BA BANGWE ba re go botšiša Modimo dipotšišo go fošagetše. Ba ka ba ba nagana gore go botšiša Modimo lebaka la gagwe la go dumelela gore dilo tše itšego di direge goba di se ke tša direga ke go hloka tlhompho. Na o bona dilo ka tsela yeo?

Ge e ba go le bjalo, o ka makatšwa ke go kwa gore batho ba bantši ba lokilego ba ile ba botšiša Modimo dipotšišo. Ela hloko mehlala e latelago ya dipotšišo tšeo ba ilego ba mmotšiša tšona:

Monna yo a botegago Jobo o itše: “Go re’ng ba kgopo ba tšwela pele ba phela, ba tšofetše e bile ba humile le dinala?”—Jobo 21:7.

Moporofeta yo a botegago e lego Habakuku o itše: “Ke ka baka la’ng o lebelela baradia, moo o bilego o homola ge yo kgopo a metša yo a mo phalago ka go loka?”—Habakuku 1:13.

Jesu Kriste o itše: “Modimo wa ka, Modimo wa ka, o ntlogeletše’ng?”—Mateo 27:46.

Ge o ka bala ditemana tšeo di dikologilego ditsopolo tše, o tla bona gore ga go na seo se bontšhago gore Jehofa * Modimo o ile a hlabja ke ge a botšišwa dipotšišo tše bjalo tšeo di botšišwago ka go botega. Ge e le gabotse, go di dumelela ga gagwe ga go re makatše. Ka mohlala, Modimo ga a tenwe ke ge re kgopela gore a kgotsofatše dinyakwa tša nama tša motheo tšeo di dirago gore mebele ya rena e dule e phetše gabotse. O kgotsofatša dinyakwa tšeo ka lethabo. (Mateo 6:11, 33) Ka mo go swanago, o thabela go re fa tsebišo yeo e ka dirago gore menagano le maikwelo tša rena di dule di phetše gabotse. (Bafilipi 4:6, 7) Ge e le gabotse, Jesu o ile a botša barutiwa ba gagwe gore: “Tšwelang pele le kgopela, le tla newa.” (Mateo 7:7) Taba e dikologilego kholofetšo ya Jesu e bontšha gore o be a sa bolele feela ka go hwetša dilo tše di bonagalago eupša o be a bolela le ka go hwetša dikarabo tša dipotšišo tše bohlokwa.

Ge o be o ka fiwa sebaka, ke efe ya dipotšišo tše di latelago yeo o bego o ka rata go e botšiša Modimo?

• Na bophelo bja ka bo na le morero?
• Go tla direga eng ge ke ehwa?
• Ke ka baka la eng o dumelela ke tlaišega?

Ka ge “Lengwalo ka moka le buduletšwe ke Modimo,” o tla hwetša dikarabo tšeo Modimo a di neago ka Lentšung la gagwe, Beibele. (2 Timotheo 3:16) Ela hloko seo se dirilego gore batho ba bantši ba botšiše dipotšišo tšeo di lokeleditšwego ka mo godimo le dikarabo tšeo di newago ke Beibele.