Go Aloga ga Sehlopha sa bo-132 sa Gilead

Bao ba Lwelago Therešo

MARCH 10, 2012, e be e le letšatši le le kgethegilego lefelong la tša thuto la Dihlatse tša Jehofa kua Patterson, New York. Batho ba dikete bao ba aperego gabotse, bao ba akaretšago baeng ba tšwago dinageng dišele, ba be ba tletše go tlo bona ge go aloga sehlopha sa bo-132 sa Sekolo sa Beibele sa Watchtower sa Gilead. Go be go ena le ba bantši holong kua Patterson; ba bangwe ba be ba bokane go bogela lenaneo thelebišeneng mafelong a mangwe. Batho ka moka bao ba bego ba le gona e be e le ba 9 042.

Batho ba be ba tloga ba fagahletše go kwa lenaneo. Ka go se swane le bao ba tsenego diklaseng tša nakong e fetilego tša sekolo sa boromiwa, barutwana ka moka bao ba bego ba aloga ba be ba kile ba ba mohuteng o itšego wa tirelo e kgethegilego—ba be ba kile ba hlankela e le ditho tša lapa la Bethele, babulamadibogo ba kgethegilego, balebeledi ba basepedi goba baromiwa—gaešita le ge ba be ba se ba ka ba ya sekolong sa Gilead. Barutwana ba bao ba nago le phihlelo ba be ba tla botšwa’ng?

Ga se gwa tšea nako e telele gore bao ba lego gona ba kwe seo. Gerrit Lösch, setho sa Sehlopha se Bušago sa Dihlatse tša Jehofa, e be e le modulasetulo wa lenaneo gomme o ile a nea polelo ya go bula. O ile a botšiša potšišo e šišinyago kgopolo e rego, “Na o Lwela Therešo?” O ile a hlalosa gore Bakriste ba lwela therešo, ba emelela dithuto ka moka tša Bokriste. Go tšeela therešo godimo ga go akaretše feela go ruta batho therešo eupša go akaretša le go thuša batho go rata therešo.

Ngwanabo rena Lösch o ile a botšiša gore: “Re tseba bjang gore re na le therešo?” O ile a bolela gore bohlatse bja seo bo bonwa ka dipalo tša batho bao ba e amogelago. Gaešita le ge lehono go na le ba dimilione bao ba amogetšego borapedi bjo bo sekilego, fela ka Pentekoste ya 33 C.E. e be e le ba sego kae kudu. O ile a lokeletša ditsela tše hlano tšeo ka tšona re tsebago gore re na le therešo: (1) Re dula re latela thuto ya Jesu, (2) re a ratana, (3) re kgomarela ditekanyetšo tše phagamego tša boitshwaro, (4) ga re tšee lehlakore dingangišanong tša lefase le, e bile (5) re batho bao ba bitšwago ka leina la Modimo.

“Latela Tlhahlo”

Bao ba bego ba le gona ba be ba ipotšiša gore go be go tla latela’ng ge Geoffrey Jackson wa Sehlopha se Bušago a be a eya sethaleng a swere sutukheise! Sehlogo sa polelo ya gagwe se be se re, “Latela Tlhahlo,” gomme se theilwe go Jesaya 50:5. Temana yeo ge e porofeta ka Jesu Kriste, e re: “Ge e le nna ke be ke sa rabele. Ga se ka ngangabala.”

Ngwanabo rena Jackson o ile a kgothaletša barutwana gore ba akgofele go lemoga tlhahlo yeo Jehofa a e neago ka moya o mokgethwa, ka Beibele gotee le ka mokgatlo wa gagwe. Papišong yeo e bolelago ka ditalente, yeo e ngwadilwego go Mateo 25:14-30, go ka thwe bahlanka ka moka ba be ba filwe tekanyo e lekanago, ka gobane bahlanka bao ba be ba filwe go ya ka bokgoni bja bona. Go be go letetšwe gore ba dire sohle seo ba ka se kgonago. Bahlanka ba babedi ba ile ba retwa gomme ba bitšwa bahlanka ‘ba botse le ba botegago.’ Ga se gore go botega go ithekgile ka seo se diregago eupša go ithekgile ka go latela tlhahlo.

