Lehu le swana le boroko ka kgopolo ya gore bahu ga ba tsebe selo le gore ba ka se kgone go dira selo. Lega go le bjalo, Mmopi wa bophelo a ka kgona go bušetša batho bophelong ka tsogo. E le go hlatsela seo, Modimo o ile a nea Jesu matla a go tsoša bahu ba mmalwa ka go ba bušetša bophelong.—Bala Mmoledi 9:5; Johane 11:11, 43, 44.

Modimo o holofeditše gore bahu bao ba lego mogopolong wa gagwe ba tla tsošetšwa bophelong lefaseng le lefsa la toko. Bao ba tlago go tsošwa ba swanetše go leta lehung go fihlela Modimo a ba nea bophelo gape. Modimo Ramatlaohle o hlologetše go diriša matla a gagwe go bušetša bahu bophelong.—Bala Jobo 14:14, 15.

Ge Modimo a tsoša batho, ba tla kgona go itseba, go tseba bagwera ba bona le ba malapa a gabo bona. Le ge mmele wa motho o bola, Modimo a ka kgona go tsoša motho yoo ka mmele o mofsa.—Bala 1 Bakorinthe 15:35, 38.

Ke batho ba mmalwa feela bao ba tsošetšwago go phela legodimong. (Kutollo 20:6) Ba bantši bao ba tla bego ba tsošitšwe ba tla boela bophelong paradeiseng e tsošološitšwego mo lefaseng. Ba tla thabela go thoma bophelo lefsa, ka tebelelo ya go phela ka mo go sa felego.—Bala Psalme 37:29; Ditiro 24:15.