Mohlala—Jobo

Bophelo bja Jobo bo fetoga ka mo go feletšego. Sa pele, o lahlegelwa ke dilo tšeo a bego a iphediša ka tšona. Sa bobedi o hwelwa ke bana. Sa boraro o thoma go babja. Dilo tše ka moka di direga ka ponyo ya leihlo le gona ka ntle le temošo. Ka go nyama Jobo o re: “Moya wa ka o ila bophelo bja ka.” O itlhalosa a “pshirwa ke go nyatšwa e bile [a] imelwa ke go hlakišwa.” (Jobo 10:1, 15) Lega go le bjalo, gaešita le ge a na le mathata, Jobo o gana go furalela Mmopi wa gagwe. (Jobo 2:10) Diphetogo bophelong bja gagwe ga se tša ka tša mo fetoša. Ka go re’alo Jobo ke mohlala wa kgotlelelo.

Ge o lebeletšane le mathata, le wena o ka ikwa ‘o ila bophelo bja gago’. Lega go le bjalo, go etša Jobo o ka itlhatsela o sa fetoge ge o lebeletšane le phetogo, o sa šišinyege maikemišetšong a gago a go hlankela Jehofa Modimo. Jakobo o ngwadile gore: “Bonang! Bao ba kgotleletšego re re ba thabile. Le kwele ka kgotlelelo ya Jobo gomme le bone pheletšo yeo Jehofa a e neilego, gore Jehofa o na le lerato le legolo e bile ke yo a gaugelago.” (Jakobo 5:11) O ile a hlokomela Jobo, le wena o a go hlokomela!