Beibele e Fetoša Maphelo

KE KA baka la’ng monna yo a goletšego lapeng la Makatholika a tiilego le yo a bego a atlegile mošomong wa gagwe wa go kgonthišetša gore molao o a latelwa a ile a ba yo mongwe wa Dihlatse tša Jehofa? Ke’ng seo se hlohleleditšego motšhošetši gore a tlogele bošoro gomme e be mohlankedi wa bodumedi? Bala seo batho ba ba se bolelago.

“Ke Ile ka ba le Kwešišo e Tseneletšego Kutšwanyana Mabapi le se se Nepagetšego le se se Fošagetšego.”—SEBASTIÃO ALVES JUNQUEIRA

NGWAGA WA MATSWALO: 1946

NAGA: BRAZIL

BOPHELO BJA PELE E EBA MOKRISTE: MOAHLODI

BOPHELO BJA KA BJA NAKONG E FETILEGO: Lapa lešo le be le dula magaeng, bokgole bja mo e ka bago dikhilomithara tše tshela go tloga toropong ya Piquete. Batswadi ba ka ba be ba ena le polasa e nyenyane, gomme mašemo a be a re nea dinyakwa tša rena tša motheo. Ke be ke tsena sekolo kua Piquete, ka gona ka feleletša ke rekile paesekele ya kgale, yeo e bego e nnolofaletša leeto la go ya toropong. Batho ba tikologong ya gešo ba be ba diila, eupša toropo e be e hlwekile gomme bosenyi bja gona bo le tlase kudu. Banna ba bantši ba toropong yeo ba be ba šoma feketoring yeo e bego e dira dibetša tša ntwa.

Ke be ke rata go ithuta gomme ka kgona go tsena Sekolong sa go Ithutela go Hlama Difofane tša Ntwa motseng wa kgauswi moo ke ilego ka aloga ke le molaodi wa madira ka 1966. Ke moka ke ile ka ya sekolong sa tša molao gomme ka hwetša degree ya ka ya tša molao. Ka morago, ke ile ka dira kgopelo ya go ba maemong a go ba molaodi wa maphodisa. Ka 1976, ke ile ka atlega tekong ya mmušo gomme ka kgethelwa mošomo woo. Ka dinako tše dingwe mošomo wa ka o be o akaretša go ba molaodi kgolegong. Ka nako yeo, Dihlatse tša Jehofa di be di fela di etla di kgopela tumelelo ya go dira boboledi go bagolegwa. Le nna di be di fela di mpotša molaetša wa Beibele. Ke be ke hlompha Modimo kudu. Ke ile ka kgahlwa ke go ithuta gore Modimo o na le leina, e lego Jehofa, le gore re ka kgona go ba bagwera ba gagwe.

Ganyenyane-ganyenyane, ke ile ka hlatlogela maemong a godimo mošomong wa ka. Ka 1981, ke ile ka atlega tlhahlobong e nngwe ya mmušo gomme ka kgethwa bjalo ka moahlodi wa naga. Ke moka, ka 2005, ke ile ka kgethelwa go ba moahlodi wa kgoro ya boipiletšo kgorong ya São Paulo.

KAMOO BEIBELE E FETOŠEGO BOPHELO BJA KA: Kapejana ka morago ga ge ke alogile sekolong sa tša molao, ke ile ka thoma go bala Beibele—e lego tiro yeo e ilego ya tliša phetogo e kgolo tseleng ya ka ya go nagana. Ke be ke le Mokatholika yo a tiilego. Melokong ya gešo go be go ena le baperisita le mopišopo, gomme ke be ke thuša moperisita nakong ya Mmisa. Pele ke nea thero, ke be ke bala dikarolo tšeo di kgethetšwego go balwa ka pukung ya dithapelo. Kerekeng ya Katholika go be go sa tlwaelega gore malapa a bale Beibele. Mma o ile a selekega kudu ge a lemoga gore ke be ke bala  Beibele. O ile a leka go nnyamiša, a mpotša gore ke be ke ipea kotsing ya go ka gafa. Lega go le bjalo, ke ile ka tšwela pele ke e bala; ke be ke sa bone kotsi ka seo.

Ke nagana gore go nyaka ga ka go tseba go ile gwa nkgothaletša gore ke bale Beibele. Ke be ke nyaka go tseba mo go oketšegilego ka baperisita gotee le tema yeo ba e kgathago ka kerekeng. Ke ile ka ba ka thoma go bala ka mokgatlo wa thutatumelo ya tokologo, eupša tsela ya go bea mabaka le ya go nagana yeo e bego e dirišwa ke baboleledi ba yona e be e fošagetše kudu moo e lego gore ke be ke sa e kwešiše.

