Kgaolo 39

Nka Fihlelela Bjang Dipakane tša ka?

Ke sefe sa dilo tše di latelago seo o ka ratago go ba le sona?

□ Go ikholofela ka mo go oketšegilego

□ Bagwera ba oketšegilego

□ Lethabo le le oketšegilego

GE E le gabotse, o ka ba le tšona ka moka! Bjang? Ka go ipeela dipakane le go di fihlelela. Ela hloko dilo tše di latelago:

Go ikholofela ka mo go oketšegilego. Ge o ipeela dipakane tše dinyenyane e bile o di fihlelela, o tla ba le boikholofelo bja go ipeela tše dikgolo. Le gona o tla ikwa o ikholofela kutšwanyana ge o lebeletšane le ditlhohlo tša letšatši le letšatši—tše bjalo ka go ema o tiile kgahlanong le kgateletšo ya dithaka.

Bagwera ba oketšegilego. Batho ba thabela go ba gare ga batho bao ba ipeelago dipakane—bao ba tsebago seo ba se nyakago le go ikemišetša go se fihlelela.

Lethabo le le oketšegilego. Therešo še: Ga go thabiše go lewa ke bodutu goba go letela gore ka letšatši le lengwe selo se itšego se se kgahlišago se tla direga bophelong bja gago. Ka lehlakoreng le lengwe, ge o ipeela dipakane e bile o di fihlelela, o ba le maikwelo a go atlega. Na o komana-madula-a-bapile gore o thome? Matlakala a latelago a tla go thuša! *

 ✔ DILO TŠEO O SWANETŠEGO GO DI TSEBA

1. Nagana gore ke dipakane dife tšeo o ka ipeelago tšona. Thabela mogato wo! O se ke wa naganišiša kudu; e fo ngwala dipakane tše dintši ka mo o ka kgonago. Bona ge e ba o ka kgona go ngwala bonyenyane dipakane tše 10.

2. Hlahloba dipakane tša gago. Ke dife tšeo di bonagalago di kgahliša kudu? Ke dife tšeo di lego thata kudu? Ke dife tšeo o ka ikgantšhago ka tšona kudu ge o di fihleletše? Gopola gore dipakane tše kaonekaone gantši ke tše di lego bohlokwa kudu go wena.

3. Thoma ka dilo tše di tlago pele. Ngwala dipakane tša gago go ya ka tatelano yeo o tla ratago go di fihlelela ka yona.

 ✔ 2 RULAGANYA

Bakeng sa pakane e nngwe le e nngwe yeo o ipeetšego yona, dira se se latelago:

Ngwala pakane ya gago.

Ke tla ithuta leleme le lengwe e le gore ke tle ke bolele ditaba tše dibotse go batho bašele bao ba dulago nageng ya gešo

Kgetha letšatši leo o tlago go e fihlelela ka lona. Go ba gona, pakane yeo e se nago letšatši leo e tlago go fihlelelwa ka lona e fo ba toro!

July 1

Rulaganya megato yeo e akaretšwago.

Megato

1. Ke tla hwetša puku yeo e hlalosago dipolelwana tša leleme leo.

2. Ke tla ithuta mantšu a mafsa a lesome beke e nngwe le e nngwe.

3. Ke tla theetša batho ba bangwe bao ba bolelago leleme leo.

4. Ke tla kgopela motho yo mongwe gore a nthuše ka melao ya popopolelo le mmiletšo wa mantšu.

Letela go kopana le mapheko. Ke moka akanya kamoo o ka a fenyago ka gona.

Dilo tšeo e ka bago mapheko

Ga go na motho yo a dulago kgauswi yo a bolelago leleme leo

Itlame. Ipotše gore o tla dira sohle seo o ka se kgonago gore o fihlelele pakane yeo. Bjale saena o be o ngwale letšatšikgwedi.

Kamoo nka a fenyago ka gona

Kopiša dikgatišo tše di theetšwago tša leleme leo go tšwa Wepesaeteng ya www.pr418.com.

