Mohlala—Moshe

Moshe o na le dibaka tše dintši tše dibotse bophelong. O godišeditšwe ka ntlong ya bogoši ya Farao gomme a rutwa ka bohlale ka moka bja Egipita. (Ditiro 7:22) O tla dira’ng ka thuto ya gagwe? A ka ikhweletša botumo, mahumo le matla. Lega go le bjalo, ga a tutuetšwe ke kgateletšo ya dithaka goba a goketšwa ke kganyogo ya boithati. Go e na le moo, o kgetha mošomo wo ruri o makatšago batho ba bantši. O kgetha “go swarwa gampe le setšhaba sa Modimo.” (Baheberu 11:25) Na Moshe o lahlegelwa ke selo se itšego? Aowa. Ka ge a kgethile go hlankela Modimo le go thuša batho, o thabela bophelo bjo bo kgahlišago le bjo bo putsago.

Ge e ba le wena o šegofaditšwe ka go hwetša thuto e botse, o tla dira’ng ka yona? O ka kitimiša tšhelete goba matla. Goba ka go swana le Moshe, o ka dira selo seo se nago le mohola e le ka kgonthe ka bophelo bja gago. O ka diriša matla a gago a go nagana le mmele wa gago go hlankela Modimo le baagišani ba gago. (Mateo 22:35-40) Ga go na tsela e nngwe ya bophelo yeo e putsago go feta yeo!