Batho ba bantši ba dumela gore Modimo wa therešo ke mmuši wa lefase le. Eupša ge e ba go be go le bjalo, na nkabe lefase le tletše tlaišego gakaakaa? (Doiteronomio 32:4, 5) Go ya ka Beibele, lefase le ka tlase ga taolo ya motho yo kgopo.​—Bala 1 Johane 5:19.

Go tlile bjang gore motho yo kgopo a hwetše matla a go laola batho bohle? Mathomong a histori ya motho, morongwa yo mongwe o ile a rabela kgahlanong le Modimo gomme a hlohleletša batho ba babedi ba pele gore le bona ba rabele. (Genesi 3:1-6) Batho bao ba ile ba kgetha go kwa morongwa yoo wa lerabele e lego Sathane, ka go re’alo ba mo dira mmuši wa bona. Modimo Ramatlaohle ke yena feela yo a swanelegago go ba Mmuši, eupša o nyaka gore batho ba kgethe pušo ya gagwe e le ka ge ba mo rata. (Doiteronomio 6:6; 30:16, 19) Ka manyami, batho ba bantši ba forilwe gore ba dire kgetho e mpe e swanago le yeo e dirilwego ke batho ba babedi ba pele.​—Bala Kutollo 12:9.

Na Modimo o tla dumelela Sathane gore a tšwele pele ka pušo ya gagwe e kgopo? Aowa! Modimo o tla diriša Jesu go dirolla bokgopo bjo Sathane a bo dirilego.​—Bala 1 Johane 3:8.

Jesu a neilwe matla ke Modimo, o tla fediša Sathane. (Baroma 16:20) Ke moka, Modimo o tla buša batho gomme a ba bušetša bophelong bja lethabo le khutšo bjoo a bego a bo rerile mathomong.​—Bala Kutollo 21:3-5.