Mo e ka bago nywaga e 3 000 e fetilego, sereti se sengwe se ngwadile gore: “Ke dirilwe ka tsela e makatšago yeo e mpoifišago.” (Psalme 139:14) Ge o nagana kamoo ngwana a golago go tšwa seleng e tee, na seo ga se go makatše? Batho ba bantši ba dumela gore Mmopi ke yena a dirilego dilo tše di phelago.—Bala Psalme 139:13-17; Baheberu 3:4.

Motho yo a bopilego legohle le yo a dirilego gore lefase le dulwe ke batho ke yena a bopilego dilo tše di phelago. (Psalme 36:9) O boledišane le batho gomme a re botša ka yena.—Bala Jesaya 45:18.

Mebele ya rena e swana le ya diphoofolo ka ditsela tše dintši. Eupša lebaka ke gore Mmopi o bopile batho gotee le diphoofolo bakeng sa go phela mo lefaseng. O ile a bopa motho wa pele ka lerole la mmu, e sego a etšwa phoofolong.—Bala Genesi 1:24; 2:7.

Batho ba fapane le diphoofolo ka ditsela tše pedi tše bohlokwa. Ya pele, batho ba kgona go tseba, go rata le go hlompha Mmopi. Ya bobedi, le ge diphoofolo di be di sa bopelwa go phela ka mo go sa felego, eupša batho bona ba be ba bopetšwe go phela ka mo go sa felego. Eupša ga bjale, batho ka moka ba abetše lehu ka baka la gore motho wa pele o ganne tlhahlo ya Mmopi.—Bala Genesi 1:27; 2:15-17.