Eric: Ke nyaka go go botša gore ga ke nape ke le motho wa bodumedi. Ka gona ga ke nagane gore go na le mo gontši mo re ka boledišanago ka gona.

Brian: Ke leboga gore o mpoditše seo. Go ba gona, leina la ka ke Brian. Wena o mang?

Eric: Ke nna Eric.

Brian: Ke thabela go go tseba, Eric.

Eric: Le nna ke thabela go go tseba.

Brian: Ke kgopela go botšiša. Na o goletše lapeng la bodumedi?

Eric: Ee. Eupša ke ile ka kgaotša taba ya bodumedi ge ke tloga gae ke eya kholetšheng.

Brian: Ke a bona. O ithutetše’ng kholetšheng?

Eric: Dithuto tša tša leago le histori. Wa tseba, ke kgale ke rata histori, ka ge e hlalosa ka tša bophelo bja motho lefaseng.

Brian: Histori e a kgahliša. Ka ge o ka ba o tseba, Beibele ke puku ya histori. Na o kile wa dira nyakišišo ka Beibele?

Eric: Aowa. Ke a tseba gore ke puku e botse, eupša ruri ga se ka ka ka nagana Beibele e le puku ya histori.

Brian: O bonagala o le motho wa monagano o bulegilego. Ge e ba o na le metsotso e sego kae, nka rata go go bontšha mehlala e sego kae feela ya histori e nepagetšego yeo e hwetšwago ka Beibeleng.

Eric: Go lokile. Eupša ga ke na Beibele.

Brian: Ga go na bothata. Nka go bontšha koping ya ka. Mohlala wa mathomo o mo go 1 Dikoronika kgaolo 29, ditemana 26 le 27. Ditemana tšeo di re: “Ge e le Dafida morwa wa Jese, yena o bušitše Isiraele ka moka; matšatši ao a bušitšego Isiraele ka ona e bile nywaga e masomenne. Kua Heburone o bušitše nywaga e šupago, gomme Jerusalema a buša nywaga e masometharo-tharo.”

Eric: Ke bjang seo e lego mohlala wa histori e nepagetšego?

Brian: Go ba gona, ka nako e nngwe baswayadiphošo ba kile ba bolela gore Kgoši Dafida ga se a ka a ba gona.

Eric: Ruri? Ke ka baka la’ng ba be ba belaela taba ya gore o kile a ba gona?

Brian: Go be go se na bohlatse bjo bongwe ka ntle le bja ka Beibeleng bjo bo bontšhago gore e be e le motho wa kgonthe. Lega go le bjalo, ka 1993, sehlopha sa baepi ba marope se ile sa utolla leswika la bogologolo leo le bego le ngwadilwe lentšu leo le fetolelwago e le “Ntlo ya Dafida.”

Eric: Ntlha yeo e a kgahliša.

Brian: Motho yo mongwe wa ka Beibeleng yo go bego go belaelwa gore o kile a ba gona e be e le Pontio Pilato, e lego mmuši yo a bego a buša mehleng ya Jesu. Go bolelwa ka yena mo go Luka kgaolo 3, temana 1—gare ga bahlankedi ba bangwe ba bantši ba mmušo wa mehleng yeo.

Eric: Ee, ke a bona. E bolela gore “ge Pontio Pilato e be e le mmuši wa Judea, Heroda yena e le mmuši wa selete wa Galilea.”

 Brian: O nepile. Go tšere nywaga e mentši diithuti tše dingwe di belaela gore Pontio Pilato e be e le motho wa kgonthe. Ke moka, mo e ka bago nywaga e 50 e fetilego, kua Bohlabela bja Magareng go ile gwa hwetšwa leswika leo le nago le leina la gagwe leo le kgwarilwego gabotse.

Eric: Hmm. Ga se ka ka ka kwa ditaba tšeo peleng.

Brian: Ke thabela go go botša tšona.

Eric: Go bolela therešo, ke be ke dutše ke hlompha Beibele ka ge e le kgatišo, eupša ruri ga se ka ka ka nagana e le bohlokwa ka tsela e itšego mehleng ya rena. E ka ba e na le histori e nepagetšego, eupša ga ke nagane gore e na le mohola o itšego.

Brian: Batho ba bantši ba ka dumelelana le taba yeo. Eupša nna ga ke dumele seo. Lebaka la ka ke le: Dinyakwa tša batho tša motheo ga di fapane le tša mathomong. Ka mohlala, re be re dutše re nyaka dijo, diaparo le madulo. Ka mehla re nyaka go boledišana seng sa rena le go ba le lapa le thabilego. Na ga se therešo gore ka moka re tšeela dilo tšeo godimo?

Eric: Go bjalo.

Brian: Beibele e ka re thuša mahlakoreng ao ka moka. Yona e ka bitšwa puku ya kgale eupša e le e holago mehleng yeno.

Eric: O ra gore’ng?

Brian: E re ke bee taba ka tsela ye: Beibele e na le melao ya motheo e bohlokwa yeo e lego bohlokwa kudu lehono go swana le ge e be e ngwalwa nywagakgolong e fetilego.

Eric: Go lokile. Mahlakoreng afe?

Brian: Melao ya motheo ya Beibele e ka re hlahla ge go tliwa dilong tša go swana le go ba le pono e lekalekanego ka tšhelete goba bophelo bjo bo thabišago bja lapa goba go ba mogwera yo mobotse. Puku ye e ka re ruta tsela ya go atlega. Ka mohlala, na o be o ka se dumele gore go ba monna yo a nyetšego yo a atlegago gotee le hlogo ya lapa matšatšing a e ka ba tlhohlo?

