Dihlatse tša Jehofa di dumela gore “lengwalo ka moka le buduletšwe ke Modimo gomme le [a] hola.” (2 Timotheo 3:16) Re diriša Beibele e le tlhahlo e holago gore re ithute ka Mmopi le gore re phele maphelo ao a nago le morero.

Beibele e re: “Gore batho ba tsebe gore wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.” (Psalme 83:18) Ka gona, re rapela Jehofa Modimo feela, gomme ka ge re le Dihlatse tša gagwe, re katanela go tsebatša leina la gagwe.—Jesaya 43:10-12.

Ka ge re le Bakriste, re dumela gore Jesu, yena “Morwa wa Modimo,” * o ile a tla lefaseng gomme a ba Mesia. (Johane 1:34, 41; 4:25, 26) Ka morago ga gore Jesu a hwe, o ile a tsošetšwa legodimong. (1 Bakorinthe 15:3, 4) Ka morago ga moo, o ile a ba Kgoši ya Mmušo wa Modimo. (Kutollo 11:15) Mmušo woo ke pušo ya kgonthe yeo e tlago go tsošološa Paradeise mo lefaseng. (Daniele 2:44) Beibele e re: “Ba boleta bona e tla ba beng ba lefase, ba tla thaba kudu ka baka la go ata ga khutšo.”—Psalme 37:11, 29.

Dihlatse tša Jehofa di dumela gore melao ya motheo ya Beibele e ka hola batho gaešita le lehono. (Jesaya 48:17, 18) Ka gona, re kgomarela ka go tia melaong yeo ya motheo. Ka mohlala, ka ge Beibele e re lemoša gore re pheme mekgwa yeo e šilafatšago menagano le mebele ya rena, ga re kgoge goba go diriša diokobatši gampe. (2 Bakorinthe 7:1) Le gona re phema mekgwa yeo ka go lebanya e solwago ke Beibele e bjalo ka botagwa, bootswa le go utswa.—1 Bakorinthe 6:9-11.