Na o be o Tseba?

Ke ka baka la eng batho ba mehleng ya Beibele ba be ba diriša sekontiri e le leraga?

▪ Ge Beibele e bolela ka baagi ba tora ya Babele, e re ba ile “ba aga ka ditena go e na le ka maswika, eupša ba diriša sekontiri go di swaraganya.”—Genesi 11:3.

Sekontiri ke selo sa tlhago. Se tšweletšwa ke petroleum, gomme se hwetšwa mafelong a mantši a Mesopotamia, moo se runyago fase gomme ge se dirile bodiba sa kgahla. Mošomo wa sona bjalo ka sekgomaretši o bonagetše mehleng ya Beibele. Puku e nngwe ya ditšhupetšo e re sekontiri se be se “swanela meago yeo e agilwego ka ditena tšeo di fišitšwego.”

Sehlogo seo se lego ka makasineng wa Archaeology se hlalosa leeto la morago bjale la go ya maropeng a ziggurat (tora) ya motseng wa bogologolo wa Uri, kua Mesopotamia. Mongwadi o re: “Leraga la sekontiri—se sengwe sa didirišwa tša mathomo tša mašemo a magolo a oli a ka borwa bja Iraq—le sa dutše le bonagala magareng ga ditena tše di fišitšwego. Selo se se seso seo se kgomarelago, seo lehono e lego sebaki sa go se tsepame le bošoro bja bodumedi tikologong ye, se kile sa kopanya setšhaba. Go dirišwa ga sekontiri e le leraga le go se ala ditseleng go thušitše go dira gore ditena tša mobu tšeo di thubegago gabonolo tša Masumeri di se ke tša tsenwa ke meetse, e le go kgonthišetša gore meago e tšea nywaga e dikete e eme.”

Ke “pampiri” ya mohuta mang yeo e bego e le gona mehleng ya Beibele?

▪ Potšišo yeo gantši e ka rotoga ka baka la seo se boletšwego ke mongwadi wa Beibele Johane, ge a re: “Le ge ke na le dilo tše dintši tše nka le ngwalelago tšona, ga ke rate go dira bjalo ka pampiri le enke.”—2 Johane 12.

Lentšu la Segerika la kharʹtes, leo mo le fetoletšwego e le “pampiri,” le šupa go pampiri yeo e dirilwego ka phaphirase, yeo e lego semela sa ka gare ga meetse. Puku e nngwe ya ditšhupetšo e hlalosa mokgwa wa go dira matlakala a go ngwalela ka dikotana tša semela se ka gore: “Dikotana, tšeo ka dinako tše dingwe e lego tša botelele bja dimithara tše tharo, di be di ebolwa gomme di setwa ka bosesane ke moka meseto yeo ya kgomaganywa e le gore e dire maphephe; maphephe a a itiwa ka noto ya kota gomme mafelelong a dirwa a boreledi ka sefadi.”

Baepi ba marope ba utolotše dingwalwa tše dintši tša bogologolo tša phaphirase kua Egipita le tikologong ya Lewatle le le Hwilego. Diphaphirase tša Mangwalo tšeo di hweditšwego ditikologong tšeo ke tša morago kua mehleng ya Jesu goba gaešita le pele ga moo. Go tloga go kgonega gore se e be e le sedirišwa seo mangwalo a Beibele, a bjalo ka a baapostola, a bego a ngwadilwe go sona mathomong.

[Methopo ya Diswantšho go letlakala 11]

Spectrumphotofile/​photographersdirect.com

© FLPA/​David Hosking/​age fotostock