Mohlala—Timotheo

Timotheo o kgauswi le go tloga gae—ga a tšhabele ba lapa la gabo eupša o ya go ba moromiwagotee le moapostola Paulo! Go ka direga gore ge Timotheo a obelela nywageng ya mahlalagadi, e be e šetše e le lesogana leo le nago le boikarabelo leo le “[bolelwago] gabotse ke bana babo [lona] ba Lisitara le Ikonia.” (Ditiro 16:2) Paulo o kgodišegile gore Timotheo a ka kgona go phetha dilo tše dikgolo tirelong ya Modimo. Le gona o dira bjalo! Nywageng e latelago, Timotheo o sepela maeto a mantši, a tšama a hloma diphuthego gotee le go matlafatša bana babo le dikgaetšedi. Dika tše dibotse tša Timotheo di dira gore a ratwe ke Paulo, yoo ka morago ga nywaga e 11 a botšago Bafilipi gore: “Ga ke na yo mongwe yo a nago le kgopolo e swanago le ya gagwe yo a tlago go hlokomela e le ka kgonthe dilo tše di lego mabapi le lena.”—Bafilipi 2:20.

Na wena o itira yo a hwetšagalago gore o dirišwe tirelong ya Modimo? Ge e ba o dira bjalo, gona o letetšwe ke ditšhegofatšo tše dintši! Jehofa o tloga a tšeela godimo bafsa bao ba ‘ithaopago.’ (Psalme 110:3) Go feta moo, o ka kgonthišega gore Jehofa Modimo “ga se yo a sa lokago moo a ka lebalago modiro wa [gago].”—Baheberu 6:10.