Ke belegetšwe torotswaneng ya Texcoco. Ka nako yeo, ditsela tše dintši e be e le tša lekgwara e bile di tupa lerole. Go be go tlwaelegile go bona batho ba tšwago metsaneng ya kgauswi ba etla toropong le dipokolo tša bona tšeo di rwaleletšego dilo go tlo rekiša. Re be re le lapa leo le diilago kudu la bana ba senyane, gomme nna ke be ke le wa bošupa go bona. Tate o be a hlokomela lapa ka go lokiša di-guarach (diramphašane tša go rwalwa nageng). Eupša o ile a hlokofala ge ke be ke ena le nywaga e šupa. Go tloga ka nako yeo go ya pele, mma o ile a katana gore a fepe lapa.

Rakgolo o be a bapala violin e bile e le moopediši wa sehlopha sa diletšo tša mmino wa classic wa bodumedi. Mo e nyakilego go ba ditho ka moka tša lapa lešo di be di bapala seletšo se itšego sa mmino. Mma o be a opela sehlopheng sa kereke, gomme malome e be e le seopedi sa mmino wa opera gape e le sebapadi sa piano. Re be re sekametše bodumeding—ke be ke le mošemane yo a šomago aletareng, gomme ke ena le toro ya go ba moromiwa wa Katholika. Ka nako e swanago, ke be ke rata difilimi tša karate. Go bogela ga ka difilimi tšeo kudu go be go dira gore ke be yo šoro kudu.

Ke ile ka tsena sekolo sa bodumedi seo se bego se šoma bjalo ka sekolo sa boruti kua Puebla. Pakane ya ka e be e le go ba moruti wa Katholika. Eupša ngwageng wa mafelelo ge ke fetša dithuto tša ka, Kereke ya Katholika e ile ya nnyamiša. Mosadi yo mofsa wa moitlami o ile a nkgoketša ka tša thobalano. Ke ile ka gana kgoketšo yeo, eupša boemo bjoo bo ile bja ntsošetša kganyogo ya go nyaka go nyala. Go feta moo, ke ile ka lemoga gore baruti ba bantši ba be ba phela bophelo bja boikaketši. Mafelelong, ke ile ka tlogela pakane ya ka ya go nyaka go ba moruti.

 Ke ile ka dira phetho ya go ithutela mmino Sekolong sa Setšhaba sa Mmino kua Mexico City. Ka morago ga go aloga, ke ile ka nyala, gomme go se go ye kae nna le mosadi wa ka ra ba le bana ba bane. Ke be ke hlokomela lapa ka go opela nakong ya Mmisa Kerekeng ya Katholika.

Di tloga fase feela, lenyalo la rena le ile la ba le mathata. Nna le mosadi wa ka re be re swarana ka bošoro, kudu ka gobane re be re boulela. Mathomong re be re hlaselana ka mantšu, ke moka ra thoma go bethana. Mafelelong, ka morago ga nywaga e 13, re ile ra dira phetho ya go arogana gomme ka morago ra hlalana.

Ke ile ka kopana la mathomo le Dihlatse tša Jehofa pele ke arogana le mosadi wa ka. Dihlatse tše pedi di ile tša kokota mojakong wa rena gomme tša ithaopela go boledišana le rena ka Beibele. Ke be ke nagana gore ke tseba mo gontši ka bodumedi, ka gona ke ile ka ikemišetša go di bontšha gore di fošitše. Ke ile ka di botšiša dipotšišo tše thata tšeo ke bego ke ipotša gore ga di na dikarabo. Eupša ke ile ka makatšwa ke gore di be di dula di nnea dikarabo tše botse tšeo di theilwego Beibeleng. Ke ile ka thoma go bona gore ke be ke tloga ke tseba go se nene. Lega go le bjalo, mosadi wa ka o be a swara Dihlatse makgwakgwa kudu, gomme nna ke be ke swaregile kudu, ka gona diketelo di ile tša kgaotša.

Ka morago ga nywaga e mehlano ge ke be ke kopana le Dihlatse tša Jehofa gape, ke be ke dula le mosadi yo mongwe, e lego Elvira. Elvira o be a sa ganetše Dihlatse, ka gona go ile gwa ba bonolo gore ke ithute Beibele ka mehla. Lega go le bjalo, go ile gwa ntšea nywaga e mentši gore ke lokiše bophelo bjoo ke bego ke bo phela.

Ke ile ka lemoga gore ge e ba ke be ke nyaka go rapela Jehofa ka pelo ka moka, ke be ke swanetše go dira diphetogo tše dikgolo. Sa pele, ke be ke swanetše go tlogela mošomo wa ka wa go opela nakong ya Mmisa Kerekeng ya Katholika, e lego seo se bolelago gore ke be ke swanetše go hwetša tsela e nngwe ya go iphediša. (Kutollo 18:4) Gape ke be ke swanetše go nyalana le Elvira ka molao.

Lega go le bjalo, e nngwe ya diphetogo tše thata kudu e be e le go ithuta go laola kgalefo ya ka. Ditemana tše pedi tša Beibele di ile tša nthuša kudu: Psalme 11:5, yeo e bontšhago gore Jehofa o hloile bošoro, gotee le 1 Petro 3:7, yeo e nthutilego gore ke swanetše go godiša mosadi wa ka ge e ba ke nyaka gore Jehofa a kwe dithapelo tša ka. Ge ke dutše ke naganišiša ka ditemana tšeo le go rapelela thušo ya Jehofa, ganyenyane-ganyenyane ke ile ka kgona go laola kgalefo ya ka.

Ga bjale ke thabela bophelo bja lapa leo le thabilego. Ke lwela go lokiša tswalano ya ka le barwa ba ka ba lenyalong la pele le go thuša lapa leo ke nago le lona ga bjale gore le dule le tiile tumelong.

Ge ke be ke sa le ngwana, toro ya ka e be e le go ba moruti gomme ke thuše batho. Ga bjale ke a bona gore bophelo bja ka bo na le morero e le ka kgonthe. Ke hlokomela lapa la ka ka go ruta mmino. Ke leboga kudu gore Jehofa ga se a mphelela pelo, eupša o nneile sebaka sa gore ke fetoge gomme ke be motho yo kaone!