Ketapele

Dikarabo tše Šomago!

‘Nka boledišana bjang le batswadi ba ka?’ ‘Nka kgetha bjang bagwera?’ ‘Bothata ke’ng ka go robala le motho yo ke sa ratanego le yena?’ ‘Ke ka baka la’ng ke nyama ka tsela ye?’

Ge e ba o kile wa ipotšiša dipotšišo tše bjalo, ga o nnoši. Go ithekgile ka gore o nyakile tlhahlo kae, o ka ba o ile wa newa dikarabo tše di thulanago. E le go thuša bafsa go hwetša keletšo ya kgonthe yeo ba ka ithekgago ka yona, makasine wa Phafoga! o ile wa thoma go ba le lelokelelo la dihlogo tšeo di theilwego Beibeleng tša “Bafsa ba a Botšiša . . . ” ka January 1982. Le ge go fetile nywaga e masome, batho ba bantši ba sa dutše ba holwa le go thabela dihlogo tše. Sehlogo se sengwe le se sengwe se nyakišišitšwe ka mo go tseneletšego. Ge e le gabotse, e le go hwetša kamoo bafsa ba naganago le go ikwa ka gona, bangwadi ba Phafoga! ba boledišane le bafsa ba makgolokgolo lefaseng ka bophara! Lega go le bjalo, sa bohlokwa kudu ke gore keletšo yeo e newago ka go “Bafsa ba a Botšiša” e theilwe Lentšung la Modimo e lego Beibele.

Puku ye yeo ga bjale o e swerego e gatišitšwe ka lekga la pele ka 1989. Lega go le bjalo, dikgaolo tša yona di boeleditšwe ka mo go feletšego bakeng sa go ahlaahla mathata a lehono. Dikgaolo tše ka godimo ga tše 30 di tšerwe dihlogong tša “Bafsa ba a Botšiša” tšeo di gatišitšwego magareng ga 2004 le 2011.

Puku ye ya Dipotšišo tša Bafsa le Dikarabo tše Šomago, Bolumo 1, e tla go nea ditlabakelo tše o di hlokago gore o be motho yo mogolo yo a nago le boikarabelo. Re holofela gore ge o dutše o diriša keletšo ya yona, o tla tlatša batho ba dimilione ba bafsa le ba bagolo, bao “ba tlwaeditšego matla a bona a go hlatha ka go a diriša, e le gore ba kgethologanye se se nepagetšego le se se fošagetšego.”—Baheberu 5:14.

Bagatiši