Kgaolo 5

Nka Lebeletšana Bjang le go Tsena Lenyalong Gape ga Motswadi wa ka?

MOTSWADI wa gago a ka bonagala a thabile kudu letšatšing leo a tsenago lenyalong gape. Lega go le bjalo, wena o ka ikwa o sa thaba le gatee! Ka baka la’ng? Go tsena lenyalong gape ga motswadi go fediša kholofelo ya gore batswadi ba gago ba madi ba tla tsoga ba boelane. Ka lehlakoreng le lengwe, go tsena lenyalong gape go ka ba bohloko ka mo go kgethegilego ge go direga ka moragonyana ga lehu la motswadi yo a rategago.

O ile wa ikwa bjang ge motswadi wa gago a be a tsena lenyalong gape? Tsenya leswao le ✔ kgauswi le moo go hlaloswago ka tsela yeo o ilego wa ikwa ka yona.

Ke ile ka ikwa . . .

□ Ke thabile

□ Ke sa šireletšega

□ Ke sa botegelwa

□ Ke na le lehufa ka baka la motswadi wa ka yo e sego wa madi

□ Ke na le molato wa go se botege ka ge bjale ke thomile go rata motswadi wa ka yo e sego wa madi

Tsela ye e hlalositšwego mo mafelelong e ka bakwa ke ge o ikwa o botegela motswadi wa gago yo a sego gona. Go sa šetšwe gore lebaka ke lefe, maikwelo ao a boletšwego ka mo godimo a ka dira gore o ntšhe bohloko bjo o bo kwago maikwelong ka ditsela tšeo di gobatšago.

 Ka mohlala, ka dinako tše dingwe o ka thatafišetša motswadi wa gago yo e sego wa madi bophelo. Mohlomongwe o ka ba wa leka go lweša motswadi wa gago le motswadi wa gago yo e sego wa madi, o holofela gore ba tla arogana. Lega go le bjalo, seema se bohlale se lemoša ka gore: “Yo a tlišago mathata ka lapeng la gabo, bohwa bja gagwe e tla fo ba moya”—ke gore, motho yoo o tla feleletša a se na selo. (Diema 11:29, New International Version) Ga go hlokege gore o wele molabeng woo. O ka lebeletšana ka katlego le mathata a gago a maikwelo ka ditsela tšeo di tlogago di šoma. Ela hloko mehlala e sego kae.

Bothata 1: Go Lebeletšana ka Katlego le Bolaodi bja Motswadi yo e Sego wa Madi

Go ikokobeletša motho yo e sa tšwago go ba motswadi wa gago ga go bonolo. Ge o kgopelwa gore o dire selo se itšego, o ka lekega gore o phatloge ke moka o re: ‘Ga o mma goba tate wa ka wa kgonthe!’ Go arabela ka tsela e bjalo go ka dira gore o ikwe o kgotsofetše ka nakwana, eupša go bontšha gore ga se wa gola monaganong.

Ka lehlakoreng le lengwe, go ikokobeletša motswadi wa gago yo e sego wa madi ke tsela e nngwe ya go bontšha gore o kwele keletšo ya Beibele ya gore le “goleng tseleng ya lena ya go nagana.” (1 Bakorinthe 14:20, The Holy Bible in the Language of Today, ka William Beck) Ruri motswadi wa gago yo e sego wa madi o dira mediro ya motswadi wa gago wa kgonthe gomme o swanetše go mo hlompha.—Diema 1:8; Baefeso 6:1-4.

Gantši ge motswadi wa gago yo e sego wa madi a go kgalema, o bontšha gore o a go rata e bile o tshwenyegile ka wena. (Diema 13:24) Yvonne wa nywaga e 18 o re: “Tate wa ka yo e sego wa madi o a re kgalema, eupša seo ke sona seo botate ba swanetšego go se dira. Ke nagana gore ge e ba ke gana keletšo ya gagwe, gona ke ra gore ga ke na taba le gore o be a dutše a re hlokometše nameng le moyeng go theoša le nywaga. Le gona seo e tla ba e le go hloka tebogo.”

Lega go le bjalo, o ka ba le mabaka a kwagalago a go belaela. Ge e ba go le bjalo, ipontšhe o le ‘yo a godilego’ ka go latela seo Bakolose 3:13 e se kgothaletšago, ge e re: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.”

