KE BELEGETŠWE Ilocos Norte, Philippines, ka December 10, 1968, gomme ke wa bošupa baneng ba lesome. Go swana le batho ba bantši ba Philippines, re ile ra godišwa re le Makatholika. Ke feditše sekolong se phagamego ka 1986, gomme ke be ke duma go ba mooki. Lega go le bjalo, toro yeo ga se ya ka ya phethagala ka gobane ke ile ka babja o šoro. Ge e le gabotse, ke be ke nagana gore ke tlo hwa. Ka ge ke be ke le tlalelong, ke ile ka lopa Modimo gore a nthuše gomme ka mmotša gore ge ke be nka fola, ke be ke tla mo hlankela bophelo bja ka ka moka.

Ge ke fola ka morago ga nako e telele, ke ile ka gopola kholofetšo ya ka go Modimo. Ka gona, ka June 1991, ke ile ka ingwadiša sekolong sa Beibele sa Pentekoste. Go be go thwe tlwaetšo ya sekolong e be e akaretša go hwetša “mpho e sa lefelelwego ya moya o mokgethwa.” Ke be ke nyaka go ba le matla a go fodiša. Sekolo se be se re rutile gore matla a a be a ka hwetšwa ge e ba motho a ikona dijo le go rapela. Lebakeng le lengwe, ge ke be ke leka go dira gore ba nagane gore ke na le mpho yeo, ke ile ka theetša morutwanagotee le nna yoo a bego a rapela ka go hlaboša a le sekhutlwaneng a sa mpone nakong ya go rapela. Ge a be a le kgauswi le go fetša, ke ile ka kitimela moo ke bego ke khuname gona. Ka morago, ka mmotša gore o be a kgopela eng thapelong ya gagwe, gomme a dumela gore bjale ke be ke ena le ‘mpho yeo ye e sa lefelelwego’!

Gaešita le ge ke be ke tšwetša pele dithuto tša ka moo sekolong, ke be ke ena le dipotšišo tše dintši. Ka mohlala, Mateo 6:9 e bolela ka ‘Tate’ le ka “leina” la gagwe. Ke ile ka botšiša dipotšišo tše bjalo ka tše rego, “Tate yoo Jesu a bolelago ka yena ke mang?” le “Ke leina la mang leo le swanetšego go kgethagatšwa?” Dikarabo tša bahlahli ba ka gantši di be di sa kwagale gabotse e bile di sa kgotsofatše. Ba be ba bolela ka Boraro Botee gomme ba re ke sephiri. Seo se ile sa nkgakantšha kudu. Go sa šetšwe seo, ke ile ka tšwela pele ka tlwaetšo ya ka ya go ba moruti.

Sekolong sa Beibele, re ile ra rutwa gore Dihlatse tša Jehofa di be di godiša bodumedi bjo bogolo bja maaka. Gape di be di bitšwa balwa-le-Kriste. Ke ile ka thoma go hloya bodumedi bjo.

Ngwageng wa ka wa bobedi ke le sekolong, ke ile ka etela batswadi ba ka gae nakong ya maikhutšo. Yo mongwe wa bomogolwake, e lego Carmen, o ile a kwa gore ke gona gae gomme le yena a etela gae. E be e šetše e le modiredi yo a kolobeditšwego le wa nako e tletšego wa Dihlatse tša Jehofa. Ge a be a leka go nthuta ka Modimo, ke ile ka mo araba ke galefile o šoro ka re: “Ke šetše ke tseba Modimo yoo ke mo hlankelago!”  Ka morago ga go mo roga ke hlabošitše lentšu, ke ile ka mo kgorometša gomme ka se sa mo fa sebaka se sengwe sa go bolela le nna.

Ge ke se na go boela sekolong sa Beibele, Carmen o ile a nthomela kopi ya poroutšha ya Na o Swanetše go Dumela Boraro Botee? * Gateetee ke ile ka e šošobanya gomme ka e lahlela mollong. Ke be ke sa mmefeletše.

Ge ke tšwetša pele dithuto tša ka sekolong sa Beibele, ke ile ka kgona go sokolla batho ba itšego. Ke ile ka thaba kudu ge mma le kgaetšedi ya ka ba be ba ntlatša bodumeding bja Pentekoste.

Ka March 1994, ke ile ka aloga sekolong sa Beibele sa Pentekoste. Bjalo ka ge go boletšwe matsenong, moebangedi yo a bego a re etetše o be a le gona ka nako yeo. Ka moka ga rena dialoga re be re nyaka go ba le yena ka gobane re be re dumela gore o be a ena le matla a go fodiša. Re ile ra ema le yena sethaleng, re tabogataboga le go opa magoswi le yena re sepedišana le modumo wa diletšo. Ke moka, yo mongwe le yo mongwe yoo a bego a mo kgwatha o be a ewa, a “bolawa moyeng.” * Ge a be a nkgwatha, le nna ke ile ka wa gomme ka idibala. Ge ke phafoga, ke be ke tšhogile, eupša ke ile ka kwa gore bjale ke be ke ena le matla a go fodiša, ka baka leo ke ile ka thaba.