Mohlanka wa boraro o ile a bitšwa “yo kgopo le wa sebodu” le “yoo e sego wa selo.” Bothata bja gagwe e be le eng? O ile a uta talente ya gagwe mmung. Talente e be e se tšhelete ya tšhipi, eupša e be e le tekanyo ya go ela boima yeo e lekanago le ditenariase tše 6 000, tšeo e bego e le tša boima bja dikhilograma tše 20. Bjo ke boima bjoo bo nyakilego bo lekana le bjo bo dumeletšwego bja sutukheise ya motho yo a sepelago ka sefofane. E swanetše go ba e bile mošomo go uta selo le ge e le sefe seo se lekanago le sutukheise mmung. Ka gona mohlanka o dirile selo se itšego—o ile a uta  talente mmung—eupša e be e se seo a bego a laetšwe gore a se dire. Ka mo go swanago, moromiwa a ka swarega—eupša a ka swarega ka eng? Mohlomongwe a ka swarega ka go ngwala mangwalo a ditaba, go fetleka Inthaneteng, go fetša nako le bagwera goba go dira kgwebo. Motho yo bjalo a ka feleletša a lapile kudu ka morago ga go swarega medirong e bjalo, eupša ga se a dira seo a bego a laetšwe gore a se dire. Ngwanabo rena Jackson o ile a phetha ka gore: “Latela tlhahlo ka mehla!”

“Tloša Dipelaelo Monaganong wa Gago”

Seo e be e le sehlogo sa polelo yeo e filwego ke Anthony Morris wa Sehlopha se Bušago. O itše: “Beibele le ka mohla ga e kgokaganye tumelo le pelaelo e le tšeo di sepedišanago. Tumelo e ganana le pelaelo.” Sathane o ile a atlega go bjala dipelaelo monaganong wa mosadi yo a bego a phethagetše, Efa; ka gona a ka bjala dipelaelo menaganong ya rena. Ngwanabo rena Morris o itše: “Fepa tumelo ya gago gomme dipelaelo di tla bolawa ke tlala.” O ile a lebiša tlhokomelo pegong ya Petro, yoo a ilego “sepela godimo ga meetse” eupša ya re ge “a lebelela ledimo,” a tšhoga ke moka a thoma go nwelela. Ka morago ga gore a mo sware, Jesu o ile a mmotšiša gore: “Ke ka baka la’ng o fentšwe ke pelaelo?” (Mateo 14:29-31) “Ka ge lena baromiwa le tla swarega tirelong ya nako e tletšego, ba bangwe ba ka kgahlwa ke tšohle tšeo le di dirago, go le bjalo ka ge eka le sepela godimo ga meetse, eupša ge madimo a tsoga, le se ke la fenywa ke pelaelo.”

Ngwanabo rena Morris o ile a tšwela pele a bolela gore le ge go feta dinakong tša madimo go ka ba thata, mafelelong madimo a homola. Ge a bolela ka dinako tše thata, o ile a kgothaletša barutwana gore ba nagane ka seo Paulo le Silase ba ilego ba se dira ge ba be ba golegilwe kua Filipi. Ditiro 16:25 e re: “Mo e ka bago gare ga bošego Paulo le Silase ba be ba rapela gomme ba tumiša Modimo ka kopelo; ge e le bagolegwa bona ba be ba ba theeditše.” Ela hloko taba ye: Ga se ba rapela feela, eupša ba ile ba opela. Ba be ba opelela godimo ka mo go lekanego gore ba kwewe ke bagolegwa ba bangwe. Ngwanabo rena Morris o ile a hlalosa gore ba bantši ba rena ga re na mantšu a mabotse, eupša ga se ra swanela go ba le dihlong go opela, kudukudu ge re le mathateng. Ngwanabo rena Morris o ile a phetha ka go bala mantšu a Kopelo 135 e rego “Go Kgotlelela go Fihla Bofelong,” ka pukung ya dikopelo ya Opelela Jehofa.

