Nakong ya ge ke belegwa, batswadi ba ka ba be ba na le polasa e nyenyane motsaneng wa magaeng kua Galicia, ka leboa-bodikela bja Sepania. Ke be ke le ngwana wa bone baneng ba seswai. Re be re thabela bophelo bjo bo botse ka lapeng lešo. Ka nako yeo kua Sepania, go be go tlwaelegile gore bonyenyane o tee baneng a ye sekolong sa boruti goba lefelong la baitlami ba basadi. Ka lapeng lešo, re ile ra tšea kgato yeo re le ba bararo.

Ge ke na le nywaga e 13, ke ile ka tlatša mogolwake lefelong la baitlami ba basadi kua Madrid. Go be go se na bogwera lefelong leo la baitlami ba basadi. Batho e be e se bagwera—e be e fo ba melao, dithapelo le bophelo bjo bo tsepamego ka mo go feteletšego. Re be re bokana kerekeng e sa le mesong gore re naganišiše, gaešita le ge monagano wa ka o be o fela o tima. Ka morago, re be re opela difela tša bodumedi e bile re keteka Mmisa gomme ka moka di dirwa ka Selatine. Ke be ke sa kwešiše selo gomme ke ekwa eka Modimo o be a tloga a le kgole le nna. Matšatši a ka a be a feta go homotše o šoro. Le ge nna le mogolwake re be re ka kopana, re be re fo re, “A go tumišwe Maria yo a sekilego go feta bohle.” Baitlami ba basadi ba be ba re dumeletše go bolela lebaka la seripa sa iri feela ka morago ga dijo. Ruri go be go fapane le lapeng lešo leo le thabilego morago kua gae! Ke be ke ikwa ke lewa ke bodutu gomme ke lla gantši.

Le ge ke be ke sa ikwe ke batametše kgauswi le Modimo, ke ile ka dira dikeno gomme ka ba moitlami wa mosadi ke na le nywaga e 17. Ge e le gabotse, ke be ke fo dira seo ba bego ba se nyaka go nna, eupša go se go ye kae, ke ile ka thoma go ipotšiša ge e ba Modimo a be a nkgethetše go dira seo. Baitlami ba basadi ba be ba fela ba bolela gore bao ba nago le dipelaelo tše bjalo ba be ba tla feleletša ka go ya diheleng! Lega go le bjalo, dipelaelo tša ka di be di sa fele. Ke be ke tseba gore Jesu Kriste o be a sa ipee lekatana, go e na le moo, o be a dula a swaregile ka go ruta le go thuša ba bangwe. (Mateo 4:23-25) Ge ke na le nywaga e 20, ke be ke se na mabaka a kwagalago a gore ke be moitlami wa mosadi. Se se makatšago ke gore mma yo a phagametšego baitlami o ile a mpotša gore ge e ba ke be ke gakanegile tabeng ya go ba moitlami, gona ke be ke tla swanelwa ke go sepela kapejana. Ke ile ka gonona  gore o be a boifa gore nka tutuetša ba bangwe. Ka gona ke ile ka tloga lefelong leo la baitlami ba basadi.

Ge ke boela gae, batswadi ba ka ba be ba tloga ba kwešiša boemo bja ka. Eupša ka ge go be go se na mošomo motsaneng wa gabo rena, ke ile ka falalela Jeremane moo yo mongwe wa dikgaetšedi tša ka a bego a dula gona. E be e le yo mongwe wa sehlopha se fišegago sa Bokomanisi sa Masepania a bafaladi. Ke be ke ikwa ke dudišega ge ke be le gare ga batho bao ba bego ba lwela ditokelo tša bašomi gotee le go se kgethollwe ga basadi. Ka gona, ke ile ka ba Mokomanisi gomme mafelelong ka nyalana le setho sa sehlopha seo. Ke be ke nagana gore ke dira selo se se nago le mohola, ke sepediša dikgatišo tša Bokomanisi e bile ke tšea karolo megwantong ya boipelaetšo.

