Moya wa Keresemose
“Go bonolo go swarega leemaemeng la sehla se. Ditlwaelo tša dinakong tša maikhutšo di fo dirwa ka gobane e le setlwaedi, gomme nako yeo e fetšwago le ba lapa le bagwera e ka kopafatšwa ke go swarega kudu. Lethabo leo re swanetšego go ba le lona ka dinako tše dingwe le širwa ke kgateletšego yeo re nago le yona.”—BRAD HENRY YO E KILEGO YA BA MMUŠI WA OKLAHOMA [U.S.A.], DECEMBER 23, 2008
GE SEHLA sa Keresemose se dutše se batamela, dikoša, difilimi le mananeo a thelebišene di kgothaletša moya wa lethabo wa nako ya maikhutšo—moya wa Keresemose. O nagana gore ke eng seo e swanetšego go ba karolo e kgolo kudu ya moya woo? Na e ka ba
- Go gopola Jesu Kriste?
- Go thabela go nea?
- Go thuša bahloki?
- Go fetša nako le ba lapa?
- Go kgothaletša khutšo?
Bjalo ka ge Mmuši Henry, yo a tsopotšwego pejana, a boletše, ba bantši bao ba ketekago Keresemose ba thatafalelwa ke go fihlelela le ge e le efe ya dipakane tšeo sehleng sa nako ya maikhutšo. Nako ya Keresemose gantši e ba ya leemaema, e bakago kgateletšego e bile, ka godimo ga tšohle, ke nako ya kgwebo. Na ga go kgonege go hwetša lethabo le lerato tšeo e swanetšego go ba karolo ya Keresemose?
Beibele e re kgothaletša gore ka moka ga rena re gopole Jesu Kriste, re nee ka seatla se se bulegilego, re thuše bahloki le go fetša nako le ba malapa a rena. Gape e re ruta kamoo re ka bago le khutšo ka gona. Ka baka leo, go e na le go hlahloba lebaka la gore ba bantši ba se ke ba keteka Keresemose, * lelokelelo le la dihlogo le tla ahlaahla dipotšišo tše di latelago:
- Ba bangwe ba nagana gore lebaka la go keteka Keresemose e swanetše go ba lefe?
- Ke ka baka la’ng e le tlhohlo go hwetša seo ba hutšago go se hwetša nakong ya Keresemose?
- Ke melao efe ya motheo ya Beibele yeo e thušitšego ba dimilione go hwetša selo seo se phalago Keresemose?
^ ser. 10 Bakeng sa mabaka a Mangwalo ao ka ona batho ba bangwe ba dirilego phetho ya go se keteke Keresemose, bona sehlogo se se rego “Babadi ba Rena ba a Botšiša—Ke ka Baka la Eng Batho ba Bangwe ba sa Keteke Keresemose?” go letlakala 10.