Mokwi wa Thapelo ke Mang?

KE MO go kwagalago gore ge e ba go ena le Mokwi wa thapelo, o swanetše go ba e le Mmopi. Ke mang yo mongwe yoo a ka balago dikgopolo tša gago ntle le Yoo a hlamilego bjoko bja motho? Ke mang yo mongwe yo a ka arabago dithapelo le go nea batho thušo yeo ba e nyakago? Eupša o ka ipotšiša gore, ‘Na go dumela go Mmopi go a kwagala?’

Batho ba bantši ba nagana gore go dumela go Mmopi go bolela gore o swanetše go ganana le bohlatse bja thutamahlale ya mehleng yeno. Eupša kgopolo ya gore go dumela go Mmopi ga go sepedišane le thutamahlale ga se therešo. Ela hloko se se latelago.

▪ Nyakišišo ya morago bjale yeo e dirilwego go baprofesara ba 1 646 ba tša thutamahlale ba diyunibesithing tše 21 tša maemo a godimo tša kua United States e utolotše gore o tee go ba bararo ba bona o be a kgetha go hlalosa pono ya gagwe ka mantšu a rego, “Ga ke dumele go Modimo.”

Therešo ke gore borathutamahlale ba bantši ba dumela gore Modimo o gona.

Bohlatse bja go ba Gona ga Mmopi

Na re swanetše go fo dumela gore Mokwi wa thapelo o gona ntle le go hwetša bohlatse? Ga go bjalo le gatee. Kgopolo ya gore tumelo e bolela go fo dumela ntle le bohlatse e tloga e fošagetše. Beibele e hlalosa tumelo e le “bohlatse bjo bo lego molaleng bja dilo tša kgonthe tšeo di sa bonwego.” (Baheberu 11:1) Phetolelo e nngwe e re tumelo “e dira gore re kgodišege ka dilo tša kgonthe tšeo re sa di bonego.” (The New English Bible) Ka mohlala, ga o kgone go bona maphoto a radio, eupša radio ya gago e bontšha gabotse gore maphoto ao a sa bonagalego ao a dirago gore mantšu a kwagale a gona; ka gona o a dumela gore maphoto a bjalo a gona. Ka mo go swanago, gaešita le ge re sa kgone go bona Mokwi wa thapelo, re ka hlahloba bohlatse bjo bo lego  gona bjo bo ka re kgodišago gore o gona e le ka kgonthe.

Re ka hwetša kae bohlatse bja gore Modimo o gona? Re swanetše go fo lebelela dilo tšeo di re dikologilego. Beibele e fahlela ka gore: “Ke therešo gore ntlo e nngwe le e nngwe e agwa ke motho, eupša yo a agilego dilo ka moka ke Modimo.” (Baheberu 3:4) Na o dumelelana le therešo ya mantšu ao? Mohlomongwe ge o naganišiša ka tsela yeo legohle le rulagantšwego ka yona, mathomo a bophelo, goba kagego ya selo seo se raraganego kudu go feta dilo ka moka lefaseng, e lego bjoko bja motho, o phetha ka gore go swanetše go ba go ena le selo seo se phagametšego motho.

Eupša tlholo e ka re ruta ka Modimo go fihla bokgoleng bjo itšego. Go hlahloba bohlatse bja go ba gona ga Modimo tlholong go swana le go kwa mešito ya motho yoo a batamelago mojakong o tswaletšwego. O a tseba gore go na le motho, eupša motho yoo ke mang? Gore o tsebe motho yoo, o swanetše go bula mojako woo. Re swanetše go dira se se swanago e le gore re tsebe Motho yo a hlotšego dilo ka moka.

Beibele ke mojako wa tsebo ka Modimo. Ge o bula mojako woo gomme o ela hloko tše dingwe tša diporofeto tša yona tše nago le dintlha ka botlalo le go phethagatšwa ga tšona, o tla hwetša bohlatse bja gore Modimo o gona. * Eupša se se fetago seo ke gore pego ya ditirišano tša Modimo le batho e bontšha semelo sa Mokwi wa thapelo.

Mokwi wa Thapelo ke Motho wa Mohuta Mang?

