Kgaolo 35

Nka Tlogela Bjang go Diriša Dihlaretagi?

NA O lemaletše dihlaretagi? O ka ba o tseba gore go lemalela ga gago dihlaretagi go senya monagano le mmele wa gago. O ka ba o kile wa leka go tlogela mokgwa wo eupša wa boela gape go wona. Ge e ba go le bjalo, o se ke wa itlhoboga. Ba bangwe ba ile ba fenya go lemalela dihlaretagi, ka gona le wena o ka kgona! Ka mohlala, ela hloko seo batho ba bararo bao ba tšwago ditlogong tše di sa swanego ba rego se ba thušitše go tlogela.

LEINA Marta

SETLOGO SA KA Mma o be a se a nyalwa ge ke be ke belegwa, ka gona nna le moratho wa ka re ile ra godišwa re se na tate. Ge ke be ke na le nywaga e 12 ke ile ka thoma go ya mafelong a go bina le ngwana wa mmane yo a bego a rata go bina. Ke be ke le motho wa batho gomme go se go ye kae ke ge ke šetše ke tlwaelane le batho ba mekgwa e mebe. Ke thomile go diriša dihlaretagi ke na le nywaga e 13, ka ba ka thoma go diriša le cocaine. Mathomong ke be ke thabela go diriša sehlaretagi seo. Eupša ka morago ke ile ka thoma go bona dilo tšeo di bego di se gona gomme ka boifa selo se sengwe le se sengwe. Ke moka ge ke thoma go hlaphogelwa ke dihlaretagi, ke be ke nagana kudu ka go ipolaya. Ke be ke nyaka go tlogela dihlaretagi eupša ke se na matla a go dira bjalo.

KAMOO KE ILEGO KA TLOGELA GO DIRIŠA DIHLARETAGI Ke ile ka thoma go nagana ka Modimo gomme ka ba ka fela ke eya kerekeng. Eupša ke ile ka fo nyema moko le go feta. Ke ile ka ya go dula le lesogana la ka ge ke be ke na le nywaga e 18 gomme ra ba le ngwana. Go ba le morwa go ile gwa oketša kganyogo ya ka ya go nyaka go fetoša bophelo bja ka. Mosadi yo  e kilego ya ba mogwera wa ka o ile a tla a dula ntlong yeo e lebanego le moo ke bego ke dula gona. O ile a nketela gomme a mpotšiša gore ke phela bjang. Ke ile ka mo tšhollela sa mafahleng. O ile a mpotša gore e be e šetše e le yo mongwe wa Dihlatse tša Jehofa gomme a ithaopela go ithuta Beibele le nna. Ke ile ka amogela thuto.

Ke ile ka lemoga gore bophelo bja ka bo be bo sa kgahliše Modimo le gore ke be ke swanetše go tlogela go diriša dihlaretagi le go kgoga. Eupša ke be ke thatafalelwa ke go tlogela dihlaretagi. Ke ile ka kgopela Jehofa Modimo gantši ka letšatši gore a nthuše go tlogela mekgwa ya ka e mebe. Ke be ke nyaka go mo kgahliša. (Diema 27:11) Ka morago ga go ithuta Beibele le Dihlatse tša Jehofa ka dikgwedi tše tshela gotee le go kopanela le tšona, ke ile ka kgona go tlogela dihlaretagi. Ga bjale bophelo bja ka bo tloga bo na le morero. Ga ke sa phela ke gateletšegile. Ke ile ka kopana le monna yo a kgahlišago wa Mokriste gomme ra nyalana. Ke godišitše morwa wa ka ka go dumelelana le melao ya motheo ya Beibele. Ke leboga kudu gore Jehofa o kwele dithapelo tša ka gomme a nthuša!

LEINA Marcio

SETLOGO SA KA Ke goletše ka ntle ga Santo André, e lego motse wo o nago le baagi ba bantši wa seleteng sa São Paulo, Brazil. Ke ile ka thoma go kgoga motšoko, go diriša dihlaretagi le go utswa ke sa le yo monyenyane. Ba mmalwa ba bagwera ba ka ba be ba utswa dikoloi le go gweba ka dihlaretagi. Yo mongwe wa bona o be a nea bafsa ba tikologong ya gešo dihlaretagi mahala. Ge ba šetše ba di tlwaetše, ba be ba swanetše go di reka go yena.

Maphodisa a be a phela a sepelasepela tikologong ya rena gomme ke ile ka golegwa ka makga a mantšinyana ka baka la melato e menyenyane ke moka ka lekga le lengwe ka golegelwa go ba mmelaelwa wa go gweba ka dihlaretagi.  Gantši ke be ke boloka dithoto le dithunya tšeo di utswitšwego ke sehlopha sa rena sa disenyi ka ntlong ya gešo.

Batho ba be ba ntšhaba. Mahlo a ka a be a hwibitše. Ke be ke sa myemyele. Ge e le gabotse, sefahlego sa ka se be se phela se ipolela gore ke mmolai. Ke be ke bitšwa ka leina la dikwero la “Tufão” (ke gore, Ledimo) ka gobane gohle moo ke yago ke be ke hlola mpherefere. Ke be ke bile ke enwa kudu le go phela bophelo bjo bo gobogilego. Ba bantši ba bagwera ba ka ba ile ba hwa goba ba feleletša ka go golegwa. Ke be ke gateletšegile kudu moo ke ilego ka tlemelela thapo lekaleng la sehlare gomme ka leka go ipolaya.