Kapejana ka morago ga moo, ke ile ka diriša matla ao go fodiša ngwana yoo a bego a babja kudu a ena le letadi le lešoro. Ge ke be ke rapela, gateetee ngwana yoo o ile a thoma go tšwa kudumela gomme letadi leo la fela. Mafelelong, ke ile ka ikwa nka phethagatša kholofetšo ya ka go Modimo. Lega go le bjalo, seo se makatšago ke gore ke ile ka ikwa ke sa kgotsofala. Ka garegare, ke be ke dumela gore go na le Modimo o tee feela, eupša ke be ke sa nape ke mo tseba. Le gona, ke be ke ena le dipelaelo tše hlobaetšago ka dithuto tše dintši tša kereke.

Ka morago ga ditiragalo tšeo, ke ile ka hloya Dihlatse tša Jehofa le go feta. Nako le nako ge ke hwetša dikgatišo tša Dihlatse, ke be ke di tšhuma. Ke moka, go ile gwa direga selo se sengwe se sa letelwago. Ke ile ka makatšwa ke go kwa gore mma o be a se sa nyaka bodumedi bja rena. Carmen o be a ithuta Beibele le yena! Ke ile ka befelelwa mogolwake kudu.

Ke moka ke ile ka hwetša makasine wa Phafoga! ka ngwakong wa mma. Ka mo go tlwaelegilego ke be ke tla o tšhuma. Eupša ka ge ke be ke nyaka go tseba seo a bego a se bala, ke ile ka phetla matlakala a yona ka lebelo. Ke ile ka bona sehlogo seo se lego mabapi le motho yoo e kilego ya ba modumedi yoo a tiilego wa seo kereke e bego e se ruta. Lega go le bjalo, ge a be a thoma go bala dikgatišo tša Dihlatse gotee le Beibele, o ile a kgodišega gore dithuto tša Boraro Botee, dihele le go se hwe ga moya e be e se tša mangwalo. Pelo ya ka e ile ya kgomega. Tšeo ke tšona dilo tšeo ke bego ke nyaka go di kwešiša. Go tloga ka nako yeo, ke ile ka hlologelwa nako yeo ka yona ke tlago go kwešiša therešo ya Beibele.

Ka morago ga go bala sehlogo se sengwe ka makasineng wa Phafoga! seo se bolelago ka motho yo a bego a lemaletše bjala le dihlaretagi yoo  a ilego a dira diphetogo tše dikgolo gomme a kaonefatša bophelo bja gagwe ka baka la go ithuta Beibele, ke ile ka thoma go bala dikgatišo tše oketšegilego tša Dihlatse. Ke ile ka hwetša kopi ya poroutšha ya Leina la Modimo Leo le Tlago go ba Gona ka mo go sa Felego. * Ge ke bala poroutšha yeo, ke ile ka ithuta gore leina la Modimo ke Jehofa. Ke ile ka thabišwa kudu ke go ithuta therešo ka Modimo a nnoši wa therešo!—Doiteronomio 4:39; Jeremia 10:10.

Ke ile ka tšwela pele ke bala ka sephiring le go ithuta ditherešo tše dingwe tše dintši tša Beibele. Ka mohlala, sekolong sa Pentekoste ke be ke rutilwe gore Jesu ke Modimo, eupša ke ile ka ithuta go tšwa Beibeleng gore Jesu ke “Morwa wa Modimo yo a phelago.”—Mateo 16:15, 16.

Ge ke be ke bona Carmen gape, o ile a makala ge ke be ke mo kgopela kopi ya poroutšha ya Leina la Modimo Leo le Tlago go ba Gona ka mo go sa Felego le dikgatišo tše dingwe. Ke be ke feditše nywaga e mentši ke le sekolong seo sa Beibele, eupša ke be ke se ka rutwa therešo moo; ke be ke foufaditšwe. Ga bjale ke be ke thabišitšwe kudu ke ditherešo tšeo ke bego ke ithuta tšona ka Beibeleng. Ke ile ka kwešiša ka mo go feletšego seo se bolelwago ke mantšu a Jesu a rego: “Le tla tseba therešo gomme therešo e tla le lokolla.” (Johane 8:32) Ditherešo tšeo di be di thomile go fetoša bophelo bja ka.

