Mohlala—Ruthe

Ruthe wa mohlologadi ke mohlala o mobotse wa potego. O kgethile go dula le mmatswalagwe yo a tšofetšego e lego Naomi, go e na le gore a boele bophelong bja manobonobo motseng wa gabo. Gaešita le ge kgetho ye e fokotša dibaka tša gagwe tša go hwetša molekane, Ruthe o dula a tsepamišeditše kgopolo dilong ka moka tšeo di akaretšwago tabeng ye. Lerato la gagwe la go rata Naomi le kganyogo ya go ba le batho ba Jehofa ke dilo tša bohlokwa go yena go feta go fo kgotsofatša kapejana kganyogo ya gagwe ya go nyaka go nyalwa.—Ruthe 1:8-17.

Na o nagana ka lenyalo? Gona ekiša Ruthe. O se ke wa šetša feela maikwelo a gago, eupša ipotšiše gore ke dika dife tše dibotse tše o tlago go di bontšha molekane wa gago wa ka moso. Ka mohlala, na o a botega le go ba le boikgafo? Na o phela ka go dumelelana le melao ya motheo ya Modimo, gaešita le ge nama ya gago e sa phethagalago e go gapeletša go dira ka tsela e nngwe? Ruthe ga se a ka a nyaka molekane ka lepotlapotla. Lega go le bjalo, ge nako e dutše e tšwela pele o ile a hwetša monna yo a ilego a bonagala e le monna yo a godilego tsebong yo a bego a na le dika tše di swanago le tša gagwe—ka godimo ga tšohle, monna yoo o be a rata Modimo. Se se swanago e ka ba sa therešo ka wena.