Na o dumela go Modimo? Ge e ba go le bjalo, na o ka bontšha bohlatse bja gore o gona? Therešo ke gore re dikologilwe ke bohlatse bja Mmopi yo bohlale, yo matla le yo lerato. Bohlatse bjoo ke bofe, gomme bo kgodiša gakaaka’ng? Bakeng sa karabo, ela hloko mantšu a moapostola Paulo lengwalong la gagwe leo le yago go Bakriste ba kua Roma.

Paulo o itše: “Dika tša gagwe [Modimo] tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego, ke gore matla a gagwe a neng le neng le Bomodimo bja gagwe, moo ba hlokago boitshwarelelo.” (Baroma 1:20) Bjalo ka ge Paulo a boletše, Mmopi o tlogetše bohlatse bja go ba gona ga gagwe medirong ya diatla tša gagwe. Anke re eleng hloko mantšu a Paulo.

Paulo o re dika tša Modimo di ka bonwa “go tloga tlholong ya lefase go ya pele.” Tabeng ye, lentšu la Segerika leo le fetoletšwego e le “lefase” ga le bolele ka polanete ya Lefase. Go e na le moo, le bolela ka batho. * Ka baka leo, Paulo o re go tloga nakong yeo batho ba bopilwego ka yona, ba be ba kgona go bona bohlatse bja dika tša Mmopi dilong tšeo a di bopilego.

Bohlatse bjoo bo re dikologile. Ga bo a iphihla tlholong eupša bo “bonwa gabotse.” Go tloga dilong tše dikgolo kudu go ya go tše dinyenyane kudu, ga se feela gore tlholo e utolla gabotse gore go na le Mmopi eupša e utolla le gore o na le dika tšeo di kgahlišago. Na go hlangwa ka bohlale ga dilo mo go bonagalago kudu tlholong ga go re utollele bohlale bja Modimo? Na magodimo ao a tletšego dinaledi gotee le maphoto a matla ga a utolle matla a gagwe? Na motlalo wa dijo tšeo di rothišago mare gotee le botse bja ge letšatši le hlaba le ge le sobela ga di bontšhe gore Modimo o rata batho?—Psalme 104:24; Jesaya 40:26.

Bohlatse bjoo bo molaleng gakaaka’ng? Bo molaleng kudu moo e lego gore bao ba sa nyakego go bo bona gomme ba gana go dumela go Modimo ‘ba hloka boitshwarelelo.’ Seithuti se sengwe se nea mohlala ka gore: Nagana ka mootledi yo a sa šetšego leswao leo le rego “Tsela e a Rarela—Eya ka go le Letshadi.” Lephodisa le a mo emiša gomme le thoma go mo ngwala thekethe. Mootledi o leka go ikemelela ka gore ga se a bone leswao leo. Eupša mantšu a gagwe ga a kwagale ka gobane leswao le molaleng gomme le mootledi o bona gabotse. Le gona, go bona le go latela maswao ao ke boikarabelo bja gagwe bjalo ka mootledi. Go bjalo le ka bohlatse bjo re bo bonago tlholong bja gore Modimo o gona. Go ka thwe leswao leo le molaleng. Bjalo ka diphedi tše bohlale, re kgona go le bona. Ga go na boitshwarelelo bja go le hlokomologa.

Ke therešo gore puku ya tlholo e utolla mo gontši mabapi le Mmopi wa rena. Eupša go na le puku e nngwe yeo e utollago mo gontši kudu ka yena, e lego Beibele. Matlakaleng a yona re ka hwetša karabo ya potšišo ye ya bohlokwa: Morero wa Modimo ka lefase la rena gotee le batho bao ba dulago go lona ke ofe? Go hwetša karabo ya potšišo yeo go ka go thuša go batamela kgauswi le Modimo yoo “dika tša gagwe tše di sa bonagalego di [bonwago] gabotse” lefaseng leo le re dikologilego.