Ke ile ka tšea nako e teletšana ke nagana gore nka rapela Jehofa Modimo ka sephiring gomme ka tšwela pele ke le moruti. Go se go ye kae ke ile ka lemoga gore ke be nka se sa kgona go ruta dithuto tše dintši tša kereke. Lega go le bjalo, ke be ke boifa. Ke be ke tla iphediša bjang ge e ba ke tlogela go ba moruti? Kereke e be e tlontlollwa e le ruri ge e ba yo mongwe wa baruti ba yona a fetoga yo mongwe wa Dihlatse tša Jehofa! Ka baka leo ke ile ka tšwela pele ke ruta bjalo ka moruti, eupša ke be ke phema dithuto tša maaka tša kereke.

Ge ke be ke bona mogolwake Carmen gape, o ile a šišinya gore ke ye sebokeng sa Dihlatse tša Jehofa. Ka ge ke be ke tlwaetše go ya kerekeng ya rena e kgolo ya Laoag City, ke ila ka nyaka lefelo la moo la Dihlatse la diboka, Holo ya Mmušo, ka sephiring. Ke ile ka tsebišwa Alma Preciosa Villarin, yoo gape a bego a bitšwa Precious, e lego modiredi wa nako e tletšego wa phuthegong yeo. Gaešita le ge ke be ke sa na le maikwelo a fošagetšego ka Dihlatse, ke ile ka dumela gore a ithute Beibele le nna.

Mogolwake o ile a nthuta ditherešo tša Beibele a sa fele pelo. Ga bjale ke be ke bona moya o swanago wa go se fele pelo go Precious. O ile a nthuša kudu gore ke kwešiše Beibele, gaešita le ge ke be ke ferekana, ke leka go ngangišana le yena e bile ka dinako tše dingwe ke hlaboša lentšu, e le ge ke kgomaretše dilong tše dingwe tšeo ke bego ke di rutilwe nakong e fetilego. Ke ile ka kgongwa kudu ke ge Precious le Dihlatse  tše dingwe ba mpontšha go nkgahlegela, boikokobetšo le boleta. Se se ile sa ntšhušumeletša gore ke nyake go hlankela Jehofa.

Ka July 1995, ke ile ka lemoga gore ke be ke swanetše go fo tlogela maemo a ka bjalo ka moruti. Ka baka la’ng? Kutollo 18:4 e bolela ka bodumedi bja maaka ka tsela ya seswantšhetšo gomme e re: “Etšwang go yena batho ba ka, ge e ba le sa nyake go ba le kabelo le yena dibeng tša gagwe, le ge e ba le sa nyake go amogela karolo ya dikotlo tša gagwe.” Ke be ke tla iphediša bjang? Baheberu 13:5 e nthutile gore ge e ba re dira thato ya Modimo, o holofetša gore: “Le ka mohla nka se ke ka go tlogela le ge e le go go lahla.”

Gaešita le ge tate le kgaetšedi ya ka ga bjale ba be ba nkganetša o šoro, dibeke tše pedi pele ga ge ke kolobetšwa bjalo ka Hlatse, ke ile ka rapa sebete ka ya gae go yo tšhuma dilo ka moka tšeo ke bego ke di diriša modirong wa ka wa nakong e fetilego bjalo ka moruti. Ka morago ga go dira bjalo, ke ile ka lemoga gore matla le ge e le afe a kgethegilego ao ke bego ke ena le ona nakong e fetilego a be a se sa le gona. Nakong e fetilego, ge ke be ke robala, ke be ke ekwa ke ena le segateledi seo se bego se sa tloge. Segateledi seo le sona se ile sa tloga. Meriti yeo ke bego ke e bona lefasetereng la phapoši ya ka e ile ya se sa hlwa e bonagala. Thutong ya ka ya Beibele ke ithutile gore dilo le ge e le dife tšeo go thwego ke dimpho lehono, go swana le matla a go fodiša, ga di tšwe go Modimo eupša di tšwa go meoya e kgopo. Ke thabile kudu gore ke kgonne go tšwa ditutuetšong tša yona, go fo swana le ngwanenyana wa mohlanka yoo Paulo a ilego a mo phološa go “motemona wa bonoge.”—Ditiro 16:16-18.

E ile ya ba mo go thabišago e le ruri go kolobetšwa gotee le mma bjalo ka Dihlatse tša Jehofa ka September 1996! Ka morago ga go kolobetšwa, ke ile ka ingwadiša bjalo ka modiredi wa nako e tletšego wa Dihlatse tša Jehofa gomme ke thabetše go hlankela ke le yena ka nywaga e mentši.

Ga bjale ke nyalane le monna wa ka, e lego Silver. Re šoma ka thata re le mmogo go tlwaetša morwedi wa rena ka tsela ya therešo ya Beibele. Ba bangwe ba bomogolwake le bana ba gešo le bona ba re tladitše go hlankeleng Jehofa. Gaešita le ge ke itshola bakeng sa go fetša nywaga e mentši ke sa tsebe Modimo gabotse, ke thabile kudu gore ga bjale ke tseba Modimo yo ke mo hlankelago.