Kgaolo 7

Na ke Loketše go Tloga Gae?

“Ka dinako tše dingwe ke ikwa eka batho ba a nnyatša ka gobane ke sa dutše ke dula ka gae mola ke na le nywaga e 19, bjalo ka ge eka nka se tsoge ke bile motho yo mogolo go fihlela ke dula ke nnoši.”—Katie.

“Ke na le nywaga e ka bago e 20, gomme ga ke rate taba ya gore ga ke kgone go phela ka tsela yeo ke e ratago ka gobane ke sa dutše ke dula ka gae. Ke ile ka nagana ka go tloga gae.”—Fiona.

NAKO e telele pele ga ge o loketše go tloga gae, o ka thoma go ikwa o kganyoga go itaola. Ga go na bothata ka go ikwa bjalo. Go ba gona, go etša ge go boletšwe go Kgaolo 3, morero wa Modimo wa mathomong e be e le gore bafsa ba gole gomme mafelelong ba tlogele botatago bona le bommago bona ke moka ba be le malapa a bona. (Genesi 2:23, 24; Mareka 10:7, 8) Eupša o ka tseba bjang gore ruri o loketše go tloga gae? Ela hloko dipotšišo tše tharo tša bohlokwa tšeo o swanetšego go di araba. Ya pele ke ya gore . . .

 Maikemišetšo a ka ke Afe?

Lebelela lelokelelo leo le lego ka mo tlase. Lokeletša mabaka ao a dirago gore o nyake go tloga gae gomme o a latelanye go ya ka bohlokwa bja ona.

․․․․․ Ke nyaka go tšhabela mathata a ka gae

․․․․․ Ke nyaka tokologo e oketšegilego

․․․․․ Ke nyaka go tšeelwa godimo ke bagwera ba ka

․․․․․ Ke nyaka go thuša mogwera wa ka yo a nyakago motho yo a ka dulago le yena

․․․․․ Ke nyaka go yo thuša modirong wa boithaopo lefelong le lengwe

․․․․․ Ke nyaka go ithuta go dula ke nnoši

․․․․․ Ga ke sa nyaka gore batswadi ba ka ba ntlhokomele

․․․․․ A mangwe ․․․․․

Ga se gore mabaka ao a lokeleditšwego ka mo godimo a fošagetše. Potšišo ke gore, maikemišetšo a gago ke afe? Ka mohlala, ge e ba o tloga gae e le go fo tšhabela dithibelo tše itšego, ruri o tla makala!

Danielle yo a ilego a tloga gae ka nakwana ge a be a na le nywaga e 20, o ithutile mo gontši phihlelong yeo. O re: “Ka moka ga rena re swanetše go phela ka tlase ga dithibelo tša mohuta o itšego. Ge o dula o nnoši, lenaneo la gago la mošomo goba go hloka tšhelete go tla šitiša seo o nyakago go se dira.” Carmen yo a ilego a hudugela moše wa mawatle ka dikgwedi tše tshela, o re: “Ke ile ka thabela phihlelo yeo, eupša gantši ke be ke ikwa eka ga ke na nako! Ke ile ka swanelwa ke go itirela mediro ya ka gae, e lego go hlwekiša ntlo, go lokiša dilo, go hlwekiša jarata, go hlatswa diaparo, go koropa lebato le mediro e mengwe.”

O se ke wa dumelela batho ba bangwe ba go diriša diphetho ka lepotlapotla. (Diema 29:20) Gaešita le ge o na le mabaka a kwagalago a go tloga gae, o tla hloka seo se fetago maikemišetšo a mabotse. O swanetše go tseba kamoo o tlago go itlhokomela ka gona, e lego seo se re lebišago potšišong ya bobedi e rego . . .

Na ke Loketše go Tloga?

Go yo dula o nnoši go swana le go namela dithaba kua lešokeng.  Na o be o ka sepela lešokeng o sa tsebe go hloma tente, go gotša mollo, go apea goba go latela mmapa? Le gatee! Lega go le bjalo, bafsa ba bantši ba tloga gae ba na le bokgoni bjo bonyenyane bja go hlokomela legae.

Kgoši Solomone yo bohlale o boletše gore motho “yo bohlale o šetša dikgato tša gagwe.” (Diema 14:15) E le go go thuša go bona ge e ba o loketše go ka yo dula o nnoši, ela hloko dihlogwana tše di latelago. Tsenya leswao le ✔ kgauswi le dilo tšeo o šetšego o kgona go di dira gomme o tsenye le X kgauswi le dilo tšeo o swanetšego go šomela go tšona.

