Bokagare bja Letlakala la ka Ntle

Go Bafsa ba Rena Bao ba Rategago,

Tatago lena wa legodimong e lego Jehofa Modimo, o le rata kudu. O nyaka gore le thabe. Le ka ipotšiša gore: ‘Eupša na ruri go a kgonega gore motho a thabe lehono?’ Potšišo yeo ke e botse. Go ba gona, maphelo a rena a tletše ka mathata. Go bonagala letšatši le lengwe le le lengwe go tšwelela mathata ao a ka re amogago lethabo. Eupša Tatago rena yo lerato o tlo re thuša! Lentšu la gagwe le re nea tlhahlo yeo re e nyakago e le gore re kgone go feta mathateng a bophelo. Gaešita le ge Beibele e ngwadilwe kgale, keletšo ya yona ke e šomago lehono go fo etša ge go be go le bjalo ge e be e sa tšwa go ngwalwa.—Psalme 119:98, 99; 2 Timotheo 3:16, 17.

Re lokišeleditše puku ye ka gobane re a le rata. Re nyaka gore le thabe le gore le holege kudu bophelong. Ka baka leo, re le kgothaletša gore le se ke la fo bala puku ye go tloga mathomong go fihla mafelelong, eupša gape le fele le boela go yona ge mathata a tšwelela. O mongwe wa merero ya puku ye ke go kgothaletša poledišano e kaone magareng ga lena le batswadi ba lena. Re holofela gore le tla bala goba gaešita le go ithuta tše dingwe tša dikarolo tša yona le le gotee. Ikholeng ka bohlale bja batswadi ba lena le phihlelo ya bona!

Re le lakaletša tše botse,

Sehlopha se Bušago sa Dihlatse tša Jehofa