Dipolelo tše Dingwe tše di Kgothatšago

“Na o ka Rata go Bona Matšatši a Mantši?” e be e le sehlogo sa polelo yeo e filwego ke Robert Luccioni wa Lefapha la go Reka. Sehlogo se be se theilwe mantšung a Kgoši Dafida ao a ngwadilwego go Psalme 34:12. Polelo ya ngwanabo rena Luccioni e ile ya bolela mabapi le kamoo motho a ka swaraganago le mathata ka gona gomme a dula a ena le tswalano e botse le Jehofa. Go ka ithutwa mo gontši pegong yeo e lego go 1 Samuele kgaolo 30. Nakong ya ge Dafida, banna ba gagwe gotee le malapa a bona ba be ba tšhaba Kgoši Saulo, ba ile ba tšhabela Tsikilaga. Ge malapa a bona a be a thopša ke bahlasedi ba Baamaleke, banna bao ba ile ba rweša Dafida molato gomme ba nyaka go mo kgatla ka maswika. Dafida o ile a itshwara bjang? Ga se a ka a fenywa ke go nyama, eupša o ile “a imatlafatša ka Jehofa Modimo wa gagwe.” (1 Samuele 30:6) O ile a botšiša Jehofa, a gata mogato ka go dumelelana le tlhahlo ya Jehofa gomme a hlakodiša mathopša. Seboledi se ile sa kgonthišetša barutwana gore ge ba ka bota Jehofa ka mo go swanago gomme ba latela tlhahlo ya gagwe, ba tla rata go bona mantši a mantši a go tlelwa ke tše botse. Ba tla thabela bophelo tokelong e kgahlišago yeo ba e filwego.

“Dula o Butše Mahlo Dinakong tša Bošego tša go Hlapetša” e be e le sehlogo sa polelo yeo e filwego ke Michael Burnett, e lego yo mongwe wa bahlahli ba Sekolo sa Gilead. Baisiraele ba be ba aroganya bošego go tloga ge letšatši le sobela go fihla ge le hlaba ka dikarolo tše tharo tša dinako tša go hlapetša tšeo e nngwe le e nngwe e nago le diiri tše nne. Nako ya mafelelo ya go hlapetša, go tloga ka 2:00 ka masa go fihla ka 6:00 mesong, e be e le ya leswiswi kudu le yeo e tonyago kudu gomme e be e le nako e thata kudu gore motho a ka dula a phafogile. Mopsalme o be a tlatša monagano wa gagwe ka dipolelo tša Jehofa e le gore nakong ya mafelelo ya go hlapetša, a se ke a  swarwa ke boroko. (Psalme 119:148) Ngwanabo rena Burnett o ile a botša barutwana gore: “Go tla nyakega gore le phafoge. Le tla ba le dinako tše bohloko tšeo di nyamišago gomme le tla kgongwa ke lefase le sehlogo leo le se nago lerato. Le swanetše go dula le itokišeditše go gata mogato.” Ke moka o ile a ba gopotša gore ba swanetše go dula ba ithuta ditaba tše tseneletšego le tše nabilego tša Beibele e le gore ba ipoloke ba phafogile moyeng. Ngwanabo rena Burnett o ile a bontšha taba ye ka gore: “Letšatšing le lengwe le le lengwe, o rapela Jehofa ka gobane o nyaka gore e be mogwera wa gago. Ka gona, dumelela Jehofa, ka ge e le mogwera wa gago, gore a boledišane le wena a diriša Beibele. Bošego ke bja matlagosa, ka gona rulaganya kamoo o tlago go diriša matšatši ao a letšego ka pele, gomme ka go dira bjalo o tla dula o butše mahlo dinakong tša botšego tša go hlapetša.”

“Go Tlwaeletšwa Mošomo o Letšego ka Pele,” e be e le sehlogo seo se kgethilwego ke Mark Noumair, e lego mohlahli yo mongwe wa Gilead, seo se theilwego go 1 Petro 5:10. O ile a botšiša barutwana potšišo ye: “Ka ge le le badiredi ba nago le phihlelo, ke ka baka la’ng le ile la laletšwa gore le tle Lefelong la tša Thuto la Watchtower?” Karabo e re: “Ka gobane le ditsebi modirong wa lena. Ditsebi tše dintši di kgopela nako ya go se be gona mošomong e le gore di tsene diklase tša go loutša bokgoni bja tšona. Dikgweding tše hlano tše fetilego, Jehofa o be a dutše a le ‘tiiša’ le go le ‘matlafatša’ ka thuto e tseneletšego ya Lentšu la gagwe le mokgatlo wa gagwe e le gore le kgone go rwala boikarabelo bjo bogolo bjo le tla bo rwalago. Dikota tše di tiilego ga di kgopame goba go arogana ge di imelwa. Mafelelo a tlwaetšo ya lena a tla bonagala ge le dutše le dirišana le bana babo lena le dikgaetšedi. Na boima bja mathata bo tla le aroganya le melao ya motheo ya Modimo goba na le tla dula le tiile, le sepedišana gabotse le seo le ithutilego sona Lentšung la Modimo? Selo se tiilego se ka kgona go rwala dilo tše boima. Matla a dikota a letše ditlhaleng tša tšona tšeo di logaganego kudu. Matla a lena a bontšhwa ke mohuta wa batho bao le lego bona ka garegare. Jehofa o le tlišitše mo gore a le matlafatše, a le dire bao ba botegago le bao ba ka botwago bakeng sa mošomo o letšego ka pele. Modimo o kgathile tema ya gagwe, ka gona re rapelela gore le kgathe tema ya lena gomme le dumelele ‘Morutiši wa lena yo Mogolo’ a fetše go tlwaetšwa ga lena.”

