Na o dumela kholofetšong ya Beibele ya tsogo? * Ge go bolelwa ka boripana, tebelelo ya go kopana gape le baratiwa ba rena bao ba hwilego e a kgahliša. Eupša na kholofelo e bjalo ke ya kgonthe? E le go re thuša go araba seo, ke mo gobotse gore re ele hloko mohlala wa baapostola ba Jesu Kriste.

Baapostola ba be ba dumela ka go tia tsogong ya bahu. Ka baka la’ng? Bonyenyane ka mabaka a mabedi. La pele, kholofelo ya bona e be e theilwe therešong ye: Jesu ka boyena o be a tsošitšwe bahung. Baapostola—le “bana bešo ba ka godimo ga ba makgolohlano ka nako e tee”—ba ile ba bona Jesu yo a tsošitšwego. (1 Bakorinthe 15:6) Go oketša moo, tsogo ya Jesu e be e hlatsetšwe le go amogelwa gohle, bjalo ka ge Diebangedi tše nne di bontšha.—Mateo 27:62–28:20; Mareka 16:1-8; Luka 24:1-53; Johane 20:1–21:25.

La bobedi, baapostola ba be ba bone ge Jesu a be a tsoša batho ba bararo bao ba bego ba hwile—wa pele kua Naini, ke moka ya ba kua Kaperenaume, gomme wa mafelelo kua Bethania. (Luka 7:11-17; 8:49-56; Johane 11:1-44) Tsogo ya mafelelo, yeo e hlalositšwego pejana tokollong ye, e be e akaretša lapa leo le bego le tswalane le Jesu kgauswi. Anke re hlahlobeng gape seo se diregilego.

“Kgaetšedi ya gago o tla tsoga.” Jesu o boletše mantšu ao go Mareta, yoo kgaetšedi ya gagwe, e lego Latsaro, a bego a na le matšatši a mane a hwile. Mathomong Mareta o be a sa kwešiše seo se bolelwago ke mantšu a Jesu. O ile a araba ka gore, “Ke tseba gore o tla tsoga,” eupša o be a nagana gore seo se tla direga nakong e tlago. Ka morago ga go kwa Jesu a re, “Ke nna tsogo le bophelo,” akanya kamoo a ilego a makala ge a bona Jesu a tsoša kgaetšedi ya gagwe bahung!—Johane 11:23-25.

Latsaro o be a le kae matšatšing a mane ka morago ga gore a hwe? Latsaro ga se a bolela selo seo se bego se bontšha gore o be a phela lefelong le itšego matšatšing ao a mane. Aowa, Latsaro o be a se na moya o sa hwego woo o bego o rotogetše legodimong. Jesu ga se a ka a theošetša Latsaro lefaseng ge a be a mo tsoša, a mo amoga bophelo bja manobonobo bja legodimong bjoo a bego a bo thabela a le kgauswi le Modimo. Ka gona Latsaro o be a le kae matšatšing ao a mane? Ge e le gabotse, o be a robetše lebitleng.—Mmoledi 9:5, 10.

Gopola gore Jesu o bapišitše lehu le boroko bjoo motho a tsošwago go bjona ka tsogo ya bahu. Pego e balega ka gore: “‘Latsaro mogwera wa rena o robetše, eupša ke ya moo go yo mo tsoša.’ Barutiwa ba re  go yena: ‘Morena, ge e ba a robetše, o tla ba kaone.’ Lega go le bjalo, Jesu o be a bolela ka lehu la Latsaro. Eupša ba be ba nagana gore o be a bolela ka go khutša borokong. Ka gona ka nako yeo Jesu a re go bona ka go lebanya: ‘Latsaro o hwile.’” (Johane 11:11-14) Ge Jesu a be a tsoša Latsaro, o mmušeditše bophelong gotee le go mo kopanya le ba lapa labo. Ye ruri ke mpho e makatšago yeo Jesu a e neilego lapa leo!

Batho bao Jesu a ba tsošitšego ge a be a le mo lefaseng e be e le pontšho ya seo a tlago go se dira nakong e tlago ge a tla be a buša e le Kgoši ya Mmušo wa Modimo. * Nakong ya pušo ya gagwe lefaseng, Jesu yo a lego legodimong o tla tsoša batho bao ba robetšego bodulabahu. Ke ka baka leo a itšego: “Ke nna tsogo.” Akanya ka lethabo leo o tlago go ba le lona ge o tla be o bona baratiwa ba gago gape! Nagana gape ka lethabo leo bao ba tsošitšwego ba tlago go ba le lona!—Luka 8:56.

Jesu o itše go Mareta: “Yo a dumelago go nna, gaešita le ge a ka hwa, o tla phela; le gona yo mongwe le yo mongwe yo a phelago e bile a dumela go nna, a ka se ke a hwa le gatee.” (Johane 11:25, 26) Bao Jesu a ba tsošago nakong ya pušo ya gagwe ya nywaga e sekete ba tla ba le tebelelo ya go phela ka mo go sa felego—ge feela ba dumela go yena e le ka kgonthe.

Ka morago ga go bolela mantšu ao a kgahlišago mabapi le tsogo, Jesu o ile a botšiša Mareta potšišo yeo e fatago maikwelo e rego: “‘Na o dumela se?’ A re go yena: ‘Ee Morena; ke dumetše gore o Kriste Morwa wa Modimo.’” (Johane 11:26, 27) Go thwe’ng ka wena—na o tla rata go hlagolela mohuta wa tumelo yeo Mareta a bego a na le yona? Mogato wa pele ke wa go tseba ka morero wa Modimo ka batho. (Johane 17:3; 1 Timotheo 2:4) Tsebo yeo e ka go dira gore o be le tumelo. O re’ng o sa kgopele Dihlatse tša Jehofa gore di go bontšhe seo Beibele e se rutago ka taba ye? Di tla thabela go ahlaahla le wena kholofelo yeo e kgahlišago ya tsogo.