Go swana le Alex yo go bolelwago ka yena mo, batho ba bantši lehono ga ba thabele go šoma ka thata. Molokiši wa dikoloi yo a bitšwago Aaron o re: “Batho ba bantši ba nagana gore go šoma seo go thwego ke mošomo wa tlasana go ba theoša seriti. Ba ipotša gore: ‘Ke fo ba ke šoma mošomo wo go fihlela nka hwetša o mongwe o mokaone.’”

Ke ka ba ka la’ng ba bantši ba nagana gore ga ba swanelwe ke go šoma ka thata? Mohlomongwe ba tutueditšwe ke mekero ya ditaba, yeo gantši e bontšhago bophelo bjo go thwego ke bja maleba e le bja manobonobo le bja boiketlo. Matthew yo a šomago go lokiša dilo, o re: “Batho ba nagana gore ge o swanelwa ke go šoma ka thata kutšwanyana gore o iphediše, ke gona moo o sa atlegego.” Mohlwekiši yo a bitšwago Shane o hlokometše tshekamelo e swanago. O re: “Batho ba bantši ga ba sa na moya wa go šomela mogolo wa letšatši ka gore ba šome letšatši ka moka.”

Ka lehlakoreng le lengwe, batho ba bantši bao ba atlegilego ge e le gabotse ba rata go šoma ka thata. Mošomi wa tša meago wa nywaga e 25 yo a bitšwago Daniel o re: “Ke nagana gore go šoma ka thata go putsa ka go fetišiša, kudukudu ge e ba go dirwa ka dipakane tše di nago le morero.” Andre wa nywaga e 23, o dumelelana le seo. O re: “Ke nagana gore mošomo o sepedišana le lethabo le boiketlo. Go šoma ganyenyane le go se dire mo gontši ga se selo seo se ka tlišago lethabo leo le swarelelago—go fo tliša molapo o sa felego!”

Batho ba swanago le Daniel le Andre ba hlagoletše bjang pono e botse mabapi le go šoma ka thata? Ka boripana, ba dirišitše melao ya motheo ya Beibele maphelong a bona. Go e na le gore Beibele e thibele go šoma ka thata, e kgothaletša batho go ba mafolofolo le go kgotlelela. Eupša Beibele ga e fo re botša ka mošomo feela. E bile e re bontšha kamoo re ka thabelago mošomo wa rena.

Ke melao efe ya motheo ya Beibele yeo e ka go thušago go kgotsofalela mošomo wa gago? Re go laletša gore o hlahlobe e sego kae ya yona, ka ge e ahlaahlwa sehlogong se se latelago.