Ka nako yona yeo, ngaka ya ka ya meno, yeo e bego e le Mobuddha, e ile ya nnea puku yeo e bego e e filwe. Puku yeo e be e bitšwa Did Man Get Here by Evolution or by Creation? * Ke ile ka amogela puku yeo, ke nagana gore ke be ke tla thabela go e bala gotee le puku ya The Origin of Species, yeo e ngwadilwego ke Charles Darwin. Mabaka ao a bego a ahlaahlwa ka pukung ya Did Man Get Here by Evolution or by Creation? e be e le a matla, a kwagalago le a kgodišago. Ke be ke sa belaele gore thuto ya tlhagelelo e be e sa kwagale.

Go bala ka puku yeo e bolelago ka tlholo go ile gwa oketša go nyaka ga ka go tseba. Ke be ke nyaka go hwetša dipuku tše oketšegilego tšeo di gatišitšwego ke Dihlatse tša Jehofa. Ke ile ka botšwa gore molokiši yo mongwe wa difofane sekolong sa go hlama difofane tša ntwa e be e le yo mongwe wa Dihlatse tša Jehofa. Ke ile ka boledišana le yena gomme a nnea dipuku tšeo nka di balago. Ka nako yeo, ga se ka dumela ge Dihlatse di ithaopela go ithuta Beibele le nna. Ke be ke nagana gore nka ithuta yona ke nnoši.

Ge ke thoma go ithuta Beibele, ke ile ka dira phetho ya gore ka ge ga bjale ke be ke nyetše, e be e tla ba gabohlale gore ke e bale le lapa la ka. Re be re swara thuto ya lapa beke le beke gomme re bala Beibele gotee. Ka ge re be re le Makatholika, lapa lešo le be le ena le baperisita le bapišopo. Ka gona ke ile ka kgahlwa ke seo ke ilego ka se bala go Johane 14:6, e rego: “Jesu a re go yena [morutiwa Thomase]: ‘Ke nna tsela le therešo le bophelo. Ga go yo a tlago go Tate ge e se ka nna.’” Ka morago ga go nyakišiša taba ye ka mo go tseneletšego, ke ile ka kgodišega gore phološo ya rena e tšwa go Jehofa ka Jesu. Re be re boditšwe gore phološo ya rena e be e etšwa go baperisita.

Ditemana tše dingwe tša Beibele di ile tša fetoša pono ya ka ka Kereke ya Katholika le dithuto tša yona. E nngwe ke ya Diema 1:7, e rego: “Go boifa Jehofa ke mathomo a tsebo. Mašilo a nyaditše bohlale le tayo.” E nngwe ke ya Jakobo 1:5, e rego: “Ge e ba mang le mang wa lena a hloka bohlale, a a tšwele pele a kgopela Modimo, gobane o fa bohle kudu ka ntle le go goboša; o tla bo newa.” Ke be ke tloga ke nyoretšwe go hwetša tsebo le bohlale, e lego lenyora leo le bego le sa tlošwe ke go ya kerekeng. Ka baka leo, ke ile ka kgaotša go ya kerekeng.

Ka 1980, mosadi wa ka o ile a thoma go ithuta Beibele le Dihlatse tša Jehofa. Ge ke be ke le gona gae, ke be ke ithuta le bona. Ge nako e dutše e eya, ke ile ka amogela go ithuta Beibele. Lega go le bjalo, re ile ra tšea nako e telele pele re ka dira phetho ya go kolobetšwa gore re be Dihlatse tša Jehofa. Mosadi wa ka o ile a kolobetšwa ka 1994, gomme nna ka kolobetšwa ka 1998.

KAMOO KE ILEGO KA HOLEGA KA GONA: Bana ba ka ba bane ba hotšwe ke go godišwa gore ba phele ka ditekanyetšo tša Jehofa. (Baefeso 6:4) Ke na le barwa ba babedi, bao bobedi bja bona ba šomago ka thata go hlokomela dinyakwa tša moya tša Dihlatse tše dingwe diphuthegong tšeo ba kopanelago go tšona. Barwedi ba ka ba babedi ba dira boboledi go ba bangwe ka mafolofolo. Mosadi wa ka o fetša diiri tše dintši kgwedi le kgwedi a thuša batho go ithuta ka Beibele, gomme nna ke thabela go hlankela ke le mogolo phuthegong ya gešo.

Ge ke be ke eba yo mongwe wa Dihlatse tša Jehofa, ke ile ka ba le kwešišo e tseneletšego kutšwanyana mabapi le se se nepagetšego le se se fošagetšego. Ka ge ke le moahlodi, ke leka go etiša pele go  diriša tsela ya Jehofa go swaragana le ditaba tše di fapafapanego kgorong ya tsheko—ke nagana ka maemo ka moka, ke bontšha tekatekano, gomme ke bontšha kwelobohloko ge go eba le maemo a nolofatšago taba.