 Ka mo tlase, ngwala dika tše dibotse tše pedi goba go feta moo tšeo motswadi wa gago yo e sego wa madi a nago le tšona.

․․․․․

Go gopola dika tše dibotse tša motswadi wa gago yo e sego wa madi go ka go thuša bjang go mo hlompha kudu?

․․․․․

Bothata 2: Go Ithuta go Abelana Dilo le go Dirišana le ba Bangwe

Aaron wa nywaga e 24 o gopola gore: “Tate o ile a feleletša a nyetše gape ka makga a mabedi. Ke ile ka hwetša go le thata go rata ditho tša lapa le lengwe le le lengwe leo le tlago le motswadi wa ka yo e sego wa madi. Mathomong e be e fo ba batho bao ke sa ba tsebego, eupša ke ile ka botšwa gore ke swanetše go ba rata. Ke ile ka hwetša boemo bjo e le bjo bo gakantšhago.”

Le wena o ka lebeletšana le maemo a thata. Ka mohlala, o ka swanelwa ke go lahlegelwa ke maemo a gago a go ba ngwana yo mogolo goba a go ba ngwana o nnoši. Ge e ba o le mošemane, mohlomongwe ka nako e telele o ile wa ikwa o ikarabela bakeng sa go hlokomela lapa la geno, e lego maemo ao ga bjale e lego a tatago yo e sego wa madi. Goba mohlomongwe o ka ikwa go swana le Yvonne. O re: “Tate wa ka wa madi o be a se na taba le mma le gatee, ka gona ke be ke tlwaetše go fetša nako e ntši ke na le mma. Eupša ge mma a be a nyalwa gape, tate wa ka yo e sego wa madi o ile a tloga a mo šetša. Ba be ba fetša nako ba le gotee e bile ba boledišana, ka gona ke ile ka nagana gore tate yoo o be a mo utswa go nna. Lega go le bjalo, mafelelong ke ile ka kgona go tlwaelana le boemo bjoo.”

Ka go swana le Yvonne, o ka tlwaelana bjang le boemo bjo o lego go bjona? Beibele e kgothaletša gore: “Anke go lekalekana ga lena go tsebje bathong bohle.” (Bafilipi 4:5) Lentšu la mathomong leo le fetoletšwego e le “go lekalekana” le be  le bolela “go fetofetoga le maemo” gomme le be le fetišetša kgopolo ya motho yo a sa gapeletšego go hwetša ditshwanelo tša gagwe ka moka. O ka diriša bjang keletšo yeo? (1) Phema go nagana kudu ka dilo tša nakong e fetilego. (Mmoledi 7:10) (2) Ikemišetše go abelana dilo le motswadi wa gago yo e sego wa madi gotee le bana beno le dikgaetšedi bao e sego ba madi. (1 Timotheo 6:18) (3) O se ke wa ba swara bjalo ka batho bašele.

Ke ntlha efe ya tše di lego ka mo godimo yeo o swanetšego go šomela go yona kudu? ․․․․․

Bothata 3: Go Lebeletšana le go Swarwa ka Mokgwa o sa Swanego le ba Bangwe

Tara o re: “Tate wa ka yo e sego wa madi o be a rata bana ba gagwe go feta nna le mogolwake. O be a tla ba rekela dijo le ge e le dife tšeo ba di ratago le go ba hirišetša difilimi tšeo ba bego ba nyaka go di bogela. O be a dira selo le ge e le sefe go ba kgahliša.” Go thata go kgotlelela go swarwa ka tsela e bjalo. Ke’ng seo se ka thušago? Leka go kwešiša seo se ka dirago gore motswadi yo e sego wa madi a se rate ngwana yo a mo godišago go swana le kamoo a ratago ngwana wa gagwe wa madi. Mohlomongwe ga se taba ya go tswalana ka madi le ngwana wa gagwe eupša e ka ba e le taba ya gore ba phetše gotee gomme ba ba le diphihlelo tše di swanago bophelong. Go ba gona, ga go na pelaelo gore o ikwa o le kgauswi le motswadi wa gago wa madi go feta motswadi wa gago yo e sego wa madi.

Lega go le bjalo, go na le phapano e kgolo magareng ga go  swarwa ka tsela e swanago le ya ba bangwe le go swarwa gabotse. Batho ba na le dimelo tše di sa swanego le dinyakwa tše di sa swanego. Ka gona go e na le go tshwenyega ka mo go feteletšego mabapi le gore motswadi wa gago yo e sego wa madi o go swara ka tsela e swanago le ya ba bangwe, leka go bona ge e ba a kgotsofatša dinyakwa tša gago.

