Ke ka Baka la Eng Mokwi wa Thapelo a Dumelela Tlaišego?

GAEŠITA le ge ba ka rapela, batho ba bangwe ba na le dipelaelo mabapi le go ba gona ga Modimo. Ke ka baka la’ng ba belaela? Mohlomongwe ke ka gobane ba bona tlaišego e atile kudu lefaseng. Na o kile wa ipotšiša gore ke ka baka la’ng Modimo a dumelela tlaišego?

Na Modimo ruri o be a bopetše batho gore ba be ka tsela yeo ba lego ka yona gona bjale—ba sa phethagala e bile ba tlaišega? Re be re ka se kgone go hlompha modimo yoo a nyakago gore batho ba tlaišege. Eupša ela hloko se: Ge o be o ka dikologa koloi e mpsha o kgahlegile gomme wa hwetša gore kua moragonyana e potegile, na o be o tla tšea gore modiri wa yona o e dirile ka yona tsela yeo? O be o ka se ke! O be o ka phetha ka gore modiri wa yona o e dirile e phethagetše ka tsela e itšego gomme motho yo mongwe goba selo se sengwe sa e senya.

Ka mo go swanago, ge re kgahlwa ke thulaganyo e kgahlišago le tlhamego ya tlholo yeo e re dikologilego gomme ra lemoga modubaduba le tshenyego tšeo di tlaišago batho, re swanetše go fihlelela phetho efe? Beibele e ruta gore Modimo o dirile batho ba babedi ba pele ba phethagetše eupša ka morago ba ile ba ipakela tshenyego. (Doiteronomio 32:4, 5) Ditaba tše dibotse ke gore Modimo o holofeditše go lokiša tshenyego yeo—go dira gore batho ba kwago e be ba phethagetšego. Lega go le bjalo, ke ka baka la’ng a letile nako e telele gakaaka?

Ke ka Baka la Eng a Tšea Nako e Telele Gakaaka?

Lebaka le sepedišana le taba ya gore ke mang yo a swanetšego go buša batho. Jehofa ga se a ka a rera gore batho ba ipuše. O be a tla ba Mmuši wa bona. Beibele e re: “Ga go matleng a motho yo a sepelago gore a laole dikgato tša gagwe.” (Jeremia 10:23) Ka manyami, batho ba pele ba ile ba kgetha go rabela kgahlanong le bogoši bja  Modimo. Ditiro tša bona tša go hloka molao di ile tša ba dira badiradibe. (1 Johane 3:4) Ka baka leo, ba ile ba lahlegelwa ke go phethagala gomme ba ipakela tshenyego le go e bakela bana ba bona.

Jehofa o na le nywaga e dikete a dumeletše batho go ipuša, gomme histori e bontšhitše gore batho ga ba na bokgoni bja go dira bjalo. E hlatsela gore mebušo ya batho ka moka e baka tlaišego. Ga go le o tee wa yona woo o ilego wa fediša ntwa, bosenyi, go hloka toka goba malwetši.

Modimo o tla Dirolla Tshenyego ye Bjang?

Beibele e holofetša gore kgauswinyane Modimo o tla tliša lefase le lefsa leo le nago le toko. (2 Petro 3:13) Ke feela bao ba dirišago tokologo ya bona ya boikgethelo go bontšhana lerato le go rata Modimo ba tlago go dumelelwa go phela go lona.—Doiteronomio 30:15, 16, 19, 20.

Beibele gape e bolela gore “[letšatšing] la kahlolo” leo le batamelago ka lebelo, Modimo o tla fediša tlaišego gotee le bao ba e bakago. (2 Petro 3:7) Ka morago ga moo, Mmuši yo a kgethilwego ke Modimo, e lego Jesu Kriste, o tla buša batho ba kwago. (Daniele 7:13, 14) Pušo ya Jesu e tla fihlelela eng? Beibele e re: “Ba boleta bona e tla ba beng ba lefase, ba tla thaba kudu ka baka la go ata ga khutšo.”—Psalme 37:11.

Bjalo ka Kgoši ya legodimong, Jesu o tla dirolla tshenyego—go akaretša le malwetši, botšofadi le lehu—yeo e bakilwego ke ge batho ba rabela go Jehofa, “mothopo wa bophelo.” (Psalme 36:9) Jesu o tla fodiša batho ka moka bao ba amogelago bobuši bja gagwe bjo lerato. Pušong ya gagwe, go tla phethagala dikholofetšo tše tša Beibele:

▪ “Ga go na modudi yo a tla rego: ‘Ke a babja.’ Batho bao ba dulago nageng e tla ba bao ba swaretšwego molato wa bona.”—Jesaya 33:24.

▪ “[Modimo] o tla phumola megokgo ka moka mahlong a bona gomme lehu le ka se hlwe le sa  ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:4.

Na ga se mo go homotšago go tseba gore kgauswinyane Modimo o tla phethagatša kholofetšo ya gagwe ya go fediša tlaišego? Re sa letetše seo, ga se ra swanela go felelwa ke tumelo ya gore o kwa dithapelo tša rena e le feela ka gobane a dumelela tlaišego ga bjale.

Modimo o gona. A ka go kwa, a ba a kwa ge o mmotša ka bohloko bja gago le manyami a gago. Le gona o fagahletše go go bona o phela go fihlela nakong ya ge dipelaelo tša gago ka moka le bohloko bjo o bo kwago di fedile.