Na Ruri Mehlolo e ka Direga?—Dikganetšo tše Tharo tše Tlwaelegilego

KGANETŠO 1: Mehlolo ga e direge ka gobane e roba melao ya tlhago. Kwešišo ya rena ka melao ya tlhago e theilwe go seo borathutamahlale ba se bonego se direga tlholong. Lega go le bjalo, melao yeo e swana le melao ya popopolelo ya leleme le itšego—go na le dinako tšeo molao o ka se latelwego. Kwešišo ya rena ka melao ye ya tlhago ge e le gabotse e ka ba e nyenyane kudu. (Jobo 38:4) Rathutamahlale yo a ineetšego a ka ba a feditše bophelo bja gagwe ka moka a ithuta molao o itšego wa tlhago. Eupša go ka ba le selo setee seo se ka dirago gore a hlahlobe lefsa kwešišo ya gagwe ka molao woo. Bjalo ka ge polelwana e nngwe e bolela, “Lepidibidi letee feela le leso le phumola kgopolo ya gore mapidibidi ka moka ke a mašweu.”

Go na le kanegelo ya metlae yeo e bontšhago kamoo go lego bonolo ka gona go thea kgopolo ditherešong tše sa felelago. John Locke (1632-1704) o ile a anega kanegelo ye ya mabapi le moemedi wa mmušo wa Madutch le kgoši ya Siam: Ge moemedi wa mmušo a be a hlalosetša kgoši ka naga ya gabo, ya Holland, o ile a bolela gore ka dinako tše dingwe tlou e be e kgona go sepela godimo ga meetse. Kgoši e ile ya gana kgopolo yeo gomme ya nagana gore moemedi yoo wa mmušo o be a mmotša maaka. Lega go le bjalo, moemedi wa mmušo o be a fo ba a hlalosa selo seo kgoši e bego e sa ka ya se bona. Kgoši e be e sa lemoge gore ge meetse a be a kgahla gomme a fetoga lehlwa, a be a ka kgona go rwala boima bja tlou. Kgoši e be e bona se se sa kgonege ka gobane e be e se na mabaka ka moka.

Ela hloko dilo tšeo di fihleletšwego mehleng ya rena tšeo di ka bego di be di bonagala di sa kgonege nywagasomeng e sego kae feela e fetilego:

● Sefofane se ka kgona go fofa se rwele batho ba fetago 800 se sa eme felo go tloga New York go fihla Singapore, se fofa ka lebelo le le sa fetogego la dikhilomithara tše 900 ka iri.

 ● Di-video conference di ka dira gore batho ba dikontinenteng tše di fapanego ba kgone go boledišana ba bonana sekirining.

● Go ka bolokwa dikoša tše dikete sedirišweng seo se fetwago ke lepokisana la mankgwari ka bogolo.

● Babui ba ka kgona go bjalolla dipelo le ditho tše dingwe tša mmele.

Ke phetho efe e kwagalago yeo re ka e dirago mabapi le dilo tše bjalo? Re ka dira phetho ye: Ge e ba batho ba kgona go dira dilo tšeo di bego di bonagala di sa kgonege nywageng e sego kae e fetilego, gona Modimo yo a bopilego legohle le tšohle tšeo di lego go lona a ka dira ditiro tše di makatšago tšeo re sa kgonego go di kwešiša goba go di dira ga bjale. *—Genesi 18:14; Mateo 19:26.

KGANETŠO 2: Beibele e ithekgile ka mehlolo go dira gore batho ba be le tumelo. Beibele ga e re botše gore re dumele mehlolo ka moka. Ge e le gabotse, e bolela se se fapanego. Beibele e re lemoša gore re be šedi kudu ge go tliwa tabeng ya go dumela mehlolo le dipontšho tše matla. Ela hloko temošo ye yeo e kwagalago: “Yo go tla ga gagwe [motho wa go hloka molao] go lego ka ditiro tše matla ka moka le dipontšho le mehlolo ya maaka ka tiro ya Sathane, le gona ka phapošo ka moka ya bokgopo.”—2 Bathesalonika 2:9, 10, PK.

Jesu Kriste le yena o ile a lemoša gore ba bantši ba be ba tla bolela gore ba a mo latela eupša e se balatedi ba gagwe ba kgonthe. Ba bangwe ba be ba tla re go yena: “Morena, Morena, na ga se ra ka ra porofeta ka leina la gago, ra leleka batemona ra ba ra dira mehlolo ka leina la gago?” (Mateo 7:22, NIV) Eupša Jesu o boletše gore a ka se amogele batho bao bjalo ka barutiwa ba gagwe. (Mateo  7:23) Ka gona, go molaleng gore Jesu ga se a ka a ruta gore mehlolo ka moka e tšwa go Modimo.

Modimo ga a botše barapedi ba gagwe gore ba fo thea tumelo ya bona mehlolong. Go e na le moo, tumelo ya bona e swanetše go thewa ka mo go tiilego ditherešong.—Baheberu 11:1.

