Ge o ekwa mantšu a rego “Bofelo bo kgauswi!” ke eng seo se tlago monaganong wa gago? Na o nagana ka moruti yo a fišegelago thoko e bile a hlaba mašata sethaleng gomme a dira boitšhišinyo bja mmele ka tsela e makatšago a swere Beibele? Goba na o nagana ka mokgalabje wa maledu yo a emego magahlanong a ditsela a apere purapura e telele a tlemile matheka ka thapo, a swere pampiri ya go athwa yeo e nago le molaetša wa letšatši la kahlolo? Go nagana ka ditiragalo tše bjalo go dira gore batho ba bangwe ba ikwe ba tshwenyegile, mola ba bangwe ba ka belaela goba gaešita le go sega.

Beibele e bega gore: “Bofelo bo tla tla.” (Mateo 24:14) Tiragalo yeo e bile e bitšwa “letšatši le legolo la Modimo” le “Haramagedone.” (Kutollo 16:14, 16) Ke therešo gore go na le kgakanego e kgolo mabapi le taba ye gomme go tletše dikgopolo tše di tlabago tše di sa thabišego tša mabapi le letšatši leo. Lega go le bjalo, Beibele ka boyona e bolela ka mo go kwagalago ka bofelo—e utolla seo bofelo bo lego sona le seo bo sego sona. Le gona Lentšu la Modimo le re thuša go bona gabotse ge e ba bofelo bo le kgauswi. Sa bohlokwahlokwa, le re ruta kamoo re ka phologago ka gona! Lega go le bjalo, anke re thome ka go lokiša tše dingwe tša dikgopolo tšeo di fošagetšego tša mabapi le letšatši le gomme re hlalose seo letšatši le le lego sona. Ge e le gabotse, go ya ka Beibele “bofelo” bo bolela’ng?

1. BOFELO GA SE PHEDIŠO E KGOLO YA LEFASE KA MOLLO WOO O LAUMAGO.

   Beibele e re: “[Modimo] o theile lefase godimo ga metheo ya lona; le ka se tsoge le thekesetše go iša mehleng ya neng le neng, le ka mo go sa felego.” (Psalme 104:5) Lengwalo leo le a mangwe a re kgonthišetša gore Modimo a ka se fediše lefase e bile a ka se le dumelele gore le fedišwe—le ka mohla!—Mmoledi 1:4; Jesaya 45:18.

2. BOFELO GA SE TIRAGALO YEO E FOGO GO ITLELA, TIRAGALO E SA RULAGANYWAGO.

   Beibele e bontšha gore bofelo bo rulagantšwe—Modimo o beile nako e itšego ya go tliša bofelo. Re bala gore: “Ge e le mabapi le letšatši leo goba iri, ga go na yo a tsebago, gaešita le barongwa legodimong le ge e le Morwa ga ba tsebe, eupša ke Tate yo a tsebago. Dulang le lebeletše, dulang le phakgame, gobane ga le tsebe gore nako e beilwego e neng.” (Mareka 13:32, 33) Go molaleng gore Modimo (“Tate”) o rulagantše “nako e beilwego” ya maleba yeo a tlago go tliša bofelo ka yona.

3. BOFELO GA BO TLIŠWE KE BATHO GOBA GO TLIŠWA KE DITŠHILA TŠEO DI THALAGANYAGO SEBAKABAKENG.

   Bofelo bo tla tlišwa ke’ng? Kutollo 19:11 e re: “Ka bona legodimo le bulega gomme ka bona pere e tšhweu. Yo a e nametšego o bitšwa Mmotegi le Morereši.” Temana 19 e tšwela pele ka gore: “Ka bona sebata le dikgoši tša lefase le madira a tšona ba kgobokanetše go lwa le yo a nametšego pere le madira a gagwe.” (Kutollo 19:11-21) Gaešita le ge bontši bja dipolelwana tšeo di dirišitšwego mo e le tša seswantšhetšo, re ka kgona go kwešiša se: Modimo o tla romela madira a barongwa go fediša manaba a gagwe.