Eric: Go ba gona go bjalo, moo gona ke dumelelana le wena. Nna le mosadi wa ka re na le mo e ka bago ngwaga re nyalane, gomme ga se ka mehla go lego bonolo go dumelelana ka dilo tše itšego.

Brian: O nepile. Eupša Beibele e na le melao ya motheo e bonolo yeo e šomago. Go bontšha se, nagana ka Baefeso kgaolo 5. Anke re bale ditemana 22, 23 le 28. Mohlomongwe o ka rata go bala ditemana tšeo.

Eric: Go lokile. Di re: “Basadi ba ikokobeletše banna ba bona go etša ge ba ikokobeletša Morena, gobane monna ke hlogo ya mosadi wa gagwe go etša ge Kriste e le hlogo ya phuthego, e le yena mophološi wa mmele wo.” Ke moka, temana 28 e re: “Ka tsela ye banna ba swanetše go rata basadi ba bona bjalo ka mebele ya bona. Yo a ratago mosadi wa gagwe o a ithata.”

Brian: O badile gabotse. Ke a leboga. Na ga se therešo gore ge balekane ka bobedi ba leka go diriša keletšo ye e bonolo, bophelo bja lapa bo tla kaonefala?

Eric: Ee, ke nagana bjalo. Eupša go bonolo go bolela seo go e na le go se dira.

Brian: Ke therešo; ga go na motho yo a phethagetšego. Ge e le gabotse, kgaolong yona yeo ya Beibele go na le temana yeo e re kgothaletšago gore re be le tekatekano. * Tswalanong e nngwe le e nngwe, go nyakega gore go be le tekatekano le go dumelelana le maemo. Nna le mosadi wa ka re hweditše gore Beibele e ka re thuša go hwetša tekatekano yeo.

Eric: Seo se a kwagala.

Brian: Dihlatse tša Jehofa di na le Wepesaete yeo e nago le tsebišo e botse mabapi le lenyalo le bophelo bja lapa. Ge e ba o na le metsotso e sego kae, nka go bontšha mohlala wa seo se hwetšwago go yona.

Eric: Go lokile. Nka go nea metsotso e sego kae.

Brian: Go lokile. Aterese ya Wepesaete yeo ke www.pr418.com/nso. Mathomong a yona ke mo.

Eric: Ke rata diswantšho tša yona.

Brian: Tšeo ke diswantšho tša batho bao ba lego bodireding bjoo re bo dirago lefaseng ka moka. Agaa, bjale bona. Karolo ye e na le sehlogo se se rego, “Thušo Bakeng sa Banyalani le Batswadi.” Ka tlase ga sehlogo seo, go na le dihlogo tše dintšinyana tše kopana tšeo di ahlaahlago maemo a fapafapanego. Na go na le seo se go kgahlago?

 Eric: Ee. Ke se se rego, “Go Rarolla Mathata Lenyalong la Gago.” Ke nagana gore nka diriša sehlogo seo!

Brian: Sehlogo se se hlalosa megato e mene ya go rarolla mathata. Ela hloko serapa se. Eric, na o ka rata go se bala?

Eric: Go lokile. Se re: “Ge e ba poledišano e elela lenyalong bjalo ka madi, gona lerato le tlhompho di tla etša pelo le maswafo.” Hmm, ke rata tsela yeo ba hlalosago taba yeo ka gona.

Brian: Ke leboga ge o badile. Go na le temana ya Beibele yeo e bontšhitšwego mo. O ka e bula ka go kgotla mo godimo ga yona.

Eric: Ee, ke a e bona. Ke Baefeso 5:33. E re: “Yo mongwe le yo mongwe wa lena a rate mosadi wa gagwe bjalo ka ge a ithata; ka lehlakoreng le lengwe, mosadi o swanetše go ba le tlhompho e tseneletšego go monna wa gagwe.”

Brian: Na o hlokometše gore go gatelelwa taba ya go nea seo yo mongwe le yo mongwe a letetšego go se hwetša?

Eric: Ga ke go hwetše gabotse.

Brian: Go ba gona, na ga se therešo gore monna o nyaka go ikwa a hlompšha ke mosadi wa gagwe gomme mosadi le yena o nyaka go kgonthišetšwa gore monna wa gagwe o mo rata e le ka kgonthe?

Eric: Ee. Ke dumelelana le seo.

Brian: Ge e ba gantši monna a tsoma ditsela tša go bontšha mosadi wa gagwe gore o a mo rata, na go ka se be bonolo gore mosadi wa gagwe a mo hlomphe?

Eric: Seo se kwagala eka se ka šoma.

Brian: Ka gona temana ye e tee ya ka Beibeleng, gaešita le ge e ngwadilwe nywageng e nyakilego go ba e 2 000 e fetilego, e ahlaahla dinyakwa tša balekane ka bobedi lenyalong gomme e nea keletšo e holago moo e lego gore ge e dirišwa, e šoma e le ka kgonthe. E le go bušeletša papišo yeo re badilego ka yona pejana, “pelo le maswafo” tša lenyalo di tla dula di phetše gabotse.

Eric: Ke a dumela gore Beibele e bolela mo gontši go feta kamoo ke bego ke nagana ka gona.

Brian: Ke thabela go kwa seo, Eric. Nka rata go kopana le wena mo gape ke tlo kwa gore o nagana eng ka sehlogwana seo se rego, “Megato e Mene ya go Rarolla Mathata” seo se tšwelelago sehlogong sona se Wepesaeteng ya rena. *

Eric: Go lokile. Ke tla se hlola le mosadi wa ka.