Ka mohlala, a re eleng hloko o mongwe wa mehlolo yeo e tsebjago kudu yeo e begilwego ka Beibeleng, e lego tsogo ya Jesu Kriste. Nywageng e itšego ka morago ga tiragalo yeo, Bakriste ba bangwe ba Korinthe ba ile ba thoma go belaela taba ya ge e ba Jesu a ile a tsošwa. Moapostola Paulo o ile a thuša Bakriste bao bjang? Na o ile a fo re, “Ebang le tumelo e oketšegilego”? Aowa. Ela hloko kamoo a ilego a ba gopotša ditherešo tše di tiilego ka gona. O ile a bolela gore Jesu “o ile a bolokwa, gore o tsošitšwe ka letšatši la boraro go ya ka Mangwalo, gore o iponagaditše go Kefase ke moka ka morago go ba lesomepedi. Ka morago ga moo a iponagatša go bana bešo ba ka godimo ga ba makgolohlano ka nako e tee, bao bontši bja bona ba sa dutšego ba na le rena.”—1 Bakorinthe 15:4-8.

Na go be go ena le taba gore Bakriste bao ba be ba dumela mohlolo woo goba ba sa o dumele? Paulo o tšwela pele ka gore: “Ge e ba Kriste a se a tsošwa, gona boboledi bja rena ruri ke bja lefeela gomme tumelo ya rena ke ya lefeela.” (1 Bakorinthe 15:14) Paulo o be a sa tšeele taba yeo fase. Mohlolo wa go tsošwa ga Jesu e be e swanetše go ba therešo goba maaka! Paulo o be a tseba gore ke therešo ka baka la dipego tše makgolo tša dihlatse tšeo di bonego ka mahlo tšeo di bego di sa phela ka nako yeo. Ge e le gabotse, dihlatse tšeo tše di bonego ka mahlo di be di ikemišeditše go hwa go e na le go gana seo di bego di se bone.—1 Bakorinthe 15:17-19.

KGANETŠO 3: Mehlolo e fo ba ditiragalo tša tlhago tšeo di sa kwešišwego ke batho ba sa rutegago. Diithuti tše dingwe di leka go hlalosa gore mehlolo ya ka Beibeleng e fo ba e le ditiragalo tša tlhago tšeo di diregilego ntle le gore Modimo a tsene ditaba gare. Di nagana gore se se dira gore dipego tša Beibele di dumelwe gabonolo. Gaešita le ge e le therešo gore ditiragalo tša tlhago di ile tša sepedišana le mehlolo e mengwe—ditiragalo tše bjalo ka ditšhišinyego tša lefase, dikotlo le go kgerega ga mobu—ditlhaloso tša diithuti tšeo di swana ka selo setee. Di hlokomologa nako yeo mehlolo yeo e hlaloswago ka Mangwalong e diregilego ka yona.

Ka mohlala, ba bangwe ba phegile kgang ka gore kotlo ya pele yeo go otlilwego Egipita ka yona, ya go dira gore meetse a Noka ya Nile a fetoge madi, ge e le gabotse e be e bakilwe ke mobu o mohwibidu woo o bego o gogoletšwe ka nokeng ya Nile, gotee le diphedi tša mmala o mohwibidu tšeo di bitšwago di-flagellate. Lega go le bjalo, pego ya Beibele e re meetse a noka a ile a fetoga madi, e sego leraga le lehwibidu. Go bala Ekisodo 7:14-21 ka kelohloko go bontšha gore mohlolo wo o diregile nakong ya ge Arone a be a itia meetse a Noka ya Nile ka lepara la gagwe, a laetšwe ke Moshe. Gaešita le ge e ba meetse a noka yeo a ile a fetošwa ke tiragalo ya tlhago, nako yeo Arone a iteilego meetse a noka ka boyona e be e le mohlolo!

Ela hloko mohlala o mongwe wo o bontšhago bohlokwa bja nako yeo mohlolo o diregago ka yona, e lego wa mabapi le seo se diregilego ge setšhaba sa Isiraele se be se le kgauswi le go tsena Nageng ya Kholofetšo. Tsela ya sona e be e thibilwe ke Noka ya Jorodane nakong ya mafula. Pego ya Beibele e re botša seo se diregilego ka morago, ka gore: “Nakong ya ge barwadi ba Areka ba fihlile Nokeng ya Jorodane gomme dinao tša baperisita bao ba rwelego Areka di tsena moo meetse a gomago gona . . . , meetse ao a theogago a etšwa ka godimo a ema. A ema wa letamo a le kgole kua Adama.” (Joshua 3:15, 16) Na se se be se bakilwe ke tšhišinyego ya lefase goba go kgerega ga mobu? Pego ga e re’alo. Eupša nako yeo tiragalo ye e diregilego ka yona e be e le mohlolo. E diregile ka yona nako yeo Jehofa a bego a boletše gore e be e tla direga ka yona.—Joshua 3:7, 8, 13.

Ka gona, na o a dumela gore mehlolo e gona? Beibele e re e gona. Go ya ka seo e re botšago sona, mehlolo ga e fo ba ditiragalo tša tlhago. Bjale, na go a kwagala go bolela gore ga go kgonege gore e direge feela ka gobane e sa direge ka mehla?

[Mongwalo wa ka tlase]

[Seswantšho go letlakala 5]

Nywagasomeng e sego kae feela e fetilego, ba bantši ba be ba ka nagana gore ga go kgonege gore batho ba sepele ka sefofane seo se fofago ka lebelo la dikhilomithara tše makgolo ka iri