1. GO FEDIŠWA GA MEBUŠO YA BATHO YEO E PALELWAGO.

   Beibele e hlalosa gore: “Mehleng ya dikgoši tšeo Modimo wa legodimo o tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. O tla pšhatlaganya  mebušo ye ka moka wa e fediša gomme wona o tla ema go iša mehleng ya neng le neng.” (Daniele 2:44) Ka ge go boletšwe pejana ntlheng ya boraro, go tla fedišwa “dikgoši tša lefase le madira a tšona,” ao a “[kgobokanetšego] go lwa le yo a nametšego pere le madira a gagwe.”—Kutollo 19:19.

2. GO FEDIŠWA GA NTWA, BOŠORO LE GO HLOKA TOKA.

   Beibele e re: “[Modimo] o fediša dintwa go fihla pheletšong ya lefase.” (Psalme 46:9) E bile e re: “Baloki ke bona ba tla dulago mo lefaseng gomme bao ba se nago bosodi ba šala go lona. Ge e le ba kgopo ba tla fedišwa lefaseng; baradia bona ba tla tlošwa go lona.” (Diema 2:21, 22) E oketša ka gore: “Bonang! Dilo ka moka ke di dira tše mpsha.”—Kutollo 21:4, 5.

3. GO FEDIŠWA GA MADUMEDI AO A NYAMIŠITŠEGO MODIMO LE BATHO.

   Beibele e bontšha gore: “Baporofeta ba porofeta maaka; ge e le baperisita ba gatelela batho. . . . Mafelelong lena le tla dira’ng?” (Jeremia 5:31) E bile e re: “Ba bantši ba tla re go nna letšatšing leo: ‘Morena, Morena, na ga se ra ka ra porofeta ka leina la gago, ra leleka batemona ka leina la gago, ra dira mediro e mentši e matla ka leina la gago?’ Lega go le bjalo, ke tla ba botša ka re: Ga se ka ka ka le tseba! Tlogang go nna lena ba go hloka molao.”—Mateo 7:21-23.

4. GO FEDIŠWA GA BATHO BAO BA TŠWETŠAGO PELE BOEMO BJA GONA BJALE BJA DITABA LE GO BO THEKGA.

   Jesu Kriste o itše: “Bjale wo ke motheo wa kahlolo, gore seetša se tlile lefaseng; eupša batho ba ratile leswiswi go e na le seetša gobane mediro ya bona e le e kgopo.” (Johane 3:19) Ge Beibele e hlalosa phedišo ya lefase ka bophara yeo e diregilego mehleng ya monna yo a botegago e lego Noa, e re: “Lefase la nakong yeo le ile la senywa ge le be le apešwa ke meetse. Eupša ka lona lentšu leo, magodimo le lefase tšeo gona bjale di lego gona di boloketšwe mollo, di lotetšwe letšatši la kahlolo le la tshenyego ya batho ba sa boifego Modimo.”—2 Petro 3:5-7.

Ela hloko gore go tla ga “letšatši la kahlolo le la tshenyego” go bapetšwa le go fedišwa ga “lefase” la mehleng ya Noa. Ke lefase lefe leo le ilego la fedišwa? Ela hloko gore polanete ya rena e ile ya phologa; e bile “batho ba sa boifego Modimo”—manaba a Modimo—ke bona ba ilego ba “senywa.” Nakong ya “letšatši la kahlolo” la Modimo leo le tlago, bao ba kgethago go ba manaba a Modimo le bona ba tla fedišwa. Eupša bagwera ba Modimo ba tla phološwa go etša ge Noa le lapa la gagwe ba ile ba phološwa.—Mateo 24:37-42.

Akanya kamoo lefase le le tla bago le kgahliša ka gona ge Modimo a fediša ditutuetšo ka moka tše mpe! Go molaleng gore molaetša wa Beibele wa mabapi le bofelo ke ditaba tše dibotse, e sego tše mpe. Lega go le bjalo, o ka ipotšiša gore: ‘Na Beibele e re botša gore bofelo bo tla tla neng? Na bo ka ba bo le kgauswi? Nka bo phologa bjang?’