□ Go diriša tšhelete: Sarena wa nywaga e 19 o re: “Le ka mohla ga se ka ka ka swanelwa ke go itefelela dilo. Ke boifa go tloga gae gomme ke yo swanelwa ke go ithuta go diriša tšhelete ya ka.” O ka ithuta bjang go diriša tšhelete?

Seema sa Beibele se re: “Motho yo bohlale o tla theetša a hwetša thuto e ntši.” (Diema 1:5) Ka gona, ke ka baka la’ng o sa botšiše batswadi ba gago gore gantši go bitša bokae gore motho a lefelele rente goba ntlo yeo a hirišitšego go yona, go reka dijo le go lefelela ditshenyagalelo tša go diriša koloi goba ditshenyagalelo tše dingwe tša dinamelwa? Ke moka kgopela batswadi ba gago gore ba go thuše go ithuta kamoo o ka dirišago tšhelete ya gago le go lefelela dikoloto. *

□ Bokgoni bja go dira mediro ya ka gae: Brian wa nywaga e 17 o re seo a se boifago kudu ka go tloga gae ke  gore o tla swanelwa ke go itlhatswetša. Wena o tseba bjang gore o loketše go ka itlhokomela? Aron wa nywaga e 20 o šišinya gore: “Beke ka moka, leka go phela bjalo ka ge eka o dula o nnoši. Eja feela dijo tšeo o ikapeetšego tšona, tšeo o itheketšego tšona lebenkeleng le tšeo o itefeletšego tšona ka tšhelete yeo o e gotšego. Apara diaparo tšeo o itlhatsweditšego tšona le tšeo o ikaenetšego tšona. Itirele modiro wa gago ka moka wa go hlwekiša ka gae. Le gona leka go ya moo o swanetšego go ya gona ka noši, go e na le gore motho yo mongwe a tle a go tšee goba a go iše moo ka koloi.” Go latela tšhišinyo yeo go tla go direla dilo tše tše pedi: Go tla (1) go ruta dilo tša bohlokwa tšeo o ka di dirago gomme (2) gwa go dira gore o leboge kudu modiro woo batswadi ba gago ba o dirago.

□ Go phedišana gabotse le batho ba bangwe: Na o phedišana gabotse le batswadi ba gago gotee le bana beno? Ge e ba go se bjalo, o ka nagana gore bophelo bo tla ba bonolo ge o ka tloga wa yo dula le mogwera wa gago. Eupša ela hloko seo Eve wa nywaga e 18 a se bolelago, o re: “Bagwera ba ka ba babedi ba ile ba dula gotee. E be e le bagwera ba paala pele ga ge ba ka dula gotee, eupša ba be ba sa kgone go phedišana. Yo mongwe wa bona o be a rata bohlweki gomme yo mongwe e le lešaedi. Yo mongwe wa bona o be a rata dilo tša moya eupša yo mongwe a sa di rate gakaalo. Ga se ba ka ba phedišana gabotse!”

Tharollo ke efe? Erin wa nywaga e 18 o re: “O ka ithuta mo gontši ka go phedišana le batho ba bangwe ge o sa dutše o dula ka  gae. O ithuta kamoo o ka rarollago mathata ka gona le go dumelelana le maemo. Ke lemogile gore bao ba tlogago gae e le gore ba pheme go se kwane le batswadi ba bona ba ithuta kamoo ba ka tšhabelago diphapano, e sego go di rarolla.”

□ Lenaneo la gago la dilo tša moya: Ba bangwe ba tloga gae ka maikemišetšo a kgethegilego a go tšhabela dilo tšeo di nyakwago ke bodumedi bja batswadi ba bona. Ba bangwe ba tloga gae ba ikemišeditše ka mo go feletšego go boloka lenaneo la bona le lebotse la go ithuta Beibele le go rapela Modimo, eupša go se go ye kae ba arogela mekgweng e mebe. O ka phema bjang ‘go senyegelwa ke tumelo go swana le sekepe se se robegilego’? *—1 Timotheo 1:19.