Beibele e utolla gore Mokwi wa thapelo ke motho—yoo o ka mo tsebago. Ga go pelaelo gore  motho ke yena feela yoo a ka theetšago ka kwešišo. Ke moo go kgothatšago go bala mantšu a rego: “Wena Mokwi wa thapelo, go wena go tla tla batho ba mehuta ka moka.” (Psalme 65:2) O kwa bao ba mo rapelago ka tumelo. Le gona o na le leina. Beibele e re: “Jehofa o kgole le ba kgopo, eupša o kwa thapelo ya baloki.”—Diema 15:29.

Jehofa o na le maikwelo. Ke “Modimo wa lerato” e bile o bitšwa “Modimo yo a thabilego.” (2 Bakorinthe 13:11; 1 Timotheo 1:11) Ge Beibele e bolela ka tsela yeo a arabetšego ka yona ge bobe bo be bo atile kudu, e re: “Pelo ya gagwe ya kwa bohloko.” (Genesi 6:5, 6) Polelo ya gore Modimo o baka tlaišego e le go leka batho ga se therešo. Beibele e re: “Go dira tše kgopo a go be kgole le Modimo wa therešo.” (Jobo 34:10) Lega go le bjalo, o ka ipotšiša gore, ‘Ge e ba Modimo e le Mmopi Ramatlaohle, ke ka baka la’ng a dumelela gore tlaišego e tšwele pele e le gona?’

Jehofa o file batho bokgoni bja go diriša tokologo ya boikgethelo, gomme seo se re botša se sengwe mabapi le mohuta wa motho yoo Modimo a lego yena. Na ga re tšeele godimo tokologo ya rena ya go ikgethela tsela yeo re tlago go phela ka yona? Eupša ka manyami, batho ba bantši ba diriša gampe tokologo ya bona gomme ba ipakela tlaišego le go e bakela ba bangwe. Ga bjale go na le potšišo yeo go nyakegago gore o naganišiše kudu ka yona, e rego: Modimo a ka fediša tlaišego ya batho bjang ntle le go ba amoga tokologo ya bona? Re tla ahlaahla potšišo ye sehlogong se se latelago.

[Mongwalo wa ka tlase]

[Lepokisi go letlakala 5]

Na Bodumedi bo Dira Gore o Belaele?

Ka manyami, bodumedi ke bjona bjoo bo dirago gore batho ba bantši ba belaele taba ya gore go na le Mokwi wa thapelo yo a nago le kwelobohloko. Go tsenatsena ga bodumedi dintweng, botšhošetšing le go kgotlelela go swarwa gampe ga bana go dirile gore batho ba bantši bao ba ratago go rapela ba bolele gore, “Ga ke dumele go Modimo.”

Ke ka baka la’ng bodumedi gantši bo tutueletša bobe? Ge go bolelwa ka go lebanya go ka thwe: Batho ba babe ba dirile dilo tše mpe leineng la bodumedi. Beibele e boletše e sa le pele gore Bokriste bo be bo tla thopša gomme bja dirišetšwa merero e mebe. Moapostola Paulo o ile a botša balebeledi ba Bakriste gore: “Gare ga lena ka noši go tla tsoga banna bao ba tlago go bolela dilo tše di kgopamego gore ba goge barutiwa gore ba ba šale morago.”—Ditiro 20:29, 30.

Modimo o šišimišwa ke bodumedi bja maaka. Ge e le gabotse, Lentšu la Modimo, Beibele, le re bodumedi bja maaka bo ikarabela ka “madi . . . a bao ka moka ba bolailwego lefaseng.” (Kutollo 18:24) Ka ge bodumedi bja maaka bo paletšwe ke go ruta batho ka Modimo wa therešo, yoo seka sa gagwe se segolo e lego lerato, Modimo o bona madumedi ao a ena le molato wa madi.—1 Johane 4:8.

Mokwi wa thapelo o tshwenyegile ka bahlaselwa ba bodumedi bja bogateledi. Go se go ye kae, lerato leo Modimo a ratago batho ka lona le tla mo šušumeletša go ahlola baikaketši ka moka ba bodumedi a diriša Jesu. Jesu o itše: “Ba bantši ba tla re go nna letšatšing leo: ‘Morena, Morena, na ga se ra ka ra porofeta ka leina la gago?‘ . . . Lega go le bjalo, ke tla ba botša ka re: Ga se ka ka ka le tseba! Tlogang go nna lena ba go hloka molao.”—Mateo 7:22, 23.