Na go na le yo a Kwago Dithapelo?

“Ke be ke ena le dipelaelo mabapi le go ba gona ga Modimo. Lega go le bjalo, ka dinako tše dingwe ke be ke fo rapela. Ke be ke sa kgodišege gore go be go ena le motho yo a theetšago, eupša ke swanetše go dumela gore ke be ke duma eka go ka ba le motho yoo a theetšago dithapelo tša ka. Ke be ke se ka thaba e bile ke se na morero bophelong. Ke be ke tšhaba go dumela go Modimo ka gobane ke be ke nagana gore ke batho ba fokolago feela bao ba dumelago go Modimo.”—PATRICIA, * IRELAND.

NA O kile wa ikwa bjalo ka Patricia? Na o fo rapela gaešita le ge o belaela taba ya ge e ba Modimo a le gona? Ge e ba go le bjalo, ga se wena feela. Ela hloko mehlala e latelago.

▪ Nyakišišo yeo e dirilwego go batho ba 2 200 ba Brithania e utolotše gore ke batho bao ba dirago 22 lekgolong feela bao ba dumelago gore go na le Modimo yo a bopilego lefase e bile a kwago dithapelo. Lega go le bjalo, 55 lekgolong ya bao go boledišanwego le bona ba fela ba rapela.

▪ Nyakišišo yeo e dirilwego go batho ba 10 000 ba tšwago dikontinenteng tše nne e bontšhitše gore mo e nyakilego go ba 30 lekgolong ya bao ba arabetšego bao ba ipitšago bailamodimo ba a rapela.

Ke ka Baka la Eng ba Belaela?

Monna yo a tšwago Engelane yo a bitšwago Allan o re: “Ke be ke fela ke bolela gore ga ke dumele go Modimo ka gobane ke be ke nagana gore bodumedi bo be bo hlametšwe go laola batho le go dira tšhelete. Le gona, ke be ke fahlela ka gore, ge e ba go be go ena le Modimo, gona nkabe go hloka toka go se gwa ata ka tsela ye. Lega go le bjalo, ka dinako tše dingwe ke be ke itulela ka setu gomme ka bolela le selo tsoko. Ke be ke fela ke ipotšiša gore, ‘Ke fihlile bjang mo?’”

Motho yo mongwe le yo mongwe yo a ikwago ka tsela yeo o na le mabaka a gagwe a go belaela taba ya ge e ba dithapelo di arabja. Mabakeng a mantši, dipelaelo tšeo di ka gakatšwa ke dipotšišo tšeo batho bao ba sa hwetšego dikarabo tša tšona, tše bjalo ka tše latelago:

▪ Na go na le Mmopi?

▪ Ke ka baka la’ng bodumedi gantši bo tutueletša bobe?

▪ Ke ka baka la’ng Modimo a dumelela tlaišego?

Ge o be o ka tseba dikarabo tša dipotšišo tše, na o be o ka rapela o kgodišegile kudu?

[Mongwalo wa ka tlase]