․․․․․ ․․․․․

Mosaeno Letšatšikgwedi

 ✔ 3 GATA MOGATO!

Thoma ntle le tikatiko. Ipotšiše gore: ‘Nka dira’ng lehono gore ke thome go šomela pakaneng yeo ke ipeetšego yona?’ Ke therešo gore o ka no ba o sa tsebe megato ka moka, eupša o se ke wa dumelela seo se go thibela go thoma. Bjalo ka ge Beibele e hlalosa, “ge o leta go fihlela ge phefo le boemo bja leratadima di lokile, o ka se tsoge o bjetše selo le go buna.” (Mmoledi 11:4, Today’s English Version) Hwetša selo seo o ka se dirago lehono—gaešita le ge e le se senyenyane—gomme o se dire.

Hlahloba dipakane tša gago ka mehla. Ikgopotše lebaka leo ka lona pakane e nngwe le e nngwe e lego ya bohlokwa go wena. Bona ge e ba o dira tšwelopele ka gore o tsenye leswao le ✔ (goba o ngwale letšatšikgwedi leo o phethilego mogato woo ka lona) kgauswi le mogato o mongwe le o mongwe ge o o phethile.

Bona dilo ka leihlo la kgopolo. Naganela pele gomme o ipone o fihleletše pakane ya gago. Ikwe o atlegile. Ke moka, boela morago megatong ka moka gomme o bone mogato o mongwe le o mongwe ka leihlo la kgopolo. Mafelelong, ipone o phetha mogato o mongwe le o mongwe gomme o akanye kamoo o tlago go ikwa o thabile ka gona ge o fihleletše pakane ya gago. Bjale thoma!

[Mongwalo wa tlase]

LENGWALO LA BOHLOKWA

“Maano a motho yo mafolofolo a a mo hola.”—Diema 21:5.

 KELETŠO

O se ke wa tshwenyega ka go kgomarela kudu thulaganyo ya gago. Fetofetoga le maemo gomme o dire diphetogo ge o dutše o gatela pele go fihleleleng pakane ya gago.

NA O BE O TSEBA . . . ?

Ge pakane e le e kgolwanyana, ke moo o tlago go kgotsofala kudu ge o e fihleletše!

O NAGANA ENG?

● Na go a kgonega go ba le dipakane tše dintši ka nako e tee?—Bafilipi 1:10.

● Na go ipeela dipakane go bolela gore o swanetše go rulaganya seo o tlago go se dira ka motsotso o mongwe le o mongwe wa bophelo bja gago?—Bafilipi 4:5.

[Ntlhakgolo go letlakala 283]

“Go bonolo gore motho a nyame ge go se na selo seo a swaregilego ka sona goba seo a lebeletšego pele go se dira. Eupša ge o ipeela dipakane e bile o di fihlelela, o ikgantšha ka seo o lego sona.”—Reed

[Box/​Picture on page 283]

Mohlala wa Dipakane Tšeo o ka Ipeelago Tšona

Segwera Ke tla dira segwera le motho o tee yo e sego thaka ya ka. Ka tsošološa segwera sa kgale.

Boemo bjo bobotse bja tša maphelo Ke tla itšhidulla bonyenyane metsotso e 90 beke e nngwe le e nngwe. Ka robala diiri tše seswai bošego bjo bongwe le bjo bongwe.

Sekolo Ke tla kaonefatša dimaraka tša ka dithutong tša dipalo. Ka gana ge barutwana ba bangwe ba nkgapeletša go dira se se fošagetšego.

Bomoya Ke tla bala Beibele ka metsotso e 15 letšatši le lengwe le le lengwe. Ka boledišana le yo ke tsenago le yena ka klaseng ka ditumelo tša ka bekeng ye.

[Seswantšho go matlakala 284, 285]

Dipakane di swana le dipolane tša moago—o swanetše go šoma ka thata gore o di fihlelele