▪ Molao wa Modimo wo a bego a o neile Baisiraele o be o akaretša taelo ye ya mabapi le batho ba ditšhaba tšeo di bego di ba dikologile, e rego: “O se ke wa nyalelana le tšona. O se ke wa nea morwedi wa gago morwa wa tšona, le morwa wa gago o se ke wa mo nea morwedi wa tšona.” (Doiteronomio 7:3, 4) Ke ka baka la’ng go be go ena le thibelo ye?

Ka kakaretšo, Jehofa o be a tseba gore Sathane o be a nyaka go senya batho ba Gagwe ka go ba arošetša borapeding bja medimo ya maaka. Ka baka leo Modimo o ile a nea temošo ya gore bao ba sa dumelego ba be ba tla “aroša bana ba gago gore ba se sa ntatela, ba hlankele medimo e mengwe.” Boemo bjo bo be bo le kotsi kudu. Ge setšhaba sa Isiraele se be se ka hlankela medimo e mengwe, se be se ka se sa amogelwa ke Modimo e bile o be a ka se sa se šireletša, gomme ka go re’alo sa hlaselwa gabonolo ke manaba a sona. Bjale, setšhaba se be se ka tšweletša bjang Mesia yo a holofeditšwego? Go molaleng gore Sathane o be a ena le lebaka la go goketša Baisiraele gore ba nyalane le bao ba sa dumelego.

Ka boripana, gopola gore Modimo o be a ena le taba le batho ba gagwe e le motho ka o tee ka o tee. O be a tseba gore lethabo le boiketlo tša yo mongwe le yo mongwe wa bona di be di ithekgile ka go ba le tswalano ya kgauswi le yena bjalo ka Modimo wa bona. Na go be go ena le lebaka le le kwagalago la gore Jehofa a tshwenyege ka tutuetšo e kotsi ya molekane yo a sa dumelego? Ela hloko mohlala wa Kgoši Solomone. O be a tseba temošo ya Jehofa ya mabapi le basadi ba sa dumelego, e rego: ‘Ba tla aroša dipelo tša lena gore le latele medimo ya bona.’ Ka ge e be e le monna yo bohlalehlale, mohlomongwe o be a thomile go nagana gore o be a sa nyake keletšo ya Modimo le gore e be e sa mo swanele. O ile a e hlokomologa. Ka mafelelo afe? “Mafelelong basadi ba gagwe ba aroša pelo ya gagwe . . . gore e latele medimo e šele.” A mafelelo a kwešago bohloko gakaakang! Solomone o ile a se sa amogelwa ke Jehofa, gomme batho ba gagwe ba ile ba arogana o šoro ka baka la go se botege ga gagwe.—1 Dikgoši 11:2-4, 9-13.

Ba bangwe ba ka fahlela ka gore go be go ena le bao ba kilego ba nyalana le bašele. Ka mohlala, Moisiraele yo a bitšwago Maglone o be a nyetše mosadi wa Momoaba e lego Ruthe, gomme o ile a fetoga modumedi yo a beago mohlala. Eupša go nyala basadi ba Bamoaba e be e le kgetho e kotsi. Maglone ga a retwe bakeng sa go nyala ga gagwe ngwanenyana wa Momoaba; o ile a hwa e sa le yo monyenyane, mohlomongwe le pele Ruthe a fetoga morapedi wa Jehofa. Ngwanabo Maglone, Kilioni, o ile a nyala mosadi wa Momoaba e lego Oropa, yoo a ilego a dula a kgomaretše ‘medimo ya gabo.’ Ka lehlakoreng le lengwe, Boase o ile a nyala Ruthe ka morago ga nako e telele e šetše e le modumedi. Ge e le gabotse, Bajuda ka morago ba ile ba mo tšea e le “yo a sokologetšego tumelong ya Sejuda ka mo go feletšego.” Lenyalo la Ruthe le Boase e be e le tšhegofatšo go bobedi bja bona.—Ruthe 1:4, 5, 15-17; 4:13-17.

Bjale, na ke gabohlale go fahlela ka gore mohlala o bjalo ka wa Maglone le Ruthe ka tsela e itšego o thulana le keletšo ya Jehofa ya gore go nyalanwe feela le badumedigotee? Ge e le gabotse, na go fahlela ka go re’alo go ka se swane le go šupa mopetšhi yoo a thopilego jackpot ke moka gwa bolelwa gore go petšha go swanetše go dumelelwa bjalo ka tsela ya go iphediša?

Beibele e kgothaletša Bakriste lehono gore ba swanetše go nyala “feela Moreneng.” E lemoša malebana le go “rwala joko le ba ba sa dumelego.” Keletšo e bjalo e lebišitšwe go Bakriste ba therešo bao ga bjale ba nyakago balekane. Bakeng sa bao ba šetšego ba nyalane le bao ba sa dumelego, Beibele e nea keletšo e šomago ya kamoo ba ka lebeletšanago ka katlego le boemo bjoo bjo thata. (1 Bakorinthe 7:12-16, 39; 2 Bakorinthe 6:14) Keletšo yeo ka moka e bontšha gore Jehofa Modimo, yena Mothomi wa lenyalo, o nyaka gore re thabe bjalo ka barapedi ba gagwe—go sa šetšwe gore re lenyalong goba ga re lenyalong.