KAMOO KE ILEGO KA TLOGELA GO DIRIŠA DIHLARETAGI Ke ile ka kgopela Modimo gore a nthuše. Mafelelong ke ile ka kopana le Dihlatse tša Jehofa gomme ka thoma go ithuta Beibele. Ke ile ka ithuta gore Modimo o na le leina la gagwe e lego Jehofa, le gore o hlokomela le go thuša bao ba lekago ka thata go phela ka ditekanyetšo tša gagwe. (Dipsalme 83:18; 1 Petro 5:6, 7) Ke ile ka swanelwa ke go dira diphetogo tše dintši. E nngwe ya tše thata e be e le go ithuta go myemyela.

Ke be ke kgopela Jehofa ka mehla gore a nthuše gomme ke ile ka diriša keletšo ya Beibele. Ka mohlala, ke ile ka kgaotša go gwerana le bao e kilego ya ba bagwera ba ka gomme ka phema go ya dipareng. Go e na le moo, ke ile ka kgetha go gwerana le batho bao ba bego ba phela ka ditekanyetšo tša Beibele. E bile ntwa e thata eupša ga ke sa le lehodu le mohlolampherefere. Ga bjale ke na le nywaga ya ka godimo ga e lesome ke sa diriše dihlaretagi.

LEINA Craig

SETLOGO SA KA Ke goletše polaseng ka Borwa bja Australia. Tate e be e le setagwa gomme yena le mma ba ile ba arogana ge ke be ke na le nywaga e seswai. Mma o ile a  nyalwa gape ke moka ka dula le yena go fihlela ke na le nywaga e 17. Ngwageng woo ke ile ka ithuta go kota dinku gomme ka thoma go hlwa le dihlopha tša bakoti bao ba bego ba eya gohle moo ba bego ba ka hwetša mošomo. Ke ile ka thoma go diriša dihlaretagi tše di fapafapanego le go diriša bjala gampe, ka godiša moriri wa ka ya ba o motelele. Ke moka ka o tlotša makhura, ka o loga le go o logelela dipheta. Ke be ke na le lehufa, ke tshwenya batho e bile ke le sefelapelwana. Ke ile ka golegwa ka makga a mantšinyana.

Ke ile ka hudugela torotswaneng ya ka Bodikela bja Australia gomme ka dula le kgarebe ya ka yeo e bego e šoma go tšhelela batho bjala hoteleng ya kgauswi. Bobedi bja rena re be re kgoga le go nwa e bile re be re bjetše patše.

KAMOO KE ILEGO KA TLOGELA GO DIRIŠA DIHLARETAGI Re be re sa tšwa go buna patše ya rena ge Dihlatse tša Jehofa di be di kokota mojakong wa ntlo ya rena yeo e hlagetšego. Ga se ka fo dumela seo di bego di se bolela. Go e na le moo, ge nako e dutše e eya ke ile ka  itlhatselela gore seo Beibele e se bolelago ke therešo. Ke moka, kgato ka kgato ke ile ka lwantšha bothata bja ka bjo bongwe le bjo bongwe.

Go se go ye kae ke ile ka lemoga gore ke swanetše go tlogela mokgwa wa ka wa go diriša patše. Seo se be se tla akaretša’ng? Ke be ke šomile ka thata go bjala patše ya ka, ka gona mathomong ke be ke nagana go fana ka yona. Eupša ke ile ka phetha ka gore yeo e be e se tharollo e kaone eupša go e na le moo, ke ile ka e tumola. Thapelo e kgathile tema e kgolo go nthušeng go fenya go diriša ga ka dihlaretagi le bjala gampe. Ke ile ka kgopela moya wa Modimo gore o nthuše go lwa le go fenya dintweng tšeo ke bego ke lebeletšane le tšona. Le gona ke ile ka tlogela go gwerana le batho bao ba bego ba kgothaletša mekgwa ya ka e mebe. Ge ke dutše ke ithuta le go diriša dithuto tša Beibele, ke ile ka hwetša tšhireletšego yeo ke bego ke e nyaka ya maikwelo e le gore ke fenye a mangwe a mafokodi a ka. Kgarebe ya ka le yona e ile ya ithuta Beibele gomme ya fetoša mekgwa ya yona le bophelo. Re ile ra nyalana. Re phetše gabotse mmeleng ka nywaga e 21 gomme ga bjale re thabela go godiša bana ba babedi. Ke a tšhoga ge ke nagana gore bophelo bja ka bo ka be bo le bjang ge nkabe ke se ka thušwa ke Jehofa go fetoša mokgwa wa ka wa go phela.

LENGWALO LA BOHLOKWA

“Jehofa ke matla a ka le tšhireletšo ya ka.”—Jesaya 12:2.

KELETŠO

Ge e ba go kgonega, phema batho, mafelo le dilo tšeo di tswalanago le mokgwa wa gago wa kgale wa go diriša dihlaretagi. Nyakišišo e bontšha gore go fo bona se sengwe sa dilo tšeo go ka tsoša kganyogo ya go diriša dihlaretagi.

NA O BE O TSEBA . . . ?

Go diriša dihlaretagi gampe go ka fetoša sebopego sa bjoko bja gago.

KGATO YEO KE TLAGO GO E TŠEA!

Ge nka boela ka diriša dihlaretagi, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng motho a swanetše go dira diphetogo tše dikgolo bophelong bja gagwe ge e ba a nyaka go tlogela go diriša dihlaretagi?

● Go ithuta therešo ka Modimo go ka thuša bjang?

[Ntlhakgolo go letlakala 253]

“Ka go phela ka go dumelelana le ditekanyetšo tše di phagamego tša Beibele, ga bjale ke hweditše lethabo le morero bophelong.”—Marta

[Seswantšho go letlakala 256]

Go fenya go lemalela selo se itšego go swana le go iphološa ntlong yeo e fsago—o tla tlogela dilo morago eupša wa phološa bophelo bja gago