao go bolelwago ka bona dihlogong tše ba tšwa ditlogong tše di sa swanego. Pele ba ka ithuta ka Jehofa Modimo, ba bangwe ba be ba atlegile ka tsela e itšego eupša ba se na morero bophelong. Ba bangwe ba be ba katana le ditlhohlo tše dikgolo, tše bjalo ka go ba bogale goba go diriša dihlaretagi goba bjala gampe. Ba sego kae ba gotše ba tseba Jehofa eupša ba aroga ka nakwana borapeding bja gagwe. Diphihlelo tšeo ka moka di bontšha gore go dira diphetogo bakeng sa go kgahliša Modimo go a kgonega. Le gona go dira bjalo go a hola ka mehla. Dipego tše di kgoma babadi ba rena bjang?

Mmadi yo mongwe o hlalosa kamoo sehlogo se se lego ka tokollong ya February 1, 2009, se thušitšego bagolegwa ba bangwe kgolegong ya basadi.

▪ O re: “Bagolegwa ba bantši ba kgona go kwešiša maikwelo a batho bao go bolelwago ka bona sehlogong seo. Diswantšho tša pele ba fetoga le tša ka morago ga ge ba fetogile gotee le kanegelo ya motho yo mongwe le yo mongwe ya bophelo bja gagwe bja nakong e fetilego di ile tša ba kgoma kudu. Bagolegwa ba bantši ba phetše ka tsela e swanago. Ka morago ga go bala dipego tše, bagolegwa ba babedi ba ile ba thoma go ithuta Beibele.”—C. W.

Diphihlelo tšeo di hlaloswago lelokelelong le la dihlogo di tloga di kgomile babadi ba bangwe. Ka mohlala, tokollo ya April 1, 2011, e be e ena le phihlelo ya Guadalupe Villarreal, yoo a tlogetšego bophelo bja bosodoma e le gore a hlankele Jehofa. Ela hloko a mabedi feela a mangwalo a mantši ao a tšwago go babadi ba rena ge ba be ba arabela pegong ye.

▪ “Phihlelo ya Guadalupe e nkgomile kudu. Go tloga go kgahliša go bona kamoo go rata Jehofa le Lentšu la gagwe go ka dirago gore motho a fetoge ka mo go feletšego!”—L. F.

▪ “Nakong e fetilego, ke be ke leka go botša motho yo mongwe le yo mongwe ka tumelo ya ka, go akaretša le basodoma. Lega go le bjalo, morago bjale ke hlokometše gore ke na le go tshediša batho bao mahlo goba gaešita le go ba phema. Sehlogo se e tloga e le sona seo ke bego ke se nyaka. Se nthušitše go lebelela batho bao kamoo Jehofa a ba lebelelago ka gona—e le barapedi ba gagwe ba nakong e tlago.”—M. K.

Phihlelo e nngwe yeo babadi ba bantši ba e ratilego e be e le ya Victoria Tong, yoo kanegelo ya gagwe e tšwelelago ka tokollong ya August 1, 2011. Victoria o hlalositše ka go godišwa ga gagwe gabohloko. O dumetše gore o be a thatafalelwa ke go ikwa a ratwa ke Jehofa, gaešita le ka morago ga nywaga e mentši a mo hlankela. Le gona o boletše seo se ilego sa mo thuša ganyenyane-ganyenyane go amogela lerato la Jehofa. Ela hloko seo babadi ba bangwe ba se boletšego ka kanegelo ya gagwe.

▪ “Phihlelo ya Victoria e tloga e nkgomile pelo. Ke lebeletšane le masetlapelo a mantši bophelong bja ka. Ke dula ke lwantšhana le maikwelo a fošagetšego—gaešita le ka morago ga nywaga e mentši ke kolobeditšwe ke le Hlatse. Eupša phihlelo ya Victoria e ntira gore ke nyake go šoma ka thata kudu gore ke bone seo Jehofa a se bonago go nna.”—M. M.

▪ “Ge ke be ke sa le yo monyenyane, ke be ke lwantšha bothata bja go lemalela go bogela diswantšho tše di kgothaletšago bootswa. Morago bjale, ke ile ka di bogela gape. Ke kgopetše thušo ya bagolo ba Bakriste, gomme ke dirile kgatelopele go fenyeng bothata bja ka. Bagolo ba nkgonthišeditše ka lerato la Modimo le kgaugelo ya gagwe. Lega go le bjalo, ka dinako tše dingwe ke sa dutše ke ikwa ke se na mohola, go le bjalo ka ge eka mohlomongwe Jehofa a ka se nthate. Go bala phihlelo ya Victoria go thušitše kudu. Bjale ke lemoga gore ge ke nagana gore mohlomongwe Modimo a ka se ntebalele, ge e le gabotse ke bolela gore sehlabelo sa Morwa wa gagwe ga se sa lekana go ka bipa dibe tša ka. Ke segile sehlogo se le go se boloka e le gore nka se bala le go naganišiša ka sona nako le nako ge ke ikwa ke se na mohola. Ke a leboga ka lelokelelo le le le kgahlišago la dihlogo!”—L. K.