Diphihlelo le Dipoledišano

Ke mo go lapološago ka mehla go kwa barutwana ba bolela ge go alogwa Gilead, gomme go bile bjalo le lebakeng le. Karolong e nngwe ya lenaneo, barutwana ba ile ba diragatša poledišano ya ge ba be ba nea bohlatse morago bjale. Ka mohlala, banyalani ba bangwe ba Mafora, ba ile ba letela sefofane lebaka la diiri tše tshelelago ge ba le tseleng ya go ya Sekolong sa Gilead. Ge ba le lebenkeleng la go jela boemafofaneng, ba ile ba thoma poledišano le banna ba babedi bao le bona ba bego ba emetše difofane. Ge monna yo mongwe a be a re o tšwa Malawi, ba ile ba boledišana le yena ka Sechewa. O ile a ba botšiša a maketše gore ba ithutile bjang leleme la gabo. Ba ile ba mo hlalosetša gore e be e le baromiwa kua Malawi. Ge monna yo mongwe a be a bolela gore o tšwa Cameroon, ba ile ba mo makatša ba boledišana le yena ka Sefora. Banna bao ka bobedi ba ile ba tšeela Dihlatse tša Jehofa godimo, gomme baromiwa ba ile ba ba nea bohlatse.

Nicholas Ahladis wa Lefapha la Tirelo ya tša Bofetoledi o ile a boledišana le dihlopha tše pedi tša banyalani. Banyalani ba bangwe ba be ba hudugetše Australia go yo ba baromiwa nageng ya Timor Bohlabela yeo e hlagaditšwego ke ntwa. Banyalani ba bangwe ba be ba tlogile Korea ba hlankela Hong Kong. Dihlopha tšeo tša banyalani di be di fagahletše go boela dikabelong tša tšona tša dinageng dišele gore di yo diriša seo di bego di ithutile sona sekolong.

Ka morago ga ge dialoga di filwe di-diploma, morutwana yo a emelago sehlopha o ile a bala lengwalo la ditebogo bakeng sa thuto yeo ba e hweditšego. Ke moka, Ngwanabo rena Lösch, mantšung a gagwe a phetha, o ile a diriša dikapolelo tše di kgahlišago, a bolela gore therešo e swana le molalatladi ka bobotse, e swana le lefelo le le nonnego leganateng e bile e swana le tshetledi lewatleng le le tšutlago ledimo. O itše: “Ruri ke tšhegofatšo go tseba therešo. Lwela therešo gomme o thuše le ba bangwe gore ba e lwele.”

 [Tšhate/Mmapa go letlakala 31]

DIPALOPALO TŠA SEHLOPHA

12 dinaga tše di emetšwego

36 palogare ya nywaga

20 palogare ya nywaga ba kolobeditšwe

15 palogare ya nywaga bodireding bja nako e tletšego

[Mmapa]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Sehlopha se abetšwe dinageng tšeo di bontšhitšwego ka mo tlase:

DINAGA TŠEO BA ABETŠWEGO GO TŠONA

BELIZE

BENIN

CAMBODIA

CAMEROON

CAPE VERDE

CÔTE D’IVOIRE

DOMINICAN REPUBLIC

EAST TIMOR

ECUADOR

GABON

GEORGIA

GUINEA

HONG KONG

LIBERIA

MADAGASCAR

MALAWI

PERU

SAMOA

SÃO TOMÉ AND PRÍNCIPE

UNITED STATES OF AMERICA

ZIMBABWE

[Seswantšho go letlakala 31]

Sehlopha se se Alogago sa bo-132 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago, gomme maina a lokeleditšwe go tloga ka go letshadi go ya ka go le letona mothalading o mongwe le o mongwe.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph, I.; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.