Jehofa Modimo o nyaka gore ka moka ga rena re itlhatselele dilo tšeo re di dumelago. (Baroma 12:1, 2) Itirele lenaneo le lebotse la ka mehla la go ithuta Beibele le go rapela Modimo, ke moka o le kgomarele. Ke ka baka la’ng o sa ngwale lenaneo la gago la ka mehla la dilo tša moya almanakeng gomme o bone ge e ba o ka kgona go le latela kgwedi ka moka ntle le gore batswadi ba gago ba go gopotše?

Sa mafelelo, potšišo ya boraro yeo o swanetšego go ipotšiša yona ke ya gore . . .

Morero wa ka ke Ofe?

Na o nyaka go tloga gae e le gore o tšhabele mathata? Goba na o nyaka go tšwa ka tlase ga taolo ya batswadi? Ge e ba go le bjalo,  wena o šeditše seo o se tlogelago, e sego seo o yago go sona. Seo se swana le go leka go otlela koloi mola mahlo a gago a tsepeletše seiponeng seo se bontšhago dilo tšeo di tlago ka morago ga koloi—o tshwenyegile kudu ka seo o se tšhabelago moo o bilego o sa bone seo se letšego ka pele. Re ithuta’ng go se? O se ke wa fo nagana kudu ka go tloga gae—tsepamišetša mahlo a gago morerong o bohlokwa.

Bafsa ba bangwe bao ba godilego gare ga Dihlatse tša Jehofa ba tlogile gae gore ba kgone go dira boboledi mafelong a mangwe nageng ya gabo bona goba gaešita le dinageng tše dingwe. Ba bangwe ba tloga gae gore ba yo thuša go aga mafelo a borapedi goba ba yo šoma ofising ya lekala ya Dihlatse tša Jehofa. Lega go le bjalo, ba bangwe ba nagana gore ba swanetše go dula ba nnoši ka nakwana pele ga ge ba ka tsena lenyalong. *

Go sa šetšwe gore morero wa gago wa go tloga gae ke ofe, naganišiša ka seo gabotse. Seema sa Beibele se re: “Maano a motho yo mafolofolo a a mo hola, eupša mang le mang yo a akgofago o wela bohloking.” (Diema 21:5) Theetša keletšo ya batswadi ba gago. (Diema 23:22) Rapela ka taba ye. Ke moka ge o dira phetho, naganišiša ka melao ya motheo ya Beibele yeo e sa tšwago go ahlaahlwa.

Potšišo ya bohlokwa ga se ya gore, Na ke šetše ke loketše go tloga gae? eupša ke ya gore, Na ke loketše go ka hlokomela legae la ka? Ge e ba karabo ya gago potšišong ya mafelelo e le ee, gona o ka ba o loketše go yo dula o nnoši.

[Mengwalo ya tlase]

LENGWALO LA BOHLOKWA

“Monna o tla tlogela tatagwe le mmagwe.”—Mateo 19:5.

KELETŠO

Nea batswadi ba gago ka nakwana tšhelete ka moka yeo e nyakegago go lefelela dijo tša gago, madulo le ditshenyagalelo tše dingwe. Ge e ba o sa kgone go lefelela ditshenyagalelo tša gago goba o sa nyake go dira bjalo ge o sa dutše o dula ka gae, gona o tla ba o se wa itokišetša gabotse go yo dula o nnoši.

NA O BE O TSEBA . . . ?

Maikemišetšo a gago a go tloga gae a ka laola gore o tla thaba gakaakang ka morago ga go tloga.

KGATO YEO KE TLAGO GO E TŠEA!

Pakane yeo nka ratago go e fihlelela ka go tloga gae ke ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Gaešita le ge bophelo bja lapa la geno bo le thata, go dula ka gae ka nakwana go ka go hola bjang?

● Ge o sa dutše o le ka gae, ke’ng seo o ka se dirago seo se tlago go hola lapa la geno le go go thuša go itokišeletša go tlo hlokomela lapa la gago?

[Ntlhakgolo go letlakala 52]

“Ga go na bothata ka go nyaka go itaola. Eupša ge e ba maikemišetšo a gago a go tloga gae e le feela go tšhabela melao, seo ka moka se bontšha gore ruri ga o ešo wa lokela go tloga gae.”—Aron

[Seswantšho go matlakala 50, 51]

Go tloga gae go swana le go namela dithaba kua lešokeng—o swanetše go ithuta kamoo o tlago go iphediša ka gona pele o ka thoma leeto