Lega go le bjalo, ge nako e dutše e eya, ke ile ka nyama gape. Ke be ke nagana gore Makomanisi gantši a be a palelwa ke go phelela lentšu la ona. Ka 1971 dipelaelo tšeo di ile tša gakala ge ditho tše dingwe tša bafsa ba sehlopha sa rena di tšhuma Kgoro ya Botseta ya Sepania kua Frankfurt. Di ile tša dira seo e le ge di ipelaetša malebana le go hloka toka pušong ya bogateledi ya Sepania. Eupša ke be ke nagana gore ye e be e le tsela e fošagetšego ya go ntšha kgalefo.

Ge morwa wa ka wa mathomo a belegwa, ke ile ka botša monna wa ka gore ke be nka se sa ya dipokanong tša Bokomanisi. Ke be ke lewa ke bodutu kudu ka ge go be go se le o tee wa bagwera ba ka ba pele yo a bego a re etela le ngwanaka. Ke be ke ipotšiša ka morero wa bophelo. Ke be ke ipotšiša gore na ruri go be go le bohlokwa go itapišetša go hlabolla setšhaba?

Ka 1976, Dihlatse tše pedi tša Masepaniši di ile tša kokota mojakong wa rena gomme tša re nea dikgatišo tše theilwego Beibeleng tšeo ke ilego ka di amogela. Ketelong ya tšona ya bobedi, ke ile ka thoma go di hlaba ka dipotšišo mabapi le tlaišego, go se lekalekane le go hloka toka. Ke ile ka makala ge di diriša Beibele go araba potšišo e nngwe le e nngwe! Ke ile ka amogela thuto ya Beibele le semeetseng.

Mathomong, ke be ke fo thabela go ithuta dintlha. Eupša dilo di ile tša fetoga ge nna le monna wa ka re thoma go ya dibokeng Holong ya Mmušo ya Dihlatse tša Jehofa. Ka nako yeo, re be re na le bana ba babedi. Dihlatse tšeo di be di re lata ka gae ka botho e bile di re thuša ka go hlokomela bana nakong ya diboka. Ke ile ka thoma go rata Dihlatse.

Lega go le bjalo, ke be ke sa na le dipelaelo ka bodumedi. Ke ile ka phetha ka go etela ba leloko kua Sepania. Rangwane, yo e lego moruti, o ile a leka go ntlogediša go ithuta Beibele. Eupša Dihlatse tša moo di ile tša nthuša kudu. Di be di araba dipotšišo tša ka go tšwa Beibeleng, go fo etša ge Dihlatse tša Jeremane di be di dira bjalo. Ke ile ka dira phetho ya go tsošološa thuto ya ka ya Beibele ge ke boela Jeremane. Le ge monna wa ka a ile a dira phetho ya go kgaotša go ithuta Beibele, ke ile ka tšwela pele le phetho ya ka. Ka 1978, ke ile ka kolobetšwa ka ba yo mongwe wa Dihlatse tša Jehofa.

Tsebo e nepagetšego ya therešo ya Beibele e mphile morero wa kgonthe le tsela bophelong. Ka mohlala, 1 Petro 3:1-4 e kgothaletša basadi bao ba nyetšwego gore ba ‘ikokobeletše’ banna ba bona ka “tlhompho e tseneletšego” le go hlagolela “moya . . . o boleta, wo e lego wa bohlokwa bjo bogolo mahlong a Modimo.” Melao e bjalo ya motheo e nthušitše go phetha karolo ya ka ke le mosadi yo a nyetšwego le mma.

Go fetile nywaga e ka bago e 35 go tloga mola ke bago Hlatse. Ke thabela go hlankela Modimo ke le karolo ya lapa la kgonthe la moya, e bile ke thabela gore ba bane ba bana ba ka ba bahlano ba dira se se swanago.