“MOTHO [o] buša yo mongwe gore a mo gobatše.” (Mmoledi 8:9) Mantšu ao a ngwadilwego mo e ka bago nywaga e 3 000 e fetilego, a hlalosa gabotse lefase leo re phelago go lona. Batho ba na le mokgwa wa go diriša matla a bona gampe, go sa šetšwe gore ke bomang goba gore ba dula kae. Gantši ba a diriša kudu bathong bao ba hlaselegago gabonolo le bao ba sa kgonego go itirela selo. Jehofa o ikwa bjang ka ditiro tše bjalo tša go hloka toka? Re hwetša karabo go Hesekiele 22:6, 7, 31.—Bala.

Molaong wa gagwe wo a bego a o neile Baisiraele, Jehofa o bontšhitše gabotse gore bao ba lego matleng a taolo le ka mohla ga ba swanela go diriša matla a bona gampe. O be a tla šegofatša setšhaba ge feela baetapele ba be ba swara babotlana le badiidi ka botho le ka go ba naganela. (Doiteronomio 27:19; 28:15, 45) Lega go le bjalo, mehleng ya Hesekiele dikgošana tša Jerusalema le Juda di be di diriša matla a tšona ka ditsela tše šoro. Go be go direga eng?

Dikgošana di be di diriša ‘matsogo a tšona gore a tšholle madi.’ (Ditemana 6) Lentšu “letsogo” le emela matla goba matla a taolo. Phetolelo e nngwe e re: “Dikgošana tša Isiraele di dirišitše matla a tšona go tšholla madi.” Go ka ba le toka bjang mola baetapele bao ba swanetšego go šireletša molao le go o kgothaletša ba diriša matla a bona gampe le go bolaya batho ba se nago molato?

Ka morago ga moo, go molaleng gore Hesekiele o be a sa sole baetapele feela, eupša o be a sola gape le bao ba bego ba ba latela ka go se kwe Molao wa Jehofa. Hesekiele o re: “Di swara botate le bomma ka lenyatšo.” (Temana 7) Ka go hlokomologa maemo a batswadi, batho ba ile ba senya motheo wa setšhaba, e lego lapa.—Ekisodo 20:12.

Batho ba sa lokago ba ile ba hlakiša bao ba hlaselegago ga bonolo gare ga bona. Tiro e nngwe le e nngwe ya go tshela molao e ile ya bontšha go hlokomologa moya wa lerato wo o bego o le Molaong wa Modimo wo a bego a o neile Baisiraele. Ka mohlala, Molao wa Modimo o be o laetše Baisiraele gore ba bontšhe tlhokomelo e kgethegilego go bao e sego Baisiraele bao ba lego gare ga bona. (Ekisodo 22:21; 23:9; Lefitiko 19:33, 34) Eupša batho ba ile ba swara badiiledi “ka boradia.”—Temana 7.

Batho gape ba ile ba hlakiša bao ba bego ba sa kgone go itšhireletša, e lego “tšhiwana le mohlologadi.” (Temana 7) Jehofa o tšeela godimo kudu dinyakwa tša bao ba lahlegelwago ke batswadi goba balekane lehung. Modimo o holofeditše gore o tla ahlola bao ba hlakišago bana bao ba sa kgonego go itirela selo goba bahlologadi.—Ekisodo 22:22-24

Ka ditsela tše le tše dingwe, Baisiraele ba mehleng ya Hesekiele ba ile ba bontšha go se hlomphe Molao wa Modimo, wo o theilwego leratong. Jehofa o be a tla dira’ng? O ile a holofetša gore: “Ke tla tšhollela bogale bja ka godimo ga bona.” (Temana 31) Go ya ka mantšu a gagwe, o ile a dumelela Bababilona go fediša Jerusalema le go iša batho ba yona bothopša ka 607 B.C.E.

Mantšu a Hesekiele a re ruta dithuto tše tše pedi ka Jehofa le ka go hloka toka: Ya pele, o hloile go hloka toka, ya bobedi, o šokela bahlaselwa bao ba se nago molato. Modimo ga se a fetoga. (Maleaki 3:6) O holofetša gore go se go ye kae o tla fediša go hloka toka le bao ba go kgothaletšago. (Diema 2:21, 22) Ke ka baka la’ng o sa ithute ka mo go oketšegilego ka Modimo yo ‘a ratago toka’ le gore ke bjang o ka batamelago kgauswi le yena?—Psalme 37:28.

Mmalo wa Beibele o šišintšwego bakeng sa August:

▪ Hesekiele 21-38

[Ntlhakgolo go letlakala 27]

Jehofa o bontšhitše gabotse gore bao ba lego matleng a taolo le ka mohla ga ba swanela go diriša matla a bona gampe