Ke dinyakwa dife tša gago tšeo motswadi wa gago yo e sego wa madi a di kgotsofatšago?

․․․․․

Ke dinyakwa dife tšeo o naganago gore ga di kgotsofatšwe?

․․․․․

 Ge e ba o nagana gore tše dingwe tša dinyakwa tša gago ga di kgotsofatšwe, ke ka baka la’ng o sa bolele ka tlhompho ka taba yeo le motswadi wa gago yo e sego wa madi?

Go se Fele Pelo go a Putsa!

Gantši go nyakega nywaga e mmalwa pele ga ge go ka ba le go botana go fihla moo ditho tša lapa tšeo di sa tswalanego ka madi di ikwago di lokologile ge di le gotee. Ke feela ka nako yeo moo mekgwa e sa swanego le ditekanyetšo di bago selo setee gomme tša kgona go latelwa. Ka gona o se ke wa fela pelo! O se ke wa lebelela gore o tla hwetša lerato la kapejana goba gore go tla fo ba le lapa la go itiragalela.

Thomas o be a se a thaba ge mmagwe a be a nyalwa gape. Mmagwe o be a na le bana ba bane gomme monna yo a bego a nyalana le yena o be a na le bana ba bararo. Thomas o ngwadile gore: “Re be re elwa, re ngangišana, re thulana e bile go na le mathata a magolo a maikwelo.” Ke’ng seo mafelelong se ilego sa dira gore ba atlege? “Ka go diriša melao ya motheo ya Beibele, dilo di ile tša lokišwa.”

KGAOLONG YA RENA YEO E LATELAGO

Go thwe’ng ge e ba bana beno ka moka e le bana ba mmago le tatago eupša ba go opiša hlogo?

LENGWALO LA BOHLOKWA

“Pheletšo ya taba e phala mathomo a yona. Motho wa go se fele pelo o phala wa go ikgogomoša.”—Mmoledi 7:8.

KELETŠO

Go dula le bana beno ba motswadi yo e sego wa madi ba bong bjo bo fapanego go ka baka dikganyogo tša boitshwaro bjo bo gobogilego. Ka gona leka go ithiba gore o se ke wa nagana ka thobalano, gomme o kgonthišetše gore moaparo wa gago goba boitshwaro bja gago ga di tsoše kganyogo.

NA O BE O TSEBA . . . ?

Bana beno le dikgaetšedi bao e sego ba madi le bona ba ka ba ba na le bothata bja go tlwaelana le maemo a ka lapeng la motswadi yo a tsenego lenyalong gape.

KGATO YEO KE TLAGO GO E TŠEA!

Ke tla leka go hlompha motswadi wa ka yo e sego wa madi ka mo go oketšegilego ka go gopola dilo tše di latelago tše dibotse tšeo a di diretšego lapa la gešo (ngwala dilo tše pedi tše dibotse): ․․․․․

Ge e ba bana bešo bao e sego ba madi ba se na taba le nna, nka diriša molao wa motheo wo o lego go Baroma 12:21 ka go dira se se latelago: ․․․․․

Seo ke tlago go botšiša motswadi wa ka goba motswadi wa ka yo e sego wa madi ka taba ye ke gore ․․․․․

O NAGANA ENG?

● Ke dilo dife tšeo motswadi wa gago yo e sego wa madi goba bana beno bao e sego ba madi ba ka bago ba di boifa ka go tla go ba selo setee le lapa la geno?

● Ke ka baka la’ng e le gabohlokwa go ba le pono e bulegilego ka ditswalano tše difsa tša lapa la geno?

[Ntlhakgolo go letlakala 38]

“Lenyalo la mma la bobedi le ile la feleletša ka tlhalo. Eupša go ba go fihla le lehono le, ke sa dutše ke tlwaelane kudu le bana bešo bao e sego ba madi. Go ba ga bona karolo ya bophelo bja ka ke se sengwe sa dilo tše kaonekaone tšeo di kilego tša ntiragalela.”—Tara

[Seswantšho go letlakala 39]

Go kopanya malapa a mabedi go swana le go hlakanya meetse le samente—go nyaka nako le maiteko, eupša mafelelong go ka tšwelela selo seo se tiilego sa ka mo go sa felego