Ke swaragane le melato e mentši ya bošoro, bosenyi le go swarwa gampe ga bana, gotee le melato e mengwe e megolo ya bosenyi. Go dutše go le bjalo, ga se ka retela maikwelong. Ge ke bogetše ditaba, ke selekišwa ke go ata ga go phuhlama ga boitshwaro le tshenyego lefaseng le. Ke leboga Jehofa gore ke kwešiša lebaka leo ka lona bosenyi bo atilego gotee le kholofelo yeo re nago le yona ya mehla e mebotse.

‘Kgolego ga se ya ka ya Nkgopamolla Mekgwa.’—KEITH WOODS

NGWAGA WA MATSWALO: 1961

NAGA: LEBOA LA IRELAND

BOPHELO BJA PELE E EBA MOKRISTE: MOTŠHOŠETŠI

BOPHELO BJA KA BJA NAKONG E FETILEGO: Ke belegwe ka 1961 kua Portadown, toropo ya leemaema ka Leboa la Ireland. Ke be ke etšwa lapeng la Maprotestanta, gomme ke goletše lefelong leo go lona go bego go dula Makatholika le Maprotestanta. Malapa a mantši a be a diila ka tekanyo e itšego. Go be go se na tšhelete e ntši, gomme re be re phedišana gabotse.

Ke phetše bophelo bjoo bo se nago seo ke ikgantšhago ka sona. Ka 1974, ke ile ka tsena ‘Mathateng’ ao ka nako yeo a bego a le gona ka Leboa la Ireland. Mo e ka bago ka nako yeo, dilo di ile tša senyegela pele ditikologong tša gabo rena. Ka mohlala, bošegong bjo bongwe tate, yo e bego e le molaodi wa Feketori ya Mebete ya Ulster, o be a le mošomong a tlwaetša masogana a mabedi a Makatholika ao a bego a dula kgauswi le ga gešo lefelong leo re bego re dula go lona. Nakong yona yeo, motho tsoko o ile a foša pomo ka lefasetere la phapoši ya bodulo ya ntlo yeo bašemane ba Makatholika ba bego ba dula go yona gomme ya bolaya tatago bona, mmago bona le ngwanabo bona.

Mathata a ile a gola gomme gwa tsoga ntwa. Dintlo tša Maprotestanta di ile tša fišwa e le go a raka mafelong a Makatholika, gomme Makatholika ona a be a swerwe gampe mafelong a Maprotestanta. Lefelo la rena e ile ya ba la Maprotestanta feela. Go se go ye kae ke ile ka swarwa gomme ka ahlolelwa nywaga e meraro kgolegong ka baka la go akaretšwa ga ka go fošweng ga dipomo.

Ge ke be ke le kgolegong, ke ile ka gwerana le mogolegwa yo a bego a tumile bathong bao e bego e le bathekgi ba mokgatlo o itšego wa dipolitiki. Re be re le bjalo ka barwarre, gomme ka morago ka ba mofelegetši wa gagwe yo mogolo lenyalong la gagwe. Kgolego ga se ya ka ya kgopamolla mekgwa ya gagwe goba ya ka. Ge re be re lokollwa, re ile ra leba thwii medirong ya rena ya dipolitiki gomme nakong yeo ra nwelela go yona. Ka baka leo, mogwera wa ka o ile a ikhwetša a boetše kgolegong. O ile a bolaelwa gona.

Le nna ke ile ka šalwa morago, gomme lebakeng le lengwe koloi ya ka e ile ya thuntšhwa ka pomo. Eupša ditiragalo tšeo di ile tša fo ntira gore ke fišegele dipolitiki le go feta.

 Nakong yeo, ke ile ka thuša go dira lenaneo la thelebišene la mabapi le “Mathata,” leo le bego le gašwa thelebišeneng ya Brithania. Lenaneo leo le ile la mpakela mathata a oketšegilego. Ka mohlala, bošegong bjo bongwe ge ke fihla gae ke ile ka hwetša mosadi wa ka a ntlogetše. Kapejana ka morago ga moo, ke ile ka tšeelwa morwa wa ka ka baka la lenaneo leo la thelebišene. Ke gopola ke itebelela ka seiponeng gomme ke re, “Modimo nthuše, ge e ba o le gona.”

Mokibelong o latetšego, ke ile ka kopana le motho yo ke bego ke tlwaelane le yena yo a bitšwago Paul, yoo a bego a fetogile yo mongwe wa Dihlatse tša Jehofa. O ile a thoma go boledišana le nna ka Beibele. Ka morago ga matšatši a mabedi, Paul o ile a nthomela kopi wa Morokami. Sehlogo sa ka makasineng woo se be se tsopola mantšu a Jesu ao a begilwego go Johane 18:36. O itše: “Mmušo wa ka ga se karolo ya lefase le. Ge nkabe mmušo wa ka e be e le karolo ya lefase le, bahlanka ba ka ba ka be ba lwela gore ke se ke ka gafelwa Bajuda. Eupša ka mo go lego ka gona, mmušo wa ka ga o tšwe mono.” Mantšu ao a ile a nkgoma kudu. Letšatšing leo bophelo bja ka bo ile bja thoma go fetoga.

KAMOO BEIBELE E FETOTŠEGO BOPHELO BJA KA: Paul o ile a thoma go ithuta Beibele le nna. Ka morago, Bill, e lego Hlatse e nngwe, o ile a tšwetša pele thuto yeo. Ke a tseba gore go be go se bonolo go ithuta le nna; ke be ke ena le dipotšišo tše dintši kudu! Gape ke be ke tliša baruti ba bantši ba bodumedi legaeng la ka gore ba tlo bontšha Bill gore o fošitše. Eupša ke be ke bona therešo ya Lentšu la Modimo.

Ke gopola lebakeng le lengwe ke botša Bill gore a se ke a tla ga ka go tlo ithuta le nna ka gobane ditsela di be di thibilwe lefelong la rena gomme go be go se na pelaelo gore koloi ya gagwe e be e tla thopša ya fišwa. Lega go le bjalo, Bill o ile a tla go ithuta bjalo ka mehleng. O ile a tlogela koloi ya gagwe gae gomme a tla ka paesekele. Ke mang yo a bego a ka thopa paesekele? Lebakeng le lengwe, nna le Bill re be re dutše legaeng la ka re ithuta Beibele ge maphodisa le mašole a etla go tlo ntshwara. Ge a le gare a ntšea, Bill o ile a goeletša gomme a mpotša gore ke bote Jehofa. Ditiragalo tšeo di ile tša nkgoma kudu.

Dihlatse tše dingwe tša Jehofa di swanetše go ba di ile tša tšhoga ge ke be ke thoma go ya dibokeng tša tšona Holong ya Mmušo. Ke be ke ena le moriri o motelele e bile ke rwele lengina, gomme ke be ke apere baki ya letlalo yeo e bego e ntlhaola ke le wa mokgatlo o itšego wa dipolitiki. Lega go le bjalo, ga se ka kgolwa kamoo Dihlatse di ilego tša ntshwara gabotse ka gona. Ke ile ka kgahlwa ke botho bja tšona e le ruri.

Gaešita le ge ke be ke ithuta Beibele, ke be ke sa dutše ke gwerane le bagwera ba ka ba kgale. Lega go le bjalo, mafelelong ditherešo tšeo ke bego ke ithuta tšona ka Beibeleng di ile tša thoma go nwelela pelong ya ka. Ke ile ka lemoga gore ge e ba ke be ke nyaka go hlankela Jehofa, ke be ke swanetše go fetoša dipono tša ka ka dipolitiki le go fetoša bagwera ba ka. Go be go se bonolo go dira seo. Eupša ke ile ka kgona go dira diphetogo ge ke dutše ke ithuta mo gontši ka Beibele gomme ke hwetša matla go Jehofa. Ke ile ka kota moriri wa ka, ka rola lengina gomme ka reka sutu. Seo ke bego ke ithuta sona se ile sa thoma le go kaonefatša pono yeo ke bego ke ena le yona ka batho ba bangwe.

KAMOO KE ILEGO KA HOLEGA KA GONA: Ke be ke phetše bophelo bja bosenyi le botšhošetši. Ke be ke tsebja kudu ke dihlopha tša go kgonthišetša gore molao o a latelwa setšhabeng. Bjale dilo di fetogile. Ka mohlala, ge ke be ke thoma go ya kopanong ya ka ya pele ya Dihlatse tša Jehofa, yeo e bego e swaretšwe toropong ya Navan, maphodisa a ile a mphelegetša leeto ka moka go phatša Ireland le Leboa la Ireland. Lega go le bjalo, ga bjale ke ya dikopanong ke sa felegetšwe. Le gona, ga bjale ke tšea karolo ka bolokologi modirong wa boboledi ke ena le Paul le Bill gotee phuthego ka moka.

Ge bophelo bja ka bo dutše bo kaonefala, ke ile ka dudišega ka phuthegong. Ke ile ka kopana le Hlatse yeo e bitšwago Louise moo, gomme ra nyalana. Go oketša moo, ke ile ka boelana le morwa wa ka.

Ge ke gadima morago bophelong bja ka, ke itshola gore ke ile ka kweša ba bangwe bohloko le go ba gobatša. Eupša ke kgodišegile e le ruri gore Beibele e dira gore batho ba swanago le nna ba fetoše bophelo bja ditiro tše fošagetšego gore bo be le morero le kholofelo.

[Mongwalo wa ka tlase]

[Ntlhakgolo go letlakala 12]

Mma o ile a selekega kudu ge a lemoga